¹ Pakujinae tomara pia jiwi tane Moisés apo pe runae jawatsika epijiyo unutsuto jawetsika, pamonaeje ponalia Aarón jawabelia y jumaitsi: "Najatsia, panetó itsimüre peponü pata wajünayabelia najetarukaejitsia. Tsipaji ponüje Moisés, pa pebi naka jurena Egipto ira werena, apo nayapüta jjua itsitsi bajara ponü. ² Nejjata Aarón jumaitsi: "Pa mujju jonare oro jawanü petiriawi, pane jji y panejünatoyonü pena namujüjjatabi jawanü, panetó kaponaremena." ³ Dajjita jiwi oro jawanü penamujjujjatabi jawanü namujjujona Aarón jawaberena kaponarena. ⁴ Bajara ponü kaetuata pamonaeje piaja oro jawa, tajuita epata bajara pora peejana bakayo pejume kuenia. Nejjata tomara piajiwi jumaitsi: "Israel, ma rabaje nija diosoje pa peka jutsinü Egipto nakua jawerena." ⁵ Pakujinae Aarón tane jjuaje, nakueneba altar peejana baka mujjuneneta jjuaje; bajara ponü jumaitsije: "Merawia to nakaetuatsinatsi jawa barüya nejja DIOSONÜ Yabara". ⁶ Itsa matakabi jawabelila tomara pia jiwi bajayakunua nonobapuna y to kapata peto tajuitsi nejja y kapata pejjania kuenia pe jinawanapae ejjanae nejjatsi. Nejjata nakaetuata pe jjae nejja y pe apae nejja, bajara jjua kujinae yawajiba najamatabütae nejewa. ⁷ Nejjata DIOSONÜ tsipaeba Moisés jawabelia: "Be epijiyo rekamüre, tsipaji nija tomara, ne jutsitsi Egipto nakua jawerena, pebisia kuene ejjana. ⁸ Epijiyo nakofunüta jjua itorobajü. Nato ejjana baka peejananü kuene to tajuita y barüyatane. Jumaitsi: "Israel, ma raje nija diosoje pa peka jutsinü Egipto nakua jawerena." ⁹ Nejjata DIOSONÜ jumaitsi Moisés jawabelia: Taniji pa tomaraje. Taema, na tsita ayai pa tomaraje. ¹⁰ Aekonojjae, pütsa biojibi ra nejamü. Ta anaepanae jawa tsijopaenatsi ayai kuenia pamonaeje, weretajjubianajü. Nejjata jjamüta ayai nakua jjaneto itsinü tsane." ¹¹ Itsiata Moisés jaita DIOSONÜ piaja Dioso pe najamatabü kuene kopatsi jawa. Jumaitsi: "DIOSONÜ" ¿De jjuitsia bitso bara anaepaname nija tomara jawabelia, ne jutsiwi Egipto nakua jawabere ne saüta y nekobe jumepeta saya? ¹² ¿Tsipaji Egipciowi jumaitsi tsipa: "Bajara ponü juta pebisikuene pesiwa najamatabü jjainaejjae, unuta pe beyejebi nejja y pa irataje pe beyejebi nejja? Najamatabü kanawiare y najamatabü kuene kopare pebisia kuene ne itsi jawa nija tomara jawabelia. ¹³ Najamatabüna pire Abraham, Isaac yajawa Israel, nija pieniwi, pamonae jawabelia to najume rutame y jumaitsimü: Itsinü tsane nija monae pakuenia tuluputonü itabojjotatsia, rajutsianajü nejji dajjita pa iraje jjua katsipaebatsi. Pamonaeje piajawa tsane dajjita matakabianü jawabelia." ¹⁴ Nejjata DIOSONÜ nakobe kopata jjua pe jumaitsi jawa pe itsi nejja piaja tomara. ¹⁵ Nejjata Moisés napünüyorota y runaika unu wetsika, pe kobeta kanajetaruka anija pabeje jjua pe jume kowünütsi nejja. Bajara pa pabeje anija yenepana weliabeje yakinaruta, pe itabara welia y pepünüwerena. ¹⁶ Bajara pa pabaje Dioso piaja kuata penakuenebi jawa, pa itane Dioso piaja kuata yakinaruta, bajara jota ruta. ¹⁷ Pakujinae Josué pe ajume yai jawa jumetane tomara pe wawajai jawa, Moisés jawabelia jumaitsi: "Ajumeyaireka bitso kowü saya nabia waja tajjunae jotareka." ¹⁸ Baitsi jane Moisés jumaitsi: "Apo pe amoneyabi jume raja o pe aitejepaebi jume, kaejawa saya pe najjuanaejawa jumetaniji." ¹⁹ Pakujinae Moisés imojjoyota piaja tajjunae, tane baka peejananü y tomara piajiwi yawajibanubena pijinia. Bajara ponü bitso anaepana. Bijjana jjuaba bajara pa pabeje pekobewekua y tojjobiaba petsuto unu pe bakata. ²⁰ Pita baka peejananü pe itsinü tomara piajiwi, tajuitaba, kakiata pepürü ejjana, meniabelia kayajabiaba. Nejjata apaya ejjana bajara pora Israel pia jiwi jawabelia. ²¹ Bajara jjua kujinae Moisés yanijoba Aarón jawabelia: "¿De jjua ka itsi pa tomaraje, netsijjuabi nejja pebisi kuene pamonae jawabeliaje?" ²² Aarón jume pita: "Pütsa bitso anaepaname, tajamonaenü. JJamü yapütaneme pa tomaraje, najume tane pe bisiakuene pe itsi nejja. ²³ Pamonaeje ne jumaitsi: Paneto itsimüre dioso pa wajünaya pe najetarukae nejja. Moisés rabaja, pa pebi pane jurena Egipto nakua jawerena, apo na yapütae jjua kuene itsitsi bajara ponü. ²⁴ Nejjata jumaitsinü, dajjita pamonae jjaina oro ne rajutsiana. Pamonaeje ne rajuta oro jjanü tajuitajü, ta itsi nejja peejana bakayo." ²⁵ Moisés tane tomara piajiwi itajjutejema pe kujinarutsi jawa (Aarón apo pe itawetsijjae, pekuayawi pamonaeje bara kuikuijaitsi). ²⁶ Nejjata Moisés nukojopa imojjoyo tajjunae jawata y jumaitsi: "Dajjita pajiwiyo DIOSONÜ jume jjaniajai tane, jjanü jawaberena ponae." Nejjata dajjita Lewitawi pe mujjuniaberena nakaetuata. ²⁷ Nejjata bajara ponü jumaitsi: "DIOSONÜ, Israel piaja Dioso, jjua jumaitsije: Kaenü kanakujitsia piaja espadata pitsiana y jone najetarukaena dajjita tajjunaejawa, bajara jjuata beyajjuabiana piaja monaenü, pe yajawa ponaponaejiwi, y pemujjuneneta pe ponaponaewi yajawa. ²⁸ Lewitawi itsi pakuenia Moisés pe itorobatsi: Bajara pa matakabi tüpameta tres mil (3000) pa jiwi beje.

²⁹ Nejjata Moisés jumaitsi Lewitawi jawabelia: "Pajjamü rabaja aneja paka itapeta DIOSONÜ pa piaja pianiwi nejja, tsipaji pa jume kowünütame pa beyejebame panejji y pane yapijiwi, bajarajjua yabara DIOSONÜ pejjania kuene paka rajutsiana ajena." ³⁰ Itsa matakabi Moisés jumaitsi tomara jawabelia: "Pajjamü bitso pebisia kuene pa ejjaname. Aekonojjae DIOSONÜ jawabetsia junaeniajü. Belia totajuitijitsianü apo pane jumekowünütsijjae pane itsijjae pebisiakuene." ³¹ Moisés tsia DIOSONÜ jawabetsia y jumaitsi: "Pa tomaraje pebisia kuene ejjana nakueneba oronü. ³² Aekonojjae, itajjuto bijiabia taema; nejjata itsa apo itsimü, ne wünü ikibare bajjuto jawere yakiname." ³³ DIOSONÜ jume pita Moisés jawabelia: "Dajjita pa jiwi pebisiakuene ne itsi, bajara pa jiwi nawünü ikibiana taja bajjuto jawerena. ³⁴ Aekonojjae nejjata rekamüre, matakaponare taja tomara pa nakuayabelia katsipaebatsi. Taema, taja angelenü newajünaya namatajjaina najetarukaena. Baitsi jane pa matakabi bijiobia ejjanaenajü, bijiobia ejjanaenajü apo tane jume kowünütsijjae." ³⁵ Nejjata DIOSONÜ tomara tsi itoroba domae tsipaji peejana bakayo itsi tsanutsi, Aarón pe nakuenebinü.