¹ Jliapodamjite njaji wacapalrina pjiomi, coanca corrica namaca Dio, Senaquerib, Asiria italricanaa, lrino lriewawa Judá jipaitena lrico lrinoacá-carro nakjoete njaji yacaalre taimí perri ima lrioma pia jlipaca lrirsowaona. ² Ezequia icapa cádanaco Senaquerib ínoca lrinoacá-carro Jerosalén ikjoete, ³ niini lritatja jlimiwa nainai njaji inaiki iapiyawanai njite njaji tsolrodaonai iapiyawanai naitá carro njaji ooni imotocawa jiipai ikjoite pemajle perri yacaalre irso; niini nakitsindatani nadejícarro. ⁴ Aima inaiki nadejí-carro njite naita pjiomi ooni imotocawa njite oonipaokja jiwidapa tsakja namotolri njiteo njaji onipaokja iamarralriwa njepaite ipamoyoaca lrico, ima naaco cayoji: ''Corrí-carroatsa naoketa aima ooni narsowao njaji talricanaatinai inocape Asiria lrikjoite.'' ⁵ Ezequia ikjaidataca piawa niini jlirreta tsenakja yacaalre idana napeecolri pia jiwao. Lrinaitja njaji yenondalripe nawapacawa nacapa nakjoite, njite njaji paana yacaalre idana pemajle perri tsakja. Lrinaitja tsakja taimi Milo idana David iyacalre rico, lrinaitja tsakja aima nainoaca shopawa njite nadanaita tsakja. ⁶ Ezequia icadaa tsakja tsolrodaonai icomandantenaipe iwapacaope njaji inaiki. Lriwaketa lriinaiwa pjiomina pafetsa yacaalre ipananoma macapekicawa lricaité-csarro narso iacoti ikjaidatacadana, liaco cayoji: ⁷ ''Ikjaidatacawa, macadatsa ifikjeti shamaca jia. Mjetatsa icaolre ifio capoantja Asiria italricanaa ikjoete aima capoa njaji lri-tsolrodaonai, ima kjaidadalri pjaaca jliaji iemalri wainai naoya njaji iemalri Asiria italricanaa iinai. ⁸ Inaikinaitsa njaji ikitsindatalrini, mitsa jliaji ikitsindatalri faa icatsa jliaji waMinalri, wa-Diotsa, jliá carro inoacawa waikjaote.'' Niini njaji inaiki nacatiimataacawa narsowaaca njemi cádanaco njaji iacoti talricanaati Equia icaiterri narso, Judá italricanaa. ⁹ Njitédalri Senaquerib, Asiria italricanaa, imeenaca lrirsoperri lriwapacawa njite lri-tsolrodaonai iapiya, Laquí icoemjete, naa-carro Jerosalén lricojle, nadee--carro iacoti Judá italricanaa Ezequía irso, cayoji: ¹⁰ ''Cayo lricaiteca jliaji Asiria italricanaa Senaquerib: ''Coca inacoa icadaa icaolre jia Jerosalén lricoperri icapa cadanena no-corrarrataca jia? ¹¹ Lri-cashata catsa jia Jliaji Ezequía lriinó-carro jia maawitacai sho njite meeta capoa tsakja icaolre, lricaite cádanaco irso ''wa-Minalri Dio watsa imanacotaotsa faa Asiria italricanaa ioya.'' ¹² ¿Capja corrica opikena Ezequías ipeeco ioya njaji yenondalripe njite njaji altar, njite lricaite narso njaji Judá lricope, nja tsakja njaji Jerosalén lricope naa-carro matsiadalri Dio irso, njite lrinacotsa itaita imjaitaca Lrirso naaficalri? ¹³ ¿Corritoa ianjíi coanca nonaotjaca, njite coan piaca noferrinaipe inaitjaca njaji inaiki aimadan jalredaoca lricoperri? ¿Capja dadiote itaita pia nadietaca njepaite nocaapi rikjoite narsowao tsenakja? ¹⁴ Nanakjoite njaji dionai jalredaoca lricoperri, noferrinaipemi iwayaketaji, ¿capja niinica apada dio itaitalri pa idietaca lrinaikite nocaapi rikjoite? ¿Coajentja iDiote itaita jitaca jia nocaapi ioya? ¹⁵ Niini, macadats Ezequía icashataca jia cayo, wadentja jiepacani. Mjeepatsani, ima corrin pacapa pada dio pada jiipai nacoda, o pada jiipai talricanaati iwapanda nakjoite itaita imanacota lrinaikite nocaapi ioya, o naoya pia njaji noferrinaipemi. Omamikena jliaji iDiote, corritsa jlitá-carroca jia nocaapi iioya.'' ¹⁶ Njaji Senaquerib irsoperri caaco pjaa tsakjana wa-Minalri Dio ikjoete njite lrirsodalri Ezequia ikjoete tsakja. ¹⁷ Senaquerib idana tsakja paperra lricaacarro wa-Minalri ikjoete, na-Diote njaji Iraelnai, caacocarro matsi lrikjoete. Lriaco cayoji: ''Corricapoa nataita namanacota nanaikite nocaapi rikjoite njaji dionai jalredaoca lricoperri, cayo tsakjaotsa Ezequía iDiote, corrin tsakjaotsa Lritaitá-carroca jlitaca Lrinaikite nocaapi rikjoite.'' ¹⁸ Nawana kjaida naaco lrikjoite njaji judionai iofacape Jerosalén lrico, njaji iofacapewa yacaalre idana ipolrico, nafietá-carrona njite necaa-carrotsa naicao, cayó-carrontja nataita njepaca narsowao jliaji yacaalre. ¹⁹ Caacona na Diote naco njaji Jerosalén lricope cayotsa caaco capisho mana nadiote irso njaji apana inaki, njaji dio nanaitjajitsa nacaapisho naji atsianai. ²⁰ Niini talricanaati Ezequia, njite jliaji Amós irri, inoparrotacaita Isaía, natatja caiwi ricotsa lriinai jliaji Dio eenolricojlé-dalri lrikjaote jliaji maatsirri. ²¹ Njite wa-Minalri imeenaca Lrianjele, niini lriinoca njaji atsianai kjaidaperri inoacacawa, lriino tsakja njaji comandantenai, njaji capitamanai talricanaati irsoperri nawacaaca cawa lrico. Njite Senaquerib idiacawa jlipaite ricojle ipaimanti rico. Niini jliewa cádanaco lridiote iipana lrico, pada nanakjoitetsa njaji lrienipenaipe nainoni matseta sho. ²² Cayotsa wa-Minalri imanacota piaca Ezequia njite njaji inaiki Jerosalén lricoperri Senaquerib ioya, Asiria italricanaa, naoya tsakja njaji apana inaiki, Njite Dio icadaa nawafetá-carro pjiomi ioya. ²³ Aima inaiki ideeca ofrenda Dio irso Jerosalén lricojle, nadee tsakja regalo matsiaperri Judá italricanaa Ezequia irso. Cayotsakja najica lrinaco pjiomi njaji inaiki jalredaoca lricoperri jliadaa nakjoite. ²⁴ Jliawajli pia caifia Ezequías, wadeepe mayamican. Niini lritatjaca Dio iinai, njite Dio jimi lrirso, njite Lricaite lrirso pada itjinatisho Lrimatsietacaotsani lrirenaa ioya. ²⁵ Mitsa corrin ezequia iaa matsiadalri Dio irso lrikitsindata capoani, ima ipadalrekjeti ipakjantaca Ezequia icaolre rico. Niini Dio iirroa inoca lrinaco njite nanaco njaji Judá lricope njite nanaco njaji Jerosalén lricoperri. ²⁶ Mitsa, Ezequía idia iwaopia kjenaadalricatsani Dio ipeyajle lripadalreca ima lricaolre ricoda, coshoca jlia njite njaji inaiki Jerosalén lricoperri, niini corrin Dio iirroa jiwacatoa nanaco Caafi cadanacotoa Ezequia. ²⁷ Ezequia irsopia Aima cacoadaperri, aima nacaite lrinaco matsia. Lrinaitja lrirsowao lrimatsieta-carroda palrata, owirro, jiipada cacoadaperri, lrinaitja tsakja lrimatsieta carrodao pomeniajaipe, lrimatsieta carroda tsakja nadanaita oowi rico njite pjiomi njaji inaaniti cacoadaperri. ²⁸ Lrirso pia tsakja lrimatsieta carrodao napania iinaca, comaana, jaico tjeda ianaa, aceite tsakja. Lrinaitja tsakja nemaa carrodao nja pirraiti coanperri catsa. Lrinaitja tsakja corrarra lritaoña cawa maaficalri. ²⁹ Lrinaitja tsakja lrirsowawa yacaalre njite aima lrirsopiaca maaficalri lriyapewa catsa, ima aimaca Dio icadaa lrirsowawa lrinaaniwa cacoadaperri. ³⁰ Jliaminitsa Ezequia-ca, jliaji idaanatlri pia jliaji ooni imotocawa Gihón dalri, njite lrideeni jeerri jiewa kemajle lridee-carroni mayacan David iyacalre ricojle. Matsia namotoca Ezequia irso pjiomi njaji lridejirri. ³¹ Mitsa nanaco njaji caconaaperri talricanaati imeenacaji Babilonia iipitana naco, inocaperri itatja jimio nanaco njaji manaitja canaperri lricapalri jlipaite rico, Dio icadajitsa lrirso cayó-carro lriwí shopa, lricapá carrotsa cocaca njaji lrirsolri lricaolre rico. ³² jaji paana ezequía inacoapanaperri, coanca lrinaitjaca corricapoa lrioma lri-matadaca coanca lricaiteca jliaji iacoti Dio inaitjalri pia naapiya, itaita icapacani lridananda lrico jliaji inoparrotacaita Isaía, Amós irri, njite lrinaco jliaji paperra nanacoapanaperri njaji talricanaatinai Judá lricope njite Iraelnai. ³³ Mayami Ezequia lriferrinaipe iinai, njite njaji inaiki Judá lricope njite Iraelnai nadawani nadawacawa njaji caconaperri David inakjoiterritsa. Pjiomi Judánai njite njaji Jerosalén lricope nanaitja matsia lrirso jliaji mayamdalrimitsa Ezequia. Njite lrirri Manases italricanaataca jliapodam.