¹ Njite cadaana jliaji Elimelec, Noemí inirrimi, lrishopia pada lrikitsinda lriirrana nacjoite, lriipitana Booz, pada atsia canaanidalri najinda inaco njaji inaiki lrinaikica matsiadalri icjaote. ² Rut, Moab njité darro, iaco Noemí ishó: ''Panaya picadaa noá carro noniwa napania iekje njaapodam njaji niwacaperri napaniapji rico. Noa watsa jliapodam jliaji matsiadalritsa icapaca njoa.'' Niini Noemí iaco rosho: ''Washena piawa, iempeti.'' ³ Niini Rut iaca iniwa napania iekje namacaji njaji iniwacape paniapji ricó, njite jliaji paniapji naniwalri irricoda lriyadacan jliaji Booz, Elimelec ikitsinda. ⁴ Booz idiá cadana iocao Belén ricjoite, niini lritatjaca njaji iniwacape lripania: ''¡Inai catsa Dio''! Njite njeepapacan njaji iniwacape lripania: ''¡Dio icadaa matsiadalri pishó!'' ⁵ Njite Booz iaco lrisho jliaji lricadaalri naapiyawalrio njaji idenjicaperri lrisho: ''¿Coca iino shoate iempeti?'' ⁶ Njite jliepacani jliaji lrisodalri: ''Apama iempeti Moab njité darro inocada Noemí iinai ima rodiá keenawa. ⁷ Roaco nosho: Pinaitja matsiacalri nosho picadaa noniwaca njaapodam manamacaji njaji iniwacape nainaca njaji paniati. Niini ronoca roniwa ajerreji, piyompinacjoite rodenjica atee panajiete, icaamitsa rowafeetaca caidatsaji pawafeeta crroda lricó.'' ⁸ Njite Booz iaco Rut isho: ''Pjia iempetitoa, capja pjimitsa nosho? Maatsaotsa piiwa paniati iekje paafe ricojle, mamacatsa nokinikerre. Matsiapja aacatsa pidenji nainai njaji iempetipe idenjicaperri nosho. ⁹ Piwapa picapa jliaji paniapji akjerreca naniwa nja atsianai, njite piá watsa njaapodam nja paana inaitjepe. Nocaitjenina nasho nja atsianai wadee namaca picapaca. Meeta cadaa picaolre, piawatsa pirra ooni nerricodá dape njaji piarropetida njetaji njaji atsianai.'' ¹⁰ Njite Rut icoanja Booz ipeyajle, atee rotoda roecoa jiipai naco. roaco lrisho: ''¿Coadao matsia picapaca nosho, coada pjita picaolre noicjaote, pada jiipai nacjoité darro cadaana njoa?'' ¹¹ Booz iaco rosho: ''Nacaitjenina njomi pinaco njaji pinaitjalri pinjerro icjaote mayami cayami piinirrim atee panajiete. Pimaca pjinirri, pjidoa njite pjipaite jiico carrom pjia pinó carro naicjaolre njaji inaiki corri petsa pianjíi. ¹² Dio watsa icdaa picoadao pinaitja capoa matsia. Jiaji wa Minalri, Iraelitanai iDiote, jliaji piokeetalri iinai pidaanao, lricaoñaotsa pisho pjiomi njaji pinaitjalri matsia.'' ¹³ Njite roaco lrisho: ''Picadaa nonaitja matsia pisho, pjia nominalri, ima picatiimataca nocaolre, njite caacoca pjia matsia nosho, corri cadaanatsa pishodarroca njoa.'' ¹⁴ Njite nainja cádanaco Booz iaco Rut isho: ''Pino pinja wainai pan wainai, piapjoeta jliaji pinjanda jaico tjeda iaana capoadalri rico.'' Niini roofacao nacodapi njaji idenjicaperri lrisho, lriá rosho naijanda namerritaji. Roinja matsia atee kjerreca kepinaano njite romaca pja lriitem. ¹⁵ Rut jinico cádanaco roá carro tsenacja roniwa njaji naniwanda, Booz inaa njaji lrinaikite cayoji: ''Icadaa tsacjaotsa roniwaca nanacjoite njaji iwaketanda, njite corri nooma icoitacano. ¹⁶ Nanacjoite njaji iwaketanda iniwa carro nainaca icadaotsa ropia nanacjoite, roniwá carro roshowao. Njite corrí nooma icoitacano.'' ¹⁷ Niini roniwaca paniapji ricó atee dainomajle roicao. Njite róco néya nja roniwaji, njite njaji róocojina cebada iinaca apana lata icoa njemiñaca. ¹⁸ Rut jinico iawa yacaalre ricojle rofalri nirse. Njite rojierro icapa njaji roniwaji. Shota tsacja njaji paniati iecje namerritaji roijaca iitem roá carro rojierrom ishon. ¹⁹ Njite rojierrom iaco rosho: ''¿Kjerreo piaji piniwa paniati iekje opica? ¿Kjerreo pia pidenji? Matsia watsa Dio icapaca lrisho jliaji atsia ikitsindatalri pjia.'' Ikena Rut icaite rojierrom jimi lrinaco jliaji atsia paniapji iminalri roalri rodenji nirse. Roaco rosho: ''Booz lriipitana jliaji atsia paniapji iminalri noalri nodenji oopica.'' ²⁰ Njite Noemí iaco rirrinomi isho: ''Diowatsa inaitja matsia lrisho, ima corrim lrimatada nasho njaji caafiperri njite mayamperrimisho tsacja.'' Noemí iaco pja rosho: ''Jliaji atsia pada wanacjoité dalrican, pada wanacjoité dalri itaita cada iwentaca'' ²¹ Njite Rut Moabita darro iaco iaco Noemí isho: ''Cayo lriaco nosho: Pishotsa tsoomi catsa pjia naoya njaji atsia idenjicape nosho atee kjerrecaotsa yaami naniwaca.'' ²² Noemí iaco rirrinom Rut isho: Matsiatsa iempeti, piaca nainai njaji iempetipe idenjicape, wadentja nanaitjaca maatsi pisho piacadantja pada paniapji ricó.'' ²³ Niini Rut iema nacodapitsa njaji inaitjepe idenjicape Booz isho naniwá carro njaji paniati iekje atee nataita naniwaca pjiomi nja trigo iinaca. Njite Rut iofaacao rojierro iinaí.