¹ Bajara kujinae ira evetsinü rajuta ira evetsiwa Ester Aman pija ira,pe kueyebinüjudiovi.Mardoqueo pija pianunu tsaponaponae ira evtsinü,Ester jumeitsi ira evetsinü jaba beria pija viria monae Mardoqueo nü. ² Reinü piaja anillo pe sallababiabi jawa pita, jjua bajara ponü wekua pita Amán jawabelia, tsikobe ruta Mardoqueo. Ester, Mardoqueo jawabelia rejuta pe ewetsi nejja Amán piaja jawami. ³ Nejjata Ester ikatsia barükuikuijai reinü jawabelia. Pe bakata bokajunua irataenukaya y nua wajüka baja ponü jawabelia pe kopiarutsi nejja jjua pebisiakuene jamatabü itsi Amán Aguaguenü, jjua bajara ponü najamatabü jjaina pe itsi nejja judiowi jawabelia. ⁴ Nejjata reinü piaja wayajai nae yota Ester jawabelia, bajara powa nonotapüna reinü pe itabara nuka. ⁵ Bajara powa jumaitsi: "Itsa ta wajükae jawa tsita jjanepanatsi reinü, itsa nita jjutua katsita bijiobitsi, itsa jjanepana reinü nejja, itsa jamatabü kuene barüyamü tane taetamü, nayakinae nejjata pe itorobi kuene ajibia ejjanaejitsia pa kuyeleta bajjuto yakina Amán, pejjünato Hamedata Agagueonü, pa kuyeleta bajjutonü yakinaruba pe werebiabi nejja judiowi pe jinawanapaewi dajjita reinü piaja ira jawa. ⁶ Tsipaji, ¿De pakuenia jamataejemanü tsipae tsajota taja tomara pia jiwi wereba beyejebatsi? ¿De pakuenia jamataejemanü tsipae ta tae jawa werebabejawatsi taja monae jiwijji?" ⁷ Reinü Asuero jumaitsi Reinawa Ester y Mardoqueo judionü jawabelia: "Rajutajü rabaja Ester jawabelia Amán piaja bo, pamonae rabaja wüsikütarutsika, tsipaji bajara ponü beyejebijitsia judiowi jawabelia. ⁸ Yakinare pe itorobia kuenia judiowi nejja reinü pewünüta na sellabiaba anillo pe sellabiabi jawata reinü. Tsipaji pejjuaba itoroba pe yakinae jawa reinü pe wünüta y pe sellabi jawa reinü piaja anillota akuenebi pe a jume kanawiatsi jawa. ⁹ Bajara jjua kujinae reinü peto yakinabiabi witsi bajara pa matakabi jawalia junatsi, akueyabi pa juemetota, Siván juemeto, veintitrés (23) matakabi. Pe itorobi jumé nayakina dajjita jjua Mardoqueo jumaitsi tsaponae judiowi nejja. To yakina de itobanubenaewi tajü iranütalia, pe itorobiwi y peyawenonaewitsi bajara pa tomarajji jawa India jawata kujinae Etiopía jawabereka ciento veintisiete (127) pa tomarayo beje, kae tomara kanakujitsia to yakina piaja itane, piaja jume yajawa, judiowi piaja itane y piaja jume jawata. ¹⁰ Mardoqueo yakina reinü Asuero pewünüta sellaba pa anillota sellababiaba reinü. Bajara ponü itoroba pe bajjuto jawanü pe kaponaewita liwaisi pe apa ajjayo kaballonüta ponüanü reinü nejja jjainanuba. Reinü piaja pejjania kaballonü. ¹¹ Reinü rajuta judiowi pe jinawanapaewi tomara jawa, pe nakaetuatsi nejja, pe namatamotsi nejja: pe weyebi nejja, pe beyajjuabi nejja y pe werebiabi nejja wajabitsaü ata itajjutejema tomara pia jiwi itsa tsimajju patatsi, pewajji yajawa petiriawi o itsa yakajürabijitsiatsi pe jjainae jawa. ¹² JJuaje pe jumejjaniajae tae nejja dajjita reinü Asuero piaja tomara jawa, trece (13) pa matakabita y doce (12) pa juemetota, Adar juemetota. ¹³ Bajara pa yajawünü bajjuto pe naitsi nejja pejume kowünütsi liwaisi dajjita jiwi itabü nejewa jumaitsi pe jumetae nejja. Judiowi bajara pa matakabi ewetanubena pe nakobewanitsi nejja piaja wajabitsaünüa jawabelia. ¹⁴ Nejjata liwaisi kaponaewi reinü piaja kaballonüta ya kujinajina pe nobinüanü bajara ponü nejja. Pamonaeje be epijiayo pona. Pe najume itorobi bajjuto pijinia yapütaya ejjana reinü piaja bo Susa jawata. ¹⁵ Nejjata Mardoqueo reinü jawelia najjatatapitsapalia be pitsi ese tsu najjatabatsi pe raünae jawa y penioponae jawa, pe namata jjatatsi oro jawa jjaneto pe nasaünae eseto pejjania pana. Susa piaja tomara wawajai peka barüya. ¹⁶ Judiowi bitso barüya, jamatabü kuene saü y yaiyatanetsi. ¹⁷ Kae nakua jawa y kae tomara jawa, tsajota jumetane pa liwaisi pe najume itorobi jawa reinü, barüya judiowi, jjaenajebalia y barüya tsanajebilia. Ayai bitsaütonü bajara pa nakua pia jiwi naejjana judiowi, tsipaji judiowi jawabelia kujunawa pamonaeje.