¹ Nejjata, Lewí piaja wirianü ukua lewi piaja jiwitowa jawabelia. ² Nakojjita powaje itajüta pebinüyo. Pakujinae powaje tane penakuetoyo pe akuenesaü tsekae kuene, matayata akueyabi pa juemeto beje. ³ Pa kujinae baja akuenebi pe matayatsi jawa bebeliyo, bajara powa pe jerayo papiro naeta ejjana jjaniawaetsia mawita katsana. Ajarajjua kujinae bajara powa pewajjinüyo buateta be jerayota pona jawanü tutujuta mene itapata. ⁴ Tajüyo pe matapijiwa naitajjuto kaeweta nuka pe taenejja jjua itsijitsiatsi bajara ponüyo. ⁵ Faraón pe jjünatoyo menia belia nawayojo palia piaja piani wanü pijinia mene itapa jawa nubena najebaya. Bajara powa tane kanasta jawa ünübo jawalia piajiwi jawabelia itoroba petó pitsi nejjatsi. ⁶ Pakujinae bajara powa matapata jjuaba, penakuetoyo tayabuata. Tane pe nuenukekae jawa. Bajara powa itajjuto bijiabi tane y jumaitsi: "Pa nakuetoyoje pejjünatonüyo Hebreo monaeje." ⁷ Bajara jjua kujinae pe matapijiwa jumaitsi pe jjünatoyo jawabelia Faraón: "¿Kato jaitsipaliatsi jjanü Hebreawa pekató ewetsiwa nejja penakuetonüyo jjamü nejja?" ⁸ Faraón pejjünato jumaitsi bajara powa jawabelia: "Ponatabare". Nejjata bajara powayo lía y jaita ajara panakuetoyo pena. ⁹ Faraón pejjünatoyo jumaitsi penakuetoyo pena jawabelia: "Panakuetoyo pire netó ewetsianame, jjanü kamatamotsianatsi," Nejjata bajara powa pita penakuetoyo y to eweta. ¹⁰ Pakujinae penakueto witsaba, bajara powa Faraón pejjünatoyo jawabelia to kalia bajara ponüyo naejjana pejjünatonüyo. Bajara powa wünüruba Moisés y jumaisti: "Tsipaji jutajü mera jawata:" ¹¹ Pakujinae pe kunua nübaja Moises, piaja jiwi jawabelia pona tane pe ayai kueneta penakuenebi jawa. Bajara ponü tane Egipcionü pe konibabe jawa hebreonü, piaja tomara yajawününü. ¹² Bajara ponü dajjita jawa naükobata ruta, pakujinae tane kae jiwi ata apo pe tae jawatsi, beyajjuaba egipcionü jawabelia matayata buaba tajeta majjuta. ¹³ Bajara ponü itsa matakabi jawabelia lia, tane, hebreonü beje penabejawa. Bajara ponü jumaitsi pe matapitsi jawabelia. "¿De jjuitsia biame nija monaenü"? ¹⁴ Bajara ponü jumaitsi: "¿De patsa ka nota patane itorobi nejjamü? ¿Pane jamatabü beyajjuabame tsaja pakuenia egipcionü beyajjuabame? Nejjata Moisés nabenajaka y jumaitsi: "Ta itsi jawa metabaja itsa monae yapütane:" ¹⁵ Pakujinaeta jjua jumetane faraón, bajara ponü Moisés jawabelia beyajjua bijitsia. Baitsi jane Moisés kobejjae najeta bijirewa faraón Madián irata nakopata. Bajara jota mera mütjü mujjuneneta ekojopa. ¹⁶ Nejjata, Madián piaja sacerdotenü siete (7) powa beje pejjünatoyonü jjaina: Bajara powanü ponarena, mera jukaina, wünüba merata pajja piaja nüjjü bitsaüto nejja. ¹⁷ Itsa monae petabü yorota wanapaewi pijinia piaja kaponaejetsiatsi, baitsi jane Moisés yawenonojopalia. Bajara jjua kujinae bajara ponü mera to epaka piaja nüjji nejja. ¹⁸ Pakujinae bajara powanü pajja Reuel jawabelia palia, bajara ponü jumaitsi: "¿De pa itsimü panepatsi nejja bo yaberena epijiyo?" ¹⁹ Bajara powanü jumaitsi, "Egipcionü pane ya matamota tabuyorota wanapaewi wekua. Bajara ponü pijinia mera pane juta pa bitsaüto nejjaje. ²⁰ "Bajara ponü jumaitsi pejjünatoyonü jawabelia, "Nejjata; ¿De jota nuka bajara ponü? ¿De jjua yabara saya apo pajunutsimü bajara ponü? Pa junare pena jjae nejja wa jjaita." ²¹ Moisés jejai pe nakopatsi nejja bajara ponü jota, pe rajutsi nejjatsi pejjünatoyo Sefora pe ukue nejja. ²² Bajara powa pejjünato itajüta, Moisés wünüruba Gersón; jumaitsi, "JJanü sajinaya nünü itsa nakua jawata." ²³ Bajaya jebi kujinae, Egipto piaja reinü tüpa. Israelitawi núa bitsó ayai kuenia pe nakuenebia ejjanae jjaetsi. Bajara pamonae núa pe yawenonae nejjatsi, pe wajükae jawa Dioso jumetaeya bitsó pe nakuenebia ejjanae jjaetsi. ²⁴ Pakujinae Dioso jume tane penue jawa, Dioso na jamatabü ná pita jjua na jume tane Abraham, Isaac, Jacob yajawa. ²⁵ Dioso naükota Israelitawi, Bajara ponü jamatabü kuene yapütane.