Capítulo 13 (Njenitaca njaji pjerritinaipe Dio irso)
1
Caaco Dio Moise irso, Lriaco lrirso:
2
Pjienitaotsa Norso pjiomi njaji pjerritinaipe Irael lricope, atsianai njite maaficalri tsakja, ima noyapecana.''
3
Moise iaco narso njaji inaiki aimadan: ''Iwadaotsa jliada jalredaocaca jliaji, wa-Minalri jita ccdáa shá Egipto ioya, narsoperri cawa pia shá narsó. Kjaidadalri capoa jliaji Dio niini jlitaca shá njite. Corriotsa iñjá carroca petje kewidalri.
4
Imotoatsa Egipto lrikjoite jliadaa jalredaocaca jliaji, kérri Abib nacó.
5
Wa-minalri ideekenaotsa shá cananeonai jipaite lricojle, hititanai, amorreonai, heveonai njite jeboseoanai jipaite nacojle, jliaji jiipai wa-Minalri icaiterri yácoti ajadalri shó narso njaji iferrinaipe lriacaotsa irso, jliaji jiipai matsia cawa patawiñaca vaaca njite matsiacawa paapanaca, niniotsa irsotsa inaitjaca jliaji iacawa matsiadalri lrinacopi keérrica jliaji.
6
Siete jalredaoca watsa iñjaca petje mewidalritsa; siete jalredaoca nacó icatimataacawa wa-Minalri iipitana nacó.
7
Irsotsa iñjaca petje mewidalritsa siete jalredaoca; corriotsa cocá carroca irsoatsa petj kewidalri inakjoite. Corriotsa irsó carroca mojloi iipana lrico, corrin tsakja jipaite jinaa iocacawa lrico.
8
Jliada jalredaoca picaiteotsa pienipe irso: ''Wa-Minalri inaitjalri noikjaote nomoto caojli pia Egipto lrikjoite.
9
Cayoji pinaapapi capisho o cayoji pada catjinaadalri piekjoete nacodalri, cayoatsa jliaji yácoti kjaidadalri pirsolriotsa picaitepeca inaco wa-Minalri icadanda pirso, ima Jlída shó Jlita pjia Egipto lrikjoite.
10
Niini oonia icoam pirsotsa piwaadacani jlinaana lricó, pirsotsa pinaitjacani ima yácoti kjaidadalricani pirsoni.
11
Wa-Minalri idee cadanacoenaotsa pjia Canaán jipaite ricojle, cayoji Lricaite capisho piferrinaipe irso, njite Lriá cadanacoenaotsa pirso jliaji jiipai,
12
pirsoatsa piaca wa-Minalri irso pjiomi njaji pjerritinaipe, coshocaotsa nanakjoite njaji maaficalri. Pjiomi njaji atsianape initacape imotocawa wa-Minalri iyapecana.
13
Jliaji borro yénipe initacana imotocawa pirsotsa piaca apana cordero lricoadawa yomjé-carroni. Mitsa corri cadaa piyomjetani, icaamitsa pjitaca pokjomi lrinorsiapji nacó mayamí-caroni. Nacoamitsa njaji pienipe yénipe pjerritinaipe narsotsa náca nacoadawa.
14
Pienipe itatja cádanacoatsa pjia coanshopaca jliaji, picaiteotsa cayoji: ''wa-Minalri jiida kjaidadalri shó Jlita njoá Egipto lrikjoite, narsoperri cawa pia njoa narsó.
15
Kjerroa pia Faraón njite corri pia lricadaa wamoto njiteo. Wa-Minalri iino poia pjiomi nénipe pjerritinaipe Egipto jipaite ricope; pjerriti naipe inaiki iyape njite njaji maaficalri. Caishopa noino Dio irso pjiomi maaficalri yénipe atsianape pjerritinaipe, njite norsotsa noaca nacoadawa nanaco njaji noenipe yénipe pjerritinaipe.''
16
Cayoji pinaapapi capisho o cayoji pada catjinaadalri piekjoete nacodalri, ima wa-Minalri jída kjaidadalri shó Jlita faa Egipto lrikjoite.
17
Faraón icadaa caojli piena naawa njaji Iraelnai aimadan, corrin Dio icadaa naawa inipolrico njepaite ricodalri njaji filisteonai tsoomcawa pjatja. Ima Dio icaite: ''Wadee nadiacawa Egipto lricojle njaji nonaikite aimadan oowicalri ikjaote.''
18
Niini Lricadaca naawa inipolrico iyofiacadawa jliaji Manoá Írraidalri jalrapocolri ricó. Namotoa Egipto lrikjoite njaji iraelitanai aimadan papcope, nadee nanacoa nainoaca shopawa.
19
Moise idee nainaiwa Jose yapipemi, ima Jose icadaa nacaiteca yácoti ajádalri shó njaji iraelinai pia, lricaite cádanaco cayoji: ''Noajintsa Dio jitacaotsa shá ajaiteji, niini cayo cadanacoenaotsa ideotsa noapipemi inaiwa.''
20
Itraelitanai iawa Sucot lrikjoite njite naa nemá Etam inomapiana lricojle jalra pocolri ricó.
21
Wa-Minalri iá napjeya iyadaoca lricó Lricañjatá-carro narso inipo. Njite tiyé jalripádalri cani narso deepi ricó lricaná carro narso naapowa. Icatsa Lrinaitjaca narso nataitá-carro naacawa jaalrewe-ricó njite deepi ricó tsakja.
22
Corrin wa-Minalri shenitaca naoya jliaji iyadaoca jalrewerrico njite corrin tsakja jliaji tiyé jalripá-dalri deepi ricó.