¹ Ru̧hua̧ David täcö bö̧o̧'i̧sa̧ ji̧na̧'a̧, ja̧hua̧nö̧ ja̧'a̧ttö̧ pö̧ja̧ti̧yu̧ juättopa'anä̧'i̧nä̧ du̧'o̧sȩ jö̧nä̧'i̧nä̧ päi'ococu pinö. ² Ja̧hua̧nö̧ jo̧mȩnä̧ churutä ppä̧'ä̧dä̧rö̧ adicuä ttö̧ja̧ pättinäcu̧: "usu ti̧'chö̧'a̧nö̧ ja̧'a̧ yajute möäyajuru kirecuo'inä to'ajuru ujutu tu̧ru̧hua̧ ä'ca jo̧mȩ kö̧ja̧ pä'ö, churutä juä'opö ippeyenä pä̧nö̧ kudupo kiyarö pä'ö." ³ Ja̧hua̧nö̧ jä̧ji̧ o'ca'a Israel ttö̧ja̧ tti̧rȩjä̧ jä̧ttä̧yä̧jä̧ usinätö̧,ttusomenä po̧cui̧pi̧nä̧tö̧ yajute moäyaju juiyo a̧'cua̧cua̧ju̧ru̧ Abisag pä'ö micuaju, Sunamita ttö̧ja̧ isajuru, jahuäjurumä i'cächö iyinätö̧ ru̧hua̧rö̧. ⁴ Moäyäjumä juiyö a̧'cua̧cui̧nä̧ju̧. Jahuäjumä ru̧hua̧rö̧ ppä̧'ä̧dä̧ri̧nä̧ju̧, tta̧'a̧rö̧'i̧nä̧ tta̧jä̧ri̧nä̧cu̧, ja̧hua̧nö̧ ja̧'a̧nä̧ ja̧u̧ ru̧hua̧mä̧ idepä jähuämä ppä'ächi'o'cö pinö jahuäjucumä. ⁵ Ji̧yȩnö̧ pä̧nä̧ Adonias Haguit ki̧tti̧mä̧ chutä a̧'cua̧nä̧ amocuädö pä'inö: "ttötä jä̧cua̧'a̧ ru̧hua̧mä̧." Ja̧hua̧nö̧ pä'ö kä̧nö̧ öäre caruquiyä'inä, ja̧hua̧ta̧'a̧nö̧ ca̧hua̧yu̧tu̧nä̧ huȩjä̧tö̧rö̧'i̧nä̧ cincuetanö huotö u̧mä̧tö̧rö̧ jo̧mȩnö̧ jȩpi̧nö̧ chutä ä'canä jopönö tti̧'chä̧cuo̧tö̧rö̧. ⁶ Ju̧hua̧nö̧ ja̧'a̧ jä'omä ji̧'qui̧cha̧nö̧'i̧nä̧ i̧mi̧cu̧nä̧nö̧'i̧nä̧ päococu pinö: ¿tta̧'a̧nö̧ pä'ö jȩcu̧'ä̧jä̧ttö̧ pi̧yȩ'i̧nä̧ ji̧yȩ'i̧nä̧ jo̧nä̧mä̧? Ja̧hua̧ta̧nö̧ Adoniasmä ö̧jö̧ttö̧'i̧nä̧ juiyo a̧'cua̧cui̧nö̧, ja̧u̧mä̧ Absalon uhuäpächinö o'ca'a uhuäpächinö ji̧na̧'a̧. ⁷ Huȩnȩ 'quiecuä jä'epinö Sarvia ki̧tti̧ joabcu'inä Diosttö'inä ttö̧ja̧ttö̧'i̧nä̧ kä'copäte'ö adicuä'i̧sa̧ Abiatarö'inä. Jahuätömä ppä̧'ä̧dä̧ri̧nä̧tö̧ ji̧na̧'a̧ Adoniasrö. ⁸ Ja̧hua̧nö̧ ja̧'a̧nä̧ Diosttö'inä ttö̧ja̧ttö̧'i̧nä̧ kä'copäte'ö adicuä'i̧sa̧ Sadoc'inä, Joiada i̧tti̧ Benaia'inä, Dios päji jiäcuähuä i̧sa̧ Natan'inä, Simei'inä, Rei'inä o'ca toi'önä Davidttö ucuo ttö̧ja̧mä̧ Adoniascumä 'cho̧'co̧to̧ pi̧nä̧tö̧. ⁹ Adoniasmä o̧huȩjä̧tö̧rö̧'i̧nä̧, pä̧cä̧yö̧rö̧'i̧nä̧, ja̧'hua̧ta̧nö̧ korotö cuäcuähuotö bärepätöttö'inä cuä'ö icuinö Zohélet inähuä, aje i̧sä̧rä̧ ppöepome Rogel jäyättö. Ä̧tȩpi̧nö̧ chutä ahuaruhuä ru̧hua̧ i̧tti̧mö̧rö̧, o'ca toi'önä Judasttö u̧mä̧tö̧rö̧'i̧nä̧, ru̧hua̧ umuhuäyotö ppä'ädö adicuä ttö̧ja̧rö̧'i̧nä̧. ¹⁰ Ja̧hua̧nö̧ ja̧'a̧nä̧ Dios päji jiäcuähuä'i̧sä̧ Natanrö'inä, Benaíarö'inä, ö̧jä̧hua̧ Salomonrö'inä ä̧tȩpo̧cö̧ pi̧nö̧. ¹¹ Ja̧hua̧nö̧ jo̧mȩnä̧ Natanmä Betsabérö ucuocuinö Salomon a̧ju̧rö̧ pä'inö: "¿ucumä ä̧ju̧cuo̧co̧ju̧ päjäjujä tä̧ji̧ Adonias Haguit ki̧tti̧mä̧ ujutu tu̧ru̧hua̧ David ieruhuomenä chutätä ru̧hua̧ pä'i'önä jȩpä̧cuä̧huä̧ji̧ pä'ömä? ¹² Ja̧hua̧nö̧ ja̧'a̧ttö̧ ucu cua̧'cua̧rö̧ tta̧cu̧huä̧rä̧cuä̧hua̧ pä'ö jö̧ttö̧mä̧ ja̧hua̧ta̧'a̧nö̧ cui̧tti̧ Salomón a̧'cua̧rö̧ tta̧cu̧huä̧ra̧ pä'ö jö̧ttö̧'i̧nä̧ pi̧yȩ jidähuä'anä ä̧ju̧cui̧. ¹³ Ru̧hua̧ David ä'ca jo̧mȩ do'ächi'ömä, pa̧'a̧nö̧ päcuhuaröja: ttö chu̧ru̧hua̧ ¿iso jö̧nä̧ pähuä pä'ö ku̧no̧cö̧ pinöjä tä̧ji̧, cu̧ru̧huo̧nä̧ kä̧nö̧ paju cu̧mu̧huäyajuru ucutä cui̧tti̧ Salomon ja̧cua̧'a̧ ttö chö'comenä ruhuo dȩä̧cä̧nä̧ ö̧'ä̧mä̧da̧cua̧ pä'ömä? ¿tta̧'a̧nö̧ pä'ö Adoniastä ru̧hua̧ päi'önä ö̧ja̧'a̧ jä̧ttö̧ jitämä? ¹⁴ Ucu ru̧hua̧cu̧ ucuocu cu̧ju̧'a̧nä̧, ttö'inä cuo'ca'anä do̧dä̧chi̧'ä̧cua̧sä̧, kucuocuäjimä iso päi'önätä ja̧'a̧ pä̧dä̧cua̧sä̧. ¹⁵ Ja̧hua̧nö̧ ja̧'a̧ Betsabemä ru̧hua̧rö̧ topö 'chinäju ä̧'o̧ca̧nä̧ ö̧'a̧'a̧. jau ru̧hua̧mä̧ juiyo böecuächinö ji̧na̧'a̧, ja̧hua̧nö̧ ja̧'a̧ttö̧ Abisag Sumanita ttö̧ja̧ isajumä ru̧hua̧rö̧ ppä̧'ä̧dä̧ri̧nä̧ju. ¹⁶ Betsabemä ja̧rȩyu̧ pä'i'ö kihue'quiyunä pä̧mä̧dö̧ ucuotö jȩpi̧nä̧ju̧ ru̧hua̧rö̧. Ja̧hua̧nö̧ jȩji̧yȩcu̧ ru̧hua̧mä̧ päinäcua̧. ¿Däje pä̧huä̧rö̧ ja̧'a̧ttö̧? ¹⁷ Ja̧'hua̧nö̧ ja̧'a̧ jahuäjumä kädätinäcu̧ chu̧ru̧hua̧ ucumä iso jö̧nä̧tä̧ pä'inöjä̧, ucu cumuhuäyajuru, CU̧RU̧HUA̧ Dios i̧mi̧nä̧, pa̧'a̧nö̧ jö̧nä̧: "iso päi'önä ucu cui̧tti̧ Salomóntä̧ jä̧cua̧'a̧ ttö cho'comenä ruhuo dȩä̧cä̧nä̧ ö̧'ä̧mä̧dä̧cua̧mä̧." ¹⁸ Ja̧'hua̧nö̧ ja̧'a̧nä̧ jitämä Adoniastä̧ ja̧'a̧ ruhuonä hue'ömä, ja̧'hua̧nö̧ ja̧'a̧nä̧ chu̧ru̧hua̧ ucumä jȩru̧pa̧jä̧. ¹⁹ Ja̧u̧mä̧ pä̧cä̧yö̧ttö'inä, korotö cuäcuähuotö bärepätöttö'inä, o̧huȩja̧tö̧ttö̧'i̧nä̧ recuätörö cuä'ö icuäji, ja̧'hua̧nö̧ jȩpö̧ o'ca toi'önä ru̧hua̧ i̧tti̧mö̧rö̧'i̧nä̧ Diosttö'inä ttö̧ja̧ttö̧'i̧nä̧ kä'co päte'ö adicuä ttö̧ja̧'i̧sa̧ Abiatarö'inä su̧ro̧da̧u̧ ttu̧ru̧hua̧ Joabrö'inä ä̧tȩpä̧ji̧ ja̧'hua̧nö̧ ja̧'a̧nä̧ ucu cu̧mö̧huä̧ya̧ Salomónrömä a̧tȩpo̧cö̧ päji, pä̧ji̧nä̧cu̧. ²⁰ Ttö chu̧ru̧hua̧, o'ca toi'önä Israel ttö̧ja̧mä̧, ucu ru̧hua̧ päcu huȩnȩ ttä̧ju̧cua̧ pä'ö tta̧'a̧rä̧tö̧, Di ja̧cua̧'a̧ ja̧ pä'ö ruhuo dȩä̧cä̧nä̧ ö̧'ä̧mä̧dä̧cua̧mä̧, ucu ruhuo huecuä'ijö cuo'come. ²¹ Ja̧'hua̧nö̧ jo̧ca̧'a jö̧ttö̧mä̧ i̧mi̧cu̧nä̧tä̧ 'cuäopäcua'a ttö chu̧ru̧hua̧, ru̧hua̧ jä̧'o̧tö̧mi̧nä̧ jö̧ta̧'a̧nö̧ ä'iomenä, ttörö'inä chi̧tti̧ Salomónrö'inä ttö̧ja̧rö̧ cuä'ö icuätö jä̧'i̧nö̧'a̧nö̧ jȩttä̧cuo̧tö̧jä̧. ²² Ji̧nä̧ ru̧hua̧cu̧ ucuocu kö̧ja̧'a̧nä̧, täcö do'ächi'inö Dios päji jiäcuähuä i̧sa̧ Natan. ²³ Adicuä ttö̧ja̧mä̧ yotäcu ru̧hua̧rö̧ jiähuopo'ö pä'inätö̧: pȩnȩtä̧ kö̧ Dios päji ji'äcuähuä i̧sa̧ Natanmä. ja̧u̧mä̧, ru̧hua̧ o̧'o̧mȩ do'ächiö ja̧rȩyu̧nu̧ pä'i'ö, ö'ä rȩjȩ becuächönä ucuotö jȩpi̧nö̧. ²⁴ Natanmä pä'inö: ttö chu̧ru̧hua̧ ¿pa̧'a̧nö̧ jönä pä'inöjä̧?: Adoniastä jä̧cua̧'a̧ ttö cho'comenä ruhuo huȩa̧cua̧mä̧, ja̧u̧tä̧ ja̧cua̧ ruhuo chideäcänä ö̧'ä̧mä̧dä̧cua̧mä̧ ¿pä'inöjä? ²⁵ Ja̧hua̧nö̧ ja̧'a̧ jitä pi̧yȩ mo̧ro̧ mȩyȩhuä̧ji̧'ca̧ pä̧cä̧yö̧tto̧'i̧nä̧, de'a isotö bärepätöttö'inä, o̧huȩja̧tö̧ recuätörö cuä'ö'icu, o'ca toi'önä ru̧hua̧ i̧tti̧mö̧rö̧'i̧nä̧, su̧ro̧da̧u̧ tturuhuotörö'inä, Diosttö'inä ttö̧ja̧ttö̧'i̧nä̧ kä'co päte'ö adicuä ttö̧ja̧'i̧sa̧ Abiatar'rö'inä a̧tȩpä̧ji̧. Jitämä cuänö'inä, au'inä ja̧u̧tä̧ ä'ca jo̧mȩ eseu kä̧nö̧ pä'ätö: ¡ru̧hua̧ Adoniasmä recuo ö̧jä̧cua̧! ²⁶ Ja̧hua̧nö̧ ja̧'a̧nä̧, ttö ucu cu̧mu̧huä̧ya̧rö̧'i̧nä̧ Diosttö'inä ttö̧ja̧ttö̧'i̧nä̧ kä'co päteö adicuä ttö̧ja̧'i̧sa̧ sadoc'rö'inä Joida i̧tti̧ Benaiarö'inä, cu̧mu̧huä̧ya̧ Salomónrö̧'i̧nä̧ a̧tȩpo̧cö̧ päji. ²⁷ ¿Pi̧yȩmä̧ chu̧ru̧hua̧ ucu huecuhuäji ja̧'a̧ tä̧ji̧, cumuhuäyotörö'inä jiäcuähuä juiyönä, di jä̧cua̧'a̧ jä̧ttö̧ ruhuo deäcänä ö̧'ä̧mä̧dä̧cua̧mä̧, jitä ru̧hua̧ huecu o'come huea pä'ömä? ²⁸ Ja̧'hua̧nö̧ ja̧'a̧ ru̧hua̧ David adätö pä'inäcu: Betsaberö huopiyittö. Jahuäjumä 'cha̧hui̧'ö̧ ä'ca jo̧mȩ kä̧mä̧di̧nä̧ju̧. ²⁹ Ru̧hua̧mä̧ iso jö̧nä̧ pähuä, pä'inö: chö̧ä̧nä̧hua̧mä̧ 'cuäopönä kö̧, cha̧'cua̧ tta̧dȩcuo̧mȩnä̧'i̧nä̧ adihuächi'önä ppä̧dä̧rä̧cu̧sä̧, ³⁰ Israel ttö̧ja̧ ttö̧ä̧nä̧hua̧ Dios i̧mi̧nä̧ micuähuächönä pähuä ucuru pädinö ta̧'a̧nö̧ pä'ösä: ucu cui̧tti̧ Salomóntä̧ jä̧cua̧'a̧ cho'comenä ruhuonä huȩä̧cua̧mä̧, ja̧u̧tä̧ jä̧cua̧'a̧ ruhuo chi̧dȩä̧cä̧nä̧ ö̧'ä̧mä̧dä̧cua̧mä̧, ja̧'hua̧nö̧ jö̧ ta̧'a̧nä̧tä̧ jä̧'cua̧'a̧ jitämä. ³¹ Ja̧'hua̧nö̧ ja̧'a̧ Betsabe ru̧hua̧ a'ca jo̧mȩ 'chä̧hui̧'ö̧ ja̧rȩyu̧nu̧ pä'i'ö ki'ä rȩjȩ becuächönä jȩpö̧ ucuotö pä'inäju: ¡'cuäopönätä̧ ö̧jä̧cua̧ ttö chu̧ru̧hua̧ Davidmä! ³² Ru̧hua̧ Davidmä pä'inö: "Ji'ähuiyätucuittö ttichi'a Diosttö'inä ttö̧ja̧ttö̧'i̧nä̧ kä'co päteö adicuä i̧sa̧ Sadoc'rö'i̧nä̧, Dios päji jiäcuähuä'i̧sa̧ Natanrö'inä, Joida i̧tti̧ Benaiarö'inä." ja̧'hua̧nö̧ ja̧'a̧ Jahuatömä ichi'ö do'ächi'inätö̧ ru̧hua̧ ä'ca jo̧mȩ. ³³ Ru̧hua̧mä̧ päinäu̧: "cu̧ru̧hua̧tu̧cu̧ umuhuäyotörö ca̧ca̧to̧po̧'ö̧ chi̧tti̧ Salomónrö chäji mula isajunä huä̧ni̧pö̧ ȩpä̧tu̧cui̧rö̧ Gihónra'a. ³⁴ Juorötä Diosttö'inä ttö̧ja̧ttö̧'i̧nä̧ kä'co päteö adicuä i̧sa̧ Sadocu, Dios päji jiäcuähuä i̧sa̧ Natancu adeja unä da'epö cujunätucuaröja Israel ttö̧ja̧ ttu̧ru̧hua̧ pä'i'önä, ja̧hua̧nö̧ jȩcu̧'ä̧tu̧cuo̧mȩnä̧ trompeta ppötta'anä pättäcuotö: ¡Ru̧hua̧ Salomónmä recuo ö̧jä̧cua̧! ³⁵ Ja̧u̧nu̧ o'ca'a cui'chätucuaja ja̧u̧ o'ca'anä, ja̧u̧tä̧ i̧chä̧cua̧ chi̧dȩä̧cä̧nä̧ ö̧'ä̧mä̧da̧ pä'ö, ja̧hua̧nö̧ ja̧'a̧ttö̧ ja̧u̧tä̧ ruhuo huȩä̧cua̧ ttö 'choca'anä. Ihueye ja̧u̧ru̧tä̧ pojopö ȩmi̧nö̧sä̧ Israel ttö̧ja̧rö̧'i̧nä̧ Judas ttö̧ja̧rö̧'i̧nä̧ ttu̧ru̧hua̧ päi'önä huea pä'ö. ³⁶ Ja̧'hua̧nö̧ ja̧'a̧ joíada i̧tti̧ Benaía ru̧hua̧rö̧ adätö pä'inö: ¡ja̧hua̧nö̧tä̧ ja̧'a̧cua̧ja̧!, ja̧hua̧nö̧tä̧ pä'ö, ttö chu̧ru̧hua̧ U̧RU̧HUA̧ Diosmä . ³⁷ Diosmä chu̧ru̧hua̧cu̧ ö̧jä̧'i̧jö̧'anötä ö̧jä̧cua̧ Salomoncu'inä David hueinomettö'inä abonänö huȩä̧cua̧ Ja̧u̧mä̧. ³⁸ Ja̧'hua̧nö̧ ja̧'a̧ Diosttö'inä ttö̧ja̧ttö̧'i̧nä̧ kä'co päteö adicuä i̧sa̧ Sadoc'inä Dios päji jiäcuähuä i̧sa̧ Natan'inä Joíada i̧tti̧ Benaía'inä mȩyȩhui̧nä̧tö̧, jua'a jö̧ta̧'a̧nö̧ Cereteos ttö̧ja̧'inä, peleteos ttö̧ja̧'i̧nä̧ ichi'ö ru̧hua̧ David äji mulanä cä'epö huä̧nö̧ Salomónrö ȩpi̧nä̧tö̧ Gihónra̧'a̧. ³⁹ Ja̧'hua̧nö̧ ja̧'a̧ Diosttö'inä ttö̧ja̧ttö̧'i̧nä̧ kä'co päteö adicuä i̧sa̧ Sadocmä, Dios ö̧jodettö ä̧ja̧'i̧sa̧na̧ a̧dȩja̧ a̧cuä̧na̧ ȩmo̧po̧'ä̧ji̧'ca̧ Salomónrö̧ unä dä'epinö. Ja̧'hua̧nö̧ dahuepäji o'ca'a trompeta ppötta'anä o'ca toi'önä ttö̧ja̧ huopinätö̧: ¡Ru̧hua̧ Salomónmä recuo huȩä̧cua̧! ⁴⁰ Ja̧u̧nu̧ o'comenä o'ca toi'önä ja̧u̧tä̧ o'ca'anä 'chä̧nö̧, märäna̧ ppö'ö kä̧nö̧ ra̧'i̧nä̧tö̧, ja̧hua̧nö̧ jȩpö̧ rö̧ä̧nä̧ eseu huotta'attö rȩjȩ'i̧nä̧ ttö̧ȩpi̧na̧'a̧. ⁴¹ O'ca toi'önä ttucuäji o'ca'a Adonías'inä ä̧tȩpä̧u̧'i̧nä̧ ä̧ju̧cui̧nä̧tö̧. Ja̧'hua̧nö̧ jo̧mȩnä̧ Joabmä trompeta pä̧i̧cu̧nä̧ rä̧mi̧pö̧nä̧ ppöttä'a ä̧ju̧cu̧ pä'inö: ¿Tta̧'a̧nö̧ pä'ö huotta'a jä̧ttö̧ ötahuiyä ttö̧ja̧ pä̧i̧cu̧nä rä̧mi̧pö̧nä̧mä̧? ⁴² Ja̧u̧ ji̧nä̧ ucuocu ö̧ja̧'a̧nä̧ , Diosttö'inä ttö̧ja̧ttö̧'i̧nä̧ kä'co päte'ö adicuä i̧sa̧ Abiatar i̧tti̧ Jonatán ichi'inö. Adonías päinäcu̧: "do'ächi'i, ucutä ja̧'a̧ jueö adihuä huȩnȩ i'cächömä." ⁴³ Jonatamä adätö pä'inö Adoníarö: ujutu tu̧ru̧hua̧ Davidmä täcö ru̧hua̧ päi'önä ku̧nä̧ji̧ Salomónrö̧tä̧. Ja̧hua̧nö̧ ja̧'a̧ ru̧hua̧mä̧ hue'äji ja̧u̧cu̧ tti̧'cha̧ pä'ö ⁴⁴ Diosttö'inä̧ ttö̧ja̧ttö̧'i̧nä̧ kä'co päte'ö adicuä i̧sa̧ Sadocrö'inä̧, Dios päji huȩnȩ jiäcuähuä'i̧sa̧ Natanrö̧'i̧nä̧, Joíada i̧tti̧ Benaíarö̧'i̧nä̧, juhua'a jö̧ ta̧'a̧nö̧ Cereteos pä'ähuotöttö'i̧nä̧, Peleteos pä'ähuotöttö'i̧nä̧, jahuätötä ja̧'a̧ ru̧hua̧ aji mula isajunä̧ cä'epö huȩnä̧jä̧tö̧mä̧. Diosttö'i̧nä̧ ttö̧ja̧ttö̧'i̧nä̧ kä'co päte'ö adicuä'i̧sa̧ ⁴⁵ Sadoc'i̧nä̧, Dios päji huȩnȩ jiäcuähuä'i̧sa̧ Natan'i̧nä Gihon idäyä jäyättö a̧dȩja da'epö ru̧hua̧ päi'önä ttu̧ju̧nä̧cu̧, ja̧hua̧nö̧ ja̧'a̧ juhuoröttömä esehuäyotötä ichäjätö, ja̧hua̧nö̧ ja̧'a̧ttö̧ ötahuiyämä rö̧ä̧nä̧ ttö̧ȩpa̧ja̧'a̧. Pi̧yȩtä̧ ja̧'a̧ ötahuiyä ttö̧ja̧ pä̧i̧cu̧nä̧ rä̧mi̧pö̧nä̧ huotta'a cuä̧ju̧cuä̧tu̧cu̧mä̧. ⁴⁶ Ja̧hua̧nö̧ ja̧'a̧ttö̧ Salomonmä̧ täcö pä̧mä̧dä̧ji̧ ruhuo dȩä̧cä̧nä̧. ⁴⁷ Jahuätö ru̧hua̧ u̧mu̧huäyotö'inä̧ ru̧hua̧ Davidrö 'chä̧nö̧ pä'ätö: Salomon i̧mi̧nä̧ Diostä adiunä jȩä̧cua̧ ucu cui̧mi̧ttö̧'i̧nä̧ yabonä̧nö̧, juhua'a jö̧ ta̧'a̧nö̧ uruhuomä̧ ucuttu'i̧nä̧ yabonä̧nö̧ rö̧ä̧nä̧ jȩi̧yä̧cua̧. Ja̧u̧ ru̧hua̧mä̧ esehuäji ä̧'ä̧ppä̧nä̧ pä̧nö̧. ⁴⁸ Ja̧hua̧nö̧ ja̧'a̧ ru̧hua̧mä̧ pa̧'a̧nö̧ pä'äji: Chu̧ru̧hua̧ adihuä i̧sa̧, Israel ttö̧ja̧ ttö̧ä̧nä̧hua̧ Diosmä̧, jitä pi̧yȩ mo̧ro̧ iyäjäcusä chö'ärenä tochönä ruhuo dȩäcänä chö̧'ä̧'i̧jo̧mȩ pä̧mä̧dö̧rö̧. ⁴⁹ O'ca toi'önä Adonías ä̧tȩpä̧jä̧u̧mä̧ ja̧u̧ huȩnȩ ä̧ju̧cu̧ ye'ecui'ö ya̧cu̧ pö̧nä̧ dö'ecuächinä̧tö̧. ⁵⁰ ja̧'a̧ Adoníasmä̧ Salomonrö̧ ye'ecui'ö ä̧rä̧mi̧'ö̧ tö'ipächö i̧sa̧rö ku'icu iyähuome ka̧cu̧ o̧na̧nä̧ 'chu'ädi'inö̧. ⁵¹ Ja̧hua̧nö̧ ja̧'a̧ Salomonrö̧ ji'äu pä'inä̧tö̧: "topi, Adoníasmä̧ ru̧hua̧ Salomonrö̧ ye'ecui'ö roomȩ i̧sa̧rö̧ ku'icu iyähuome ka̧cu̧ o̧na̧nä̧ 'chu̧huä̧rä̧nö̧ kä̧nö̧ pa̧'a̧nö̧ pä'ö: ru̧hua̧ Salomon pi̧yȩ mo̧ro̧tä̧ jiähuattö pä'ösä ttö u̧mö̧huya̧ hua̧rö̧ curodänä cuä'ö'icu juiyäcua'a ja̧ pä'ö." ⁵² Ja̧hua̧nö̧ ja̧'a̧ Salomónmä pä'inö: ja̧u̧mä̧ adihuä i̧sa̧ jö̧ttö̧mä̧, yoite uhuocoi'i̧nä̧ moä̧chi̧yä̧cua̧'a̧ rȩjȩra̧'a̧mä̧, ja̧hua̧nö̧ ja̧'a̧nä̧ ja̧u̧nä̧ surojö ka̧cu̧ttu̧mä̧ 'corupäi'ä̧cua̧. ⁵³ Ja̧hua̧nö̧ ja̧'a̧ttö̧ ru̧hua̧ Salomónmä̧ u̧mä̧tö̧rö̧ hue'inö i̧sa̧rö̧ ku'icu iyähuomȩttö̧ tti'cächarö pä'ö, ja̧hua̧nö̧ ja̧'a̧ ja̧u̧mä̧ ru̧hua̧ ä'ca jo̧mȩ ichö ihue'quiyunä kä̧mä̧dö̧ ucuotö jȩpi̧nö̧. Ru̧hua̧ Salomón päinäcu̧: "Cuojusodera̧'a̧tä̧ täi."