¹ Belsasar iwaketa njaji mil perri caconaperri lrirsoperri nacatima taaca carroa, njite lridewana napjeyajle njaji mil perri lrirsoperri. ² Joiwi cadana toa Blsasar iají írraca, lrinaa njaji njaji lriorsoperri nácarro njeta njaji inaniti owirrodape, palratape narrona lricope jlinirri Nabocodonosor ideji Dio iipana lrikjoite Jerosalé njite, nairra-carro nerricoda, jlia, njaji caconaperri, lrininai, njaji inaitjepe lrinaiperri tsakja. ³ Njaji lrirsoperri nadee lrirso njaji owirroapipe narroda lricoperri nadeji panti macade lrikjoite, jliaji Dio iipana Jerosalén lricoda. Jliatsa jliaji talricanati, njaji caconaperri, lrininai, njite njaji inaitjepe lrinaiperri tsakja nairra nerricoda. ⁴ Nairra nerricoda njite naa matsiadalri nadiote irso nanaitjaji owirro sho, palrata sho, bronce sho, tsipalra sho, jaico sho njite jiipada sho tsakja. ⁵ Jliada nacotsa pada atsia icapjiwida lricapi nacoda icañjatacawa narso nacamarra icoemjete njite lridanaca panti iwai tarraite naco talricanati dapana naco. Lricapatsa jliaji talricanati nacapim idana cádanaco. ⁶ Ikena talricanati iecoa ipadamawa njite lriwaopiakje ifietacani; njite codiketsani, lriorsipada itetjecawa niini nañacacawa nakjoete wacatsa. ⁷ Talricanati jliemata kjaida lrinacarro njewacawa njaji icaitecaperri caacoca naapiya njaji mayamperrimi, njaji atsianai cajikjeperri, njite njaji yajicaperri nanaco njaji jiwirsida eeno yecoa nacoperri. Lriaco jliaji talricanati narso njaji cajikjeperri Babilonia lricoperri: ''Coca cadaa icaite coamishopaca jliaji nadananda nocadaotsa caconaitécarro noinaini, nocadaotsa lritsayani irraimaki, njite owirrokja lriwedalrico. Njite nonacojleda inacojleda caotsani notalricanaca naco.'' ⁸ Niini njewacawa pjiomi njaji cajikjeperri talricanati irsoperri, mitsa corrin nataita nalreca jliaji nadananda njite corrin tsakja nataita najica coamishopacani nacaité-carro talricanati irso. ⁹ Njite kerroaca jliaji talricanati Balsasar njite tecojlenakja lriecoa icapacana. Njite njaji caconaperri lrirsoperri corrin nají coajicana. ¹⁰ Niini rsoaji talricanati iino rsoewawa naiñjacawa lrico rsomi capoa coajica nacaiteca ronaco njaji lrirsoperri caconaperri. Niini roaco lrirso: ''¡Kjaidadalrica pjia talricanati! Macadatsa piwaopiakje ifietaca pjia. Macadatsa teecojle picapacana. ¹¹ Niini pada atsia anji pitalricanatacawa lrico irsocada nacaolremi njaji dionai matsiaperri. Pjinirri jiawajli pia, jliaji camarrai, iyecati njite yajikjeti cayoji lrirso capisho lrinacoa najikje njaji dionai. Jliaji talricanati, pjinirri Nabocodonosor, lricadaa piacani naminalriwa njaji yajicaperri jiwirsida inacoapana naco, naminalri tsakja njaji cacoperri napiya njaji mayamperrimi, atsianai cajikje perri naco tsakja njite nanaco njaji malrirrinai. ¹² Pana icaolreti matsiadalri, iyecati, yajikjeti, lricaite jitaponti naco, nanaco njaji inoparrotacaperri, njite lriají coajica lrimatsieta yacoti jirrapitinaperri, pjiiomi njaji nocaiterri naoketacana Daniel nacó, talricanati icadalri nakja ipitanao Beltsasar. Panaya pia piwana Daniel, jliawatsa icada iaji coamishopaca jliaji nadanalri panti iwai naco.'' ¹³ Ikena nadeca Daniel talricanati ipeyajle. njite lriaco lrirso jliaji talricanati: ''Icatsa Daniel-ca pjia, pada nanakjoite njaji nadeji Judá lrikjoite, Njonirri ideji Judá lrikjoite. ¹⁴ Njomica pinaco nacaolre njaji dionai naofacawa pinaco, piorso tsakja pida camarrai, iyecati, yanjikjeti njite aima yajikjeti naoketaca pinaco. ¹⁵ Ima nodecatja nokjaolrewa njaji cajikjeperri njite njaji cacoperri napiya njaji mayamperrimi nalreecarro njiyte nacaité-carro njomi coamishopaca jliaji nadananda panti iwai naco, mitsa corrin nataita nají coamishopaca nacaitecarro njomi coamishopacan. ¹⁶ Njomica pinaco pitaitaca coamishopaca njaji jitaponti njite pitaita tsakja pimatsietaca njaji yacoti jirrapitinaperri. Panaya picatja pitaita cadaa pileeca jliaji nadananda panti iwai naco njite picaite norso coamishoipacan, cayo cadaa njoetaotsa pinaco tsayana irraidalri njite pakja owirrokja piwedalrico naco, njite pjia watsa talricanati nonacojleda inacojleda naco notalricanaca lrico.'' ¹⁷ Njite Daniel shepa jliaji talricanati, lriaco lrirso: ''Pjipa pirsowaotsa njaji piomaji piaca norso macoadatsa, njite piana narso njaji apjetsida. Mitsa nolee watsa pirso jliaji nadananda panti iwai naco, njite nocaiteotsa pirso coamishopacana. ¹⁸ Njite pjia talricanati, Jliaji Dio, Yenonrsedalri pja pjiomi ioya lricada pia pjinirri Nabocodonosor irso, lritalricanawa, lrimacadalrica, lrimatsiaca, njite lriaconawa kjaidadalri. ¹⁹ Lrikjaote jliaji lrimacadalrica lritalricanaca naco Dio icadanda lrirso, nafiowa njite natetjecawa lrikjoete pjiomi njaji apacoa jiiapi, njaji apana yacaalre njite pjiomi njaji irsocaperri teeco naaco naoyawaca tsakja. Lrinaa nainoca njaji iomacaperri inocani, njite lricada cafitsa njaji corri perritsa ioma mayamicani. Lrinaitja matsia apjetsida irso, mitsa lrinaitja maatsi apjetsida irso. ²⁰ Mitsa padalre cádanaco lricaolre rico lriwada jliacatsa pjiomi njite lritarrataca lricaolre caishopa lrinaitjaca cayotsaji lrioma capisho tsa, Dio ipeconi lritalricanaca ioya, njite corrinatsa kjadacani. ²¹ Napeconi naikjaolre njaji maficalri , nini lrirsoca maficalri iwaopiakje, lriofacawa napecolrico njaji maficalri kerroaperri. Lriñja malritsi vaca sho. Njite itamana ipotsieta lridada njewa cádanaco eeno lrikjoite a kjerreca lridia lriwaopia Jliacatsa jliaji DIo yenonrsedalri pja pjiomi ioya icatsa jliaji italricanatalrica nanaco pjiomi njaji pana talricanatinai jalredaoca lricoperri njite lricada nanaco njaji apana inaiki coca irso catsa lrioma lricadacani. ²² Njite pjia lrirri, Belsasar, corrin picadaacawa kenadalri sho picaolre rico, piaji cadanatsa nanaco. ²³ Piemaca eeno Italricana ikjoete. Pideeca lripana lrikjoite njaji nadeji Dio iipana lrikjoite, pirra-carro nerricoda napiya njaji caconaperri pirsoperri, pininai, njite njaji inaitjepe pinaiperri; pirraca jaicotjeda iana nerricoda iácarro matsiadalri narso njaji idolonai nanaitjaji owirro sho, palrata sho, bronce sho, tsipalra sho, jaico sho, jiipada sho, njaji corripetsa jimi, corripetsa icapa njite corrin tsakja iají. Corrin iaca matsiadalri Lrirso jliaji Dio icadalri cafica sha, Jliaji iajicada coajica njaji inaitjalri. ²⁴ Cayoshopa Dio imenaca pada icapiti lridanácarro picapatsa, niini lridanaca. ²⁵ Cayo pia lridanacaji: ''Mene, Mene Tekel, y Parsin.'' ²⁶ Njite caishopacani: ''Mene.'' ''Dio iyamitaca pioya jliaji pitalricanaca niini Lricadakena lriwayaca cawa.'' ²⁷ ''Tekel'' ''Ima jlimiñataca pjia njemiñata carroda naco njite corrin coca pjimiñaca lrirso, corrin ajádalrica pjia.'' ²⁸ ''Parsin.'' Opi yamemape jliaji pitalricanaca njite opina lriacani narso njaji medonai njite persanai tsakja.'' ²⁹ Njitedalri Belsasar inaa njetaca Daniel itsayaniwa irraidalri. Pakja owirrokja nacada irroa lriwedalrico naco, njite talricanati icaite narso jliaca jliaji talricanati lrinacojleda inacojleda. ³⁰ Jliadatsa depicani, naino jliaji talricanati Belsasar, Babilonia italricana, ³¹ njite Dario, talricanati Medo dalri, jlia nakja jimao talricanatica lrirso caojli piena tsomi sesenta walria lripekirrica naco.