¹ Pe wünüanü Israel pejji pamonae Jacob pe püta Egipto jawaberena pona, kaenü kanakuijitsia barü piaja monae: ² Rubén, Simeón, Leví, Judá, ³ Isacar, Zabulón, Benjamin, ⁴ Dan, Neftalí , Gad, Aser. ⁵ Dajjitayo Jacob pe püta pe ponaewilia setenta (70) pa jiwi beje. José baja kajena nuka Egiptotalia. ⁶ Nejjata José, dajjita piaja monaewi yajawa kae wai penajua jjainaewi dajjita tüpa. ⁷ Israelitawi pejji tó naitajüba ponatsi, bepijiyo pinija bitsaüto yajawa amajatabü kuene saü ira wünüka pamonaetaje. ⁸ Nejjata itsa reinü tajjujjuaba pe itorobi jawa Egipto, apo peyapütaenü José jawabelia. ⁹ Jumaitsi piaja tomara jawabelia, "Pa taema, israelitawi nakatsu ayai bitsaüto ayainü jjanetonü wajjai matatojjenetsiyo. ¹⁰ Najatsia jane, yapütaya itsitsanetsi, itsajume pamonae ayai bitsaüto tsaponae tsane, itsa nakatsimajjü patsipa, pamonaeje jonejitsipa wajakueyawi jawabelia, waja nakabarünabe nejja yajawa penetejebiana pa ira." ¹¹ Nejjata pamonaeje penakuenebi ejjanae nejja ayaikueneta pe matakaponaenüanü noba. Israelitawi to nakueneba Faraón nejja tomaranü: Pitón yajawa Ramsés. ¹² Baitsi jane bitsó nakuenebia ejjanae atatsi, israelitawi ayai bitsaüto dajjita jawa tsanajetarubenae. Nejjata, Egiopcio piajiwi kujunawa israelitawi jawabelia. ¹³ Egipcio piajiwi ayai kueneta nakuenebia ejjana israelitawi jawabelia. ¹⁴ Pamonae nakuenebia ejjana bitsó tsorobo jawata anatonü pe katsanae nejja, dajjita pa iranü jawa nakuebia ejjanatsi. Dajjita penakuenebi jawa ayai kuene ejjanae ejjanatsi. ¹⁵ Nejjata Egipto piaja reinü barükuikuijai pe yawenonae wanü pe itajütsi nejja hebreawanü jawabelia; itsawa Sifra pewünü, itsawa Puá. ¹⁶ Bajara ponü jumaitsi: "Pajjamü pakujinae payawenonaename pe itajütsi jota hebreawanü, pa taename pakujinae itajü tsiana. Itsa pebinüyo tsane, pa beyajjuabianame; itsa petiriwayo tsane, jema asaütsane." ¹⁷ Baitsi jane pe yawenonabiabi wanü Dioso kujunawa apo jume kuwünatsi pakuenia Egipto piaja reinü itorobatsi; jumaitsi atatsi, kopata pe wajji pe asaüjawa. ¹⁸ Egipto piaja reinü junata powanü yawenonabiaba pe ejjanae nejja bajara powanü jawabelia jumaitsi: "¿De jjuitsia saya pa kopatame pe asaü jawa pebi nakuetojji?" ¹⁹ Bajara powanü nejjata jumaitsi Faraón jawabelia: "Hebrea wanü apo be Egiopcio wanü. Bajara powanü akuenesaü, patsi nejewalia baja itajütabiaba." ²⁰ Dioso yawenona powanü jawabelia. Pa tomara piajiwi ayaibitsaüto naejjana y ajamatabü kuenesaüyai. ²¹ Powanüje Dioso pe yaiyataejjae, to ayai bitsaüto ejjanatsi piaja monae. ²² Faraón itoroba dajjita piajiwi jawabelia. "Pa penetsia remelia dajjita pejana naetajütsi nakuetonü meniabelia, baitsi jane jemá asaü tsane petiriwajji."