¹ Shoaji Noemí, Rut ijierromi iaco rosho: "Iempeti, nomaotsa ape atsia pisho, iwapacaoda pjia, matsia carroatsa pjia pjiomi naco. ² Njite Booz, jliaji ishocada idenjicape lrisho, njaji pialri pidenji icodapi, icatsa pada wakitsindacan. Piwapa pjimi matsia nosho, panayaotsa deepi lricakja caotsa cebada lriipana lrico kiniki ricoda. ³ Niini panaya, pipitá pioyao, pipomenitacawa, pjieta pinacoa pitsayan matsiaperripja piá carro kinikiapji ricojle. Mitsa macadaatsa Booz icapaca pjia kjerreca lritaita lrinjaca lrirra tsacja. ⁴ Picapaotsa kjerrecawaca lrioshoa lrimaa, njitenaotsa lrimaacapemina piawatsa lriderse, pimjecoatsa lripajle jliipa iicao, njite pioshoatsa jliipa icodapi. Njiteotsa lricaite pisho cocaca pinaitja.'' ⁵ Njite Rut iaco Noemí iso: "Nonaitjaotsa pjiomi cayoji picaite capisho njoa.'' ⁶ Niini Rut iawa kinikiapji ricojle, njite ronaitja cayoji rojierromi icaite capisho rosho. ⁷ Njite Booz injacamina njite lrirra tsacja catiima lricaolre, ikeena lriaca lrioshoa lrimaa pikeetem shecawa nasho njaji paniati iinaca nawakeetaji. Njite Rut iawa tacaatsa, romjeeco lripajle jliipa iicao njite roshoa jlipa icodapi. ⁸ Niini deepi pamoyoa, Booz icafiawa kjeyanadatsa njite corri lrianji coanca. Lricaboco cádanaco lrioshoá carro matsia, lrianji apama iinarroca ioshoa jliipa icodapi. ⁹ Njite lritatja jlimio, lriaco: ''¿Cocao pjia?'' Njite shoepani: "Pishodarro Rut-ca njoa. Pipeeco pipajle pishodarro naco, ima ictsa pjia wakitsinda itaitacada iwentaca njoa.'' ¹⁰ Njite Booz iaco rosho: ''Pjia iempeti, Matsia Dio icaiteca pinaco. Picañjata capoa nocapa pimatsiaca nonacojle panaya lrioya jliaji picañjatalri nocapa pioca cádanaco toa, ima corrim piawa njaapodam nja atsianai iempetipe toa, kjenaaperri o canaaniperri. ¹¹ Niini panaya iempeti, mjetatsa picaolre. Nonaitjaotsa picjaote cocacatsa pinaa nonaitjaca pisho, ima pjiomi njaji noyacalreeta nanjíi iinarro matsiadarroca pjia. ¹² Ajádalri ikitsindaca njoa; mitsa, niini pja pada ikitsinda tsoomidalri pja nooya. ¹³ Pimeena anji jlia deepica jliaji. Tjewenaotsa, jliaji ikitsinda tsoomidalri pja nooya lrioma cadaotsa lridietaca pjia lrishowao, cayo pedaotsa. Mitsa corricadaa lritaita, nocaite pjia wa Minalri iipitana naco, njoá watsa idieta pjia noshowao. Panaya pioshoa pimaa pioyao atee kjerreca jaalre piicao.'' ¹⁴ Niini Rut ioshoá imáa jlipa icodapi atee tsoomi jaalreca icjaolre. Mitsa deepi pjatoa shonico roá lrioya, ima Booz icaite rosho corri carro coca ianjíi apama iinarro iaca lriicjaolre kinikiapji ricojle. ¹⁵ Njite Booz iaco rosho: ''Pidee nosho pinaconda pitsayan naco, njite pitiota noshon, Booz iwi rosho madalrina lata icoa cebadape njite lricada ronacon. Njite Booz iá yacalree ricojle. ¹⁶ Rut ioca cádanaco rojierromi iderse, rotatja shomiono: ''¿Coampja piacao iempeti?'' Njite Rut icaite shomi cocacá lrinaitja roicjaote jliaji atsia. ¹⁷ Roaco rosho: Njaji madalrina lata cebadape icatsa lriandaca nosho, ima lriaco nosho: ''Madiatsawa picaapi iapiyatsa pinjierro iderse.'' ¹⁸ Niini Noemí iaco rosho: ''Atoatsa piwapaji iempeti, atee kjerreca pjimi coanca namatsietaca iacoti pinaco, ima jliaji atsia corriotsa maapjí carrocan a kjerreca lritaita lrinaco jliadaatsa jeecoapica jliaji.''