¹ Ikena Salomón iniita kena inaitjaca Dio iipanao Jerosalén lrico, Awacada Moriah lrico, anji Dio icañjatacalriwa jlinirri David irso. Lrimatsieta jliaji jiipai David iwaopialri pia inaco lricaona, Ormán jebusita imeyatacawa pia napania iinaca. ² Lriniita lridenjica yamadaa naco jalredaoca, yaamapi keerri naco, coatro walria lritalricanaaca naco. ³ Icatsa Salomón icatjinatalrica, nawi canje njaji pamjenai toa jlipocoa jliaji panti. Ventisiete metro jliwalripaca, nueve metro lrimacaiteca. ⁴ Njite jliaji pjewacawao lrirso jliaji panti macade lrirsopiaca nueve metro jliwalripaca, cayotsa lrimacaiteca shotsa jliaji panti, njite Salomón inaa naijetaca nanaco owirro matsiadalri sho. ⁵ Lrinaa naitaca jliaji panti iwawalrico njewa cawa pjiomi jaico cipre sho, njite lrinaa naijetaca nanaco owirro matsiadalri sho, njite lrinaa nadanaca nanaco macapje jinaapjia njite cadena jinapjia tsakja. ⁶ Lrinaa nanaitjaca lrimatsiacawa jliaji panti jiipada cacoadaperri matsiaperri sho; jliaji owirro nainjetalri niini jliwacatsa owirro nadenda Parvaín lrikjoite. ⁷ Lrinaa naitaca njaji coajai, njaji cocolriede, lriwai, njite nja pantinoma owirro sho; nerroeta tsakja aima querobin jinapjia lriwai naco. ⁸ Lrinaa tsakja nanaitjaca jliaji patawajle Dio icapacawa lrico. Njite pacoacatsa lrimacadalrica lri cayoshotsa jliaji panti, ventisiete metro jliwalripaca, nueve metro lrimacaiteca. Lrinaa naitacani owirro matsiadalri sho, wadeepe vente mil kilo owirro sho. ⁹ Njaji tapoa, narsopiaca pamoyoa kilo njamiñaca apjewitsa. Lrinaa tsakja nadaataca panti iwawalrico iicao owirro matsiadalri sho. ¹⁰ Lrinaa nanaitjaca yaamana Querobin jinaana lricaona jliaji panti tawajle mamatsicana cawatsa. Njaji cayeca peri inaitjalrina nadata nanaco owirro matsiadalripe sho. ¹¹ Napje njaji querobinai yaamanape narsoca nueve metro njawalripaca padeenirri; niini apana querobin ipje lrirsopiaca yamaita metro njite paita pja pacaapi lrinacojle, lritoda pema lriwai nakjoite neemalri niini, njite caitsakja pema lripje cayo minitsa jliwalripaca lri todalri isho lripje nacojle jliaji aapana querobin. ¹² Jliaji apana querobin lrirso pia tsakja yamaita metro jliwalripaca njite paita pacaapi lrinacojle, lritoda pema lriwai nakjoite neemalri niini; pema lripje cayo minitsa jliwalripaca, lrinotalri isho lripje pema jliaji apana querorin. ¹³ Niinina nueve metroca njawalripaca napje njaji querobinai padeenirri. Nacadaa nemawa njaji querobinai, njite nacapaca lri pamoyoaca nacojle jliaji panti iwawalrico neemalri niini. ¹⁴ Lrinaa néñaca pamaca yamacatiita pjirrintsida jipolredalri sho, amolredalri sho, irraidalri sho tsakja, njite jerriwai matsiadalri sho tsakja. Lrinaa tsakja nadanaca lrinaco queroninaijinapjiam. ¹⁵ Lrinaa tsakja neemetaca yaamana pantipje lricoemjete jliaji panti irsocape diecisiete metro njite pamoyoa pja paita irso nayenonca; njite nanaitja na tsapewaniwa irsocape yamaita metro njite paita pacaapi njawalripaca. ¹⁶ Lrinaa tsakja nanaitjaca cadeena naicaona njaji pantipje, njite lrinaa cadaacana napamoyoaca naco njaji pantipje; Salomón inaa tsakja nanaitjaca cien coyadape nacadaa carro nerroa nanaco njaji cadena. ¹⁷ Lricadaa nemao njaji pantipje lricoemjete jliaji panti macade, apana iemawa atsia jliemajle njite apana inarroemajle. Lricadaa lriipitanao jliaji atsiejlema dalri Jaquín. njite jliaji inarroema dalri Boaz.