¹ Manase irsopiakena doce walria lripekirrica naco lriniita caojlina lritalricanaataca; cincoenta cinco walria lritalricanaataca Jerosalén lrico. ² Lrinaitja maatsi Dio ipeyajle, njaji maatsiperri mapeyocanaperritsa nanaitjalri njaji inaiki Dio ipecoji napeyajle njaji Iraelnai. ³ Ima Manase jirretaca tsenakja njaji yenondalripe jlinirri Ezequia ipeecolri pia jiwao, lrinaitja tsenakja altar Baalnai irso, Asera iema carrona tsakja, lriyamjeta lriecoa narso njaji jiwirsida eenolricojlé perri, njite lriaca narso matsiadalri. ⁴ Jlirreta inaitja altar Dio iipana lrico, Dio icaite cadaana pia cayoji: ''Caidalriwetsa najiica niinica noipitana Jerosalén lrico.'' ⁵ Lrinaitja altar narso njaji jiwirsida eenolricojleperri yamemape Dio iipana iyacalrecoa naco. ⁶ Lrimjaita lrienipe tiyee rico jiipai ioyawaca Ben Hinom lrico. Lrinoparrota demonionai ianjikje sho njite lrinaitja malrirricalri, lricapa pida coanca napeyajle njaji inaiki, njite lria naikjaolre njaji caacoperri naapiya njaji mayamperrim njite naapiya njaji caolriti. Lrinaitja aima maatsiperritsa Dio ipeyajle, cayotsa lrikerroataca Dio. ⁷ Lricadaa Asera jinapjiam lrinaitjanda Dio iipana lrico. Dio icaite cadaana pia lrinaco jliaji panti David irso njite lrirri Salomón irso, cayo pia Lricaiteca: Lri-ricoda pantica jliaji njite Jerosalén lrico, jliaji yacaalre noniwananda norsowao nanakjoite njaji Irael poco, nocada cawaotsa noipitana niini caidalriwetsa. ⁸ Corrinatsaotsa nocadaacarroca nanjicawa macadatsa njaji Iraelnai lrioya jliaji jiipai nocadanda narso njaji iferrinaipemi, mitsa njeepa cadaa cayekjatsa pjiomi njaji nonaalri nanaitjaca, nanaitja cadaa njaji iacoti kjaidaaperri, coanca paofacawa matsia, njaji nonaalri norsodalri Moise inakjoite nanaitjá carro.'' ⁹ Mitsa Manases idee njaji inaiki Judá lricope njite Jerosalén nanaitjá-carro maatsi, maatsí pja naoya njaji apaana inaiki Dio ipeecoji Iraelnai ipeyajle. ¹⁰ Caaco wa-Minalri Manase irso njite narso njaji ianaiki aimadan, mitsa corrin njemica lrirso. ¹¹ Niini wa-Minalri ideeca naikjaolre nacomanatenai njaji tsolrodaonai, lrirsoperri jliaji talricanaati Asiria lricoda, icatsa jliaji jipalrica Manase, lrinaa napapican cadena sho njite, njite nacadaa pja lrinaco candao lridee carroni Babilonia lricojle. ¹² Njite iinona cádanaco Manase jlita jlicaolre pekirritsa, niini lritatjaca caiwi-ricotsa Dio iinai, lricadaacawa Dio ipeyajle jliajíi capoa corricatsa cocacani lripeyajle jliaji lriferrinaipemi iDiote. ¹³ Lritatjá capoa Dio iinai, njite kjenatsa Dio jimica lrirso nanaco njaji lritatjalri lriinai, niini Dio idietacatsenakjani Jerosalén lricojle, lritalricanaatacawa lrico. Icatsa cayoji Manase ianjíi icatsa Dioca jliaji wa-Minalri. ¹⁴ Niini jliapodamjitena jliaji jiyapalrio, Manase inaitja yacaalre idana iwawalricojle pja lridanaopja jliaji David iyacalre, jerri imotokemajle Gihón irso, jiipai ioyawacadalri naco pjewacawa lrirso jliaji Pantinoma Copjepeco. Lridaanata jliaji awacada Ofel njite jlirretani yenonpjan. Lricadaa iwapacaope njaji yacaalre taimí perri njaji comanadantenai mafiocápetsa. ¹⁵ Lriwayaketa pjiomi njaji mikjapamperritsa dioca, nadiote njaji apanatsa inaiki, lripeeco Dio Ipana ioya pjiomi njaji idolonai, pjiomi njaji altar lrinaitjaji Dio iipana icodapi Jerosalén lrico, njite lripeecona pemajle yacaalre Jerosalén iooya. ¹⁶ Lrinaitja tsenakja Dio ialtarni, njite lrimjaita lrinaco maaficalri namaodaca shopawa njite lriá tsakja ofrenda lriá-carro matsiadalri Dio irso; njite lrinaa njaji inaiki nadejíi-carro wa-Minalri irso, na-Diote njaji Iraelnai. ¹⁷ Mitsa njaji inaiki naino minintoa maaficalri nanaco njaji yenondalripe naco, mitsa nanaitjani na-Minalri Dio irso. ¹⁸ Njaji paana Manase inacoapanaperri, coanji piaca lritatja lri-Diote iinai, njite naacoarrom njaji inoparrotacaperri, njaji caacolri pia narso Dio iipitana naco, na-Diote njaji Iraelnai, a pacapana lri-ricoda jliaji paperra icaite cada nanaitjaji inaco njaji talricanaatinai Irael lricoperri. ¹⁹ Lri-ricoda jliaji nacaitenialre nadananipe rico pacapa coanji piaca Manase itatjaca, njite coanca Dio jimica lrirso lritatjanialre ikjaote. Pacapa tsakja lri-ricoda coan piaca lricaiteca nja lrimatsicanaa, corricawa lrinaitja cayoji Dio ioma capisho, lricaite tsakja kjerrecawajleca lrinaitja pia njaji yenondalripe, njite njaji Asera iemacarronape, njite nanaco tsakja njaji njenapjiampe lrinaitjaji lripjeyatoa lriajiacacawa jliwacatsa corricatsa cocacani. Pjiomi njaji pacapacana nadananda lrico papaerra njaji inoparrotacaérri. ²⁰ Mayami Manase lriferrinaipemi iinai, njite njaji inaiki nadawani lriipana lricotsa. Njite lrirro Amon italricanaata jliapodam. ²¹ Amón irsopiakena ventido walria lripekirrica lriniita caojlina lritalricanaataca; yamawalria lritalricanaataca Jerosalén lrico. ²² Lrinaitja maatsi Dio ipeyajle, cayotsa jlinirri Manase icayosho. Amón iino maaficalri narso njaji njenapjiami jlinirri Manase inaitjaji, lriaca narso matsiadalri. ²³ Corrin kjena cantja lrianjiacacawa Dio ipeyajle, cayoji jlinirri Manase inaitja capisho pia. Icaamitsa Amón inaitja minintsa aima pja maatsirri. ²⁴ Njaji lrirsoperri nawaopia maatsi lrikjoete njite njatsa iinoni lriipana lricotsa. ²⁵ Mitsa njaji lrinaikite naino pjiomi njaji inaiki iwaopialri pia maatsitsa talricanaati Amón ikjoete, njite nacadaa lrirri Josia nakja natalricanawa jliapodam.