¹ Acaz irsopiakena vente walria lriniita cádanaco lritalricanaataca, diecisei walria lritalricanaataca Jerosalén lrico. Corrin lrinaitja matsia Dio ipeyajle cayoji lriferrimi David icaite capisho. ² Icaamitsa lrinaitjaca nanaitja capisho njaji talricanaatinai Irael lricoperri; jlinaitja Baalnai jinapjiami tsipalrape sho. ³ Lrimjaita incienso jiipai ioyawaaca Ben Himon, njite lrimjaita njaji lrienipe tiyee rico; lrinaitja cayoji nanaitja capisho njaji inaiki iacape matsiadalri idolonai irso njaji Dio ipeecolri njepaite ioya maatsicalri rico njepaite ioya napeyajle naji inaiki aimadan Irale lricoperri. ⁴ Lrimjaita maaficalri , njite lrimjaita incienso nanaco njaji yenondalripe, nápolrico naco njaji jiipana, jaico macanipe, caafiperri iapjite. ⁵ Niini jliaji wa Minalri, Acaz iDiote, lricadaana Aram italricanaa icaapi ricona. Njaji aremonai jiamana njite lridee njite aima inaiki preso-carrona Damasco lrico. Lricadaa tsakja Aram italricanaa icaapi rico jliaji Irael italricanaa, ima Aram italricanaa jiamacani oowi rico, lrino lrioya aima lrirsoperri. ⁶ Ima Peka, Remalia irri, lriino pia Judá lrico ciento vente mil tsolrodaonai padaa nacotsa, atsianai kjaidaperri pjiomi; nainonaa namaca capoa na-Minalri, naferrinaipemi iDioete. ⁷ Njite Zicri, ape atsia kjaidete Efraín poco nakjoite dalri, lriinoca Maasia, talricanaati Azricam irri, pada tsolrodao caconaite iwapacada talricanaati dapana, lriino tsakja Elcana, jliaji idenjicada talricanaati icodapi. ⁸ Nanakjoite njaji lrikitsiñape Judá lricope, njaji iraelitanai nadeeca naninaipemi, neenipe atsianai njite inaitjepe dociento mil namaimaca padeenirri. Nadee tsakja aima nanaanipem, nadieta tsenakja Samaria lricojlena. ⁹ Mitsa, niini pia tsakja nainai pada wa-Minalri iprofetani, Obed lriipitana. Lrimoto lricoadata njaji tsolrodaonai nadia cadanaco naocawa Samaria lricojle. Lriaco narso cayoji: ''Kerroa capoa Judá iinai jliaji i-Minalri, naDiote njaji iferrinaipemi, Dio icadaa icaapi ricona. Mitsa oopica iinona aima calretsa keroa capoa jia pekirritsa nakjoete niini jliaji inaitjalri narso lriocacawa eenolricojle. ¹⁰ Njite panaya ioma jipaca irsowao njaji atsianai njite njaji inaitjepe Judá lricope njite Jerosalén lricoperri icadaa-carrona irsoperri-carrona. ¿Capja mamatsicanaperrica jia i-Minalri Dio ipeyajle? ¹¹ Jimi norso panaya, jiepaotsa jliaji nocaiterri irso: Icadaa nadiawa njaji ikitsiñape ideji presó-carrona, ima kerroaca jliaji wa-Minalri ikjoete.'' ¹² Niini padapena caconaperri nanakjoite njaji Efraín poco: Azaria, Johanan irri, Berequia, Mesilemot irri, Ezequiel, Salum irri njite Amasia,Hadlai irri neema nakjoete njaji idiacapewa oowi rikjoite. ¹³ Naaco narso: ''Corrin itaita ideeca njaji presonai ajerreji, ima inaitjaca pada ideecada imatsicanaati Dio ikjoete, nashoenantja wamaimata pjaa wamatsicanaa wamatadaji naco, ima aimaca njaji wamatadalri, niini aima irroati Irael ikjoete.'' ¹⁴ Niini iaamitsa, njaji tsolrodaonai namaca njaji presonai, nanaanipemi napeyajle njaji caconaaperri njite njaji iwacaacalriwa pjiomi. ¹⁵ Njite njaji atsianai nawanaji neepitana naco, icaamitsa njenicocawa, njepa njaji presonai neetá-carro natsayaniwa njaji matsayanperri nanakjoite nashotsa njaji nanaanipem nadenipe naoya. Naa narso natsayaniwa, natspatoniwa; naa tsakja narso naijao, nairrao tsakja. Njaji cayaoniperrimi, natape naoya nayaoni, njite njaji mjaidaperri minatsa nacadaa borro nacó. Pjiomi njaji nadieta tsenakjana nakitsiñape ikjaolre, Jericó lricojle (Yacalre nanjinda Yaawacoa). Njité dalri nadiawa Samaria lricojle. ¹⁶ Jliawajli pia jliaji talricanaati Acaz imeenaca inaiki ideecaperri iacoti narso njaji talricanaatinai Asiria lricope nakitsindatá-carroni. ¹⁷ Ima njaji Edóm lricope nano pia nainoacawa Judá ikjoete, njite nadee presonai njite. ¹⁸ Njite njaji filisteonai nano tsakja njaji inaiki iofacapewa tomoitacawa lrico jiipai, njite Neguev lrico tsakja Judá lrico. Njepa narsowao njaji yacaalre Bet Semes, Ajalón, Gederot, njite Soco tsakja; njite njepa pjiomi njaji yacalrwape njepaite ricope, Timna nayacalrewape iapiya, Gimzo njite nayacalrewape iapiya. Oopi naa naofaa naaoya nirse njaji inaiki. ¹⁹ Oopi WaMinalri ikjenataca njaji Judánai Acaz ikjaote, Irael italricanaa, ima lrinaitjaca aima maatsiperri narso njaji Judá lricoperri Dio ikjoete. ²⁰ Jliaji Asiria italricanaa, Tilgat Pilneser, iáa icapa lriderse, corritsantja lrikitsindatá carroni icaamitsa lrima-carro lricapaca. ²¹ Ikena, Acaz jipaca nja palraata njite njaji owirro lrioketaji Dio iipana lrico njite nanakjoite njaji inaaniti dape cacoadaperri talricanaati dapana lricope, lria carrona narso njaji talricanaatinai Asiria lricope. Mitsa corrin lrimotoca matsia lrirso jliaji talricanaati Acaz ²² Njite jliamitsa jliaji talricanaati Acaz lrinaitja minitsa maatsiperri Dio ikjoete njetrapita cadaana toa. ²³ Lrino maaficalri nadiote irso njaji Damasco lricope, nadiote njaji jiameta capepiana, ima lricaite cayoji: ''Nadiote njaji Aram italricanaa lricoperri nakitsindatani, niini noino caotsa narso maaficalri, nakitsindatá-carro njoa tsakja.'' Mitsa icaamitsa lrideeca lrirsowao maatsidalri lrinaco njite nanaco njaji Iraelnai. ²⁴ Acaz iwaketa pjiomi njaji Dio iipana lricope njite lricadowa pjiomina. Lriita jliaji Dio ipananoma njite lrinaitja lrirsowao altar lritonjiwi icoam yacaalre Jerosalén lrico. ²⁵ Judá lrico, yacaalre icoami, lrinaitja yenondalripe namjaitá-carro maaficalri nanaco narso njaji apana dionai. Icatsa lrikerroataca lrirsowao jliaji na-Minalri, lriferrinaipemi iDiote. ²⁶ Njaji Acaz inaitjaji inacoapanaperri, pjiomi njaji lrinitaji lrinaitjaca njite njaji piketemperri, paoketacana lri-ricoda jliaji paperra nadanacawa Judá njite Iraelnai italricanaa inacoapanaaperri naco. ²⁷ Mayami Acaz nacayoshotsa njaji lriferrinaipemi, nadawani yacaalre rico, mitsa corrin nadawacani nadawa cawa lrico njaji talricanaatinai Irael lricoperrim. Lrirri Ezequías nakja italricanaataca jliapodam.