¹ ¡Kjenádalrica njoa! Ima cayoca norso nawayaca capisho njaji jaicotjeda camoi iwayaca cádanacoa, cayoji nawayaca capisho naniwaca uva itepem uvapji ricó. Corrinatsa paoketaca nainaca, corrinatsa pacapa nainaca nooma cádanaco noiñjaca piyompinaco naco toa. ² Oopi nawayacawa njaji inaiki matsiaperri lrioya jliaji jalredaoca, Corrin pacapa pada mamatsicanaadalritsa nanakjoite njaji inaiki jalredaoca lricoperri. Pjiomi njaji inaiki nawapaketsa nainó carro njaji inakinai, nacoana nawapaca nainó-carro nakitsindatsa cayoji pawapa capisho paino maaficalri perroetanda ipia neñamáki. ³ Nanjí nanaitjaca maatsi nacaapi sho: natalricanaa itatja naoya palrata, jliaji icaitecaita naacona lriwapa ketsana jlitá-carri naoya palrata ishati sho, njite njaji kjaidaperri pjaca apjetsida ioya lricaite narso njaji apana cocaca njaji lriomalri naoya njetá-carro lrirsowao. Niini nanaitja padatsa nawaopiakje. ⁴ Njite jliaji matsiadalri pja nanakjoite cayocaniji lriida papocóperri yemacawa, njite jliaji matsiadalri pjatja nanakjoite cayocaniji cocoña sho. Icatsa jliaji jalredaoca nacaitenda narso njaji iwapacapena, icatsa ijalredaocate jirrapitacawa watsa. Icatsa jlinana iocacawa corricawatsa ianjí coajica. ⁵ Corrin nooma icadaca iwaopiakje pada icodapidalri nacó, mawapatsa matsiadalri pikitsindaji nacó. Iwapaotsa matsia njaji yácoti picaiterri inaco, njite rooya tsakja rsoaji ínarro picadalri imáca picoda nacó. ⁶ Njaji neenipe corrin nanaitja matsia njajinirri irso, njite rsoaji roito rsonicocawa rsodoa ikjoete, njite rirrino jinicowa roñjerro ikjoete. Jliaji apada atsia jiponda icatsa njaji inaki lriipana lricopetsa. ⁷ Mitsa njoa, nocapacaotsa lrikjaolkre jliaji IMINALRITI. Nowapacaotsa jliaji no-Diote imanacotacaita njoa, jlimicaotsa norso jliaji no-Diote. ⁸ Macatimatacatsawa nokjaote, sha njopondape. Njowa cadaotsa, nodiá tsenakjaotsa njonicowa. Nofá cádanacoatsawa cadaocawerrico, camarrai caoltsa norso jliaji IMINALRITI. ⁹ Nonaitja capoa maatsi IMINALRITI ikjoete, notarrawata caotsa Lrirroá a kjerrecaotsa Lridanataca njoa nonaitjanda ikjaote, njite coajicaotsa Lricadaca njorrapitaca. Lridee tsenakjaotsa njoa camarrai cawa lricojle, njite nocapaotsa coajicaotsa lriyomjetaca njoa Lrimatsiaca sho. ¹⁰ Njiyte nacapaotsa coajica njaji njopondape, njite capainicaotsa naicao naikjaote njaji nacaiterri nonaco nacaite cádanaco cayoji: ''¿A kjerreo Jliaji IMINALRITI pi-Diote?'' Notji icapacaotsana, njite napjoeta caotsana cayoji papjoa capisho caalri inipo lrico. ¹¹ Jliadaa iocacaotsa pikjaolre pinaitjacawaotsa pidanawa yenondalri, tecoatsa jipaite jinaana iocacawa. ¹² Jliada watsa jécoapi naocaotsawa njaji pinaikite aimadan pikjaolre, Asiria lrikjoite njite Egipto iyacalre lrikjoite tsakja, Egipto lrikjoite atee ooni macapeki Eufrate ikjaolre, Manoa nakjoite manoa nacojle, apana jiipana nakjoite apana jiipana nacojle. ¹³ Namaca caotsa jliaji jiipai naikjaote njaji inaiki aimadan iofalri niini panaya, nanaitjanda ikjaote tsakja. ¹⁴ Nawapacaotsa njaji Pinaikite aimadan pipjeco sho, njaji inaki piyarrope. Naofacawa njawacatsa apada awacadapji lrico, napecolrico njaji napaniapji. Naofacaotsawa Basán jipaite lrico njite Galaad lrico tsakja naofacawa lrico piatsa oopi. ¹⁵ Cayoji iofa capisho pia idiá caojli pia Egipto jipaite lrikjoite, Nocadaotsa nacapácarro matsiaperri. ¹⁶ Njaji apacoape yacaalre nacapaotsa njite capaimanicana nacapa cádanacoatsa jliida. Njepaotsa nanima naco; corriotsa njemicarroca njenacolrico sho. ¹⁷ Naperrocaotsa jiipai italre aapi sho, nacayosho njaji maaficalri itsoetaaca capewa nawawa sho jiipai naco. Nanoatsa narroapji lrikjoite ifiokjeti sho; natsomitacaotsa Pjia ifiokjeti sho, pjia wa-Minalri Dio, nafio caotsa pikjaote. ¹⁸ ¿Capjao niinica apada tsakja Dio cayoji Picayosho, Pjia ipecocada imatsicanati, Pjia corridalritsa coadaca irsi namatsicana njaji Pinaikite itepem, njaji Piyarrope? Corrin Pimatsieta pinacoa jliaji pirroa caidalriwetsa, ima Pipeyoca picanantaca fa jliaji Piacoami corridalritsa picadaa imatadaca. ¹⁹ Pipieta tsenakjaotsa picapaca warso; Pipjoa caotsa njaji wamatsicana ima picada caotsana Pjipa iapjite. Pipeco caotsa pjiomi njaji wamatsicana ooni ijewacacá lrico manoa lricoda. ²⁰ Picada caotsa jliaji ajádalri Jacob irso njite coajica corrica pimatadaca piacoam Abraham irsodalri, cayoji ñpicaite capisho yácoti ajádalri sho narso njaji waferrinaipe jiawalri.