¹ JJuanü kujinaeje, pakujinae baja Reinü Asuero pe anaepanae jawa bewelia tsaponae, bajaraponü Vasti najamatabü napita y jjua bajara powa itsi. Bajara ponü pijinia najamatabü jjaina pa liwaisi najume itoroba bajarapowa yabara. ² Nejjata pewüjüawi reinü peto nakuenebiwi jumaitsi: "Pe jaitsi nejja pejjania pejanawa kaenüata apo pejaitsiwatsi reinü nejja. ³ Reinü itorobilia piajiwi dajjita piaja irajji jawa piaja nakua jawata, kaetuatijitsia dajjita pejjania pejanawajji harén jota reinü piaja bo Susa jawata. Ya ewetsia ejjanare Hegai. Reinü pia jiwitonü, pe ewetsinü petiriawi y perajutabiabinü pe naitabütsijawanü nejja. ⁴ Pa pejanawa jitsipaename reinü naejjanaena reinawa kuene pekowüta Vasti." JJuaje tsita jjanepanatsi reinüje, bajara pakuenia itsi. ⁵ Judíonü Susa tomarata ponapona pewünü Mardoqueo pejjünato Jair, pejjünato Simei, pejjünato Cis, Benjamin wirianü. ⁶ Bajara ponü Jerusalén jawelia jutatsi itsa jiwi yajawa pekaponae nejjatsi itsa nakua yabelia, bajara pamonae yajawa Jeconias, Judá piaja reinü, ponü Nabucodonosor, Babilonia piaja reinü, kalia. ⁷ Bajara ponü witsata Hadasa, janebaja, Ester, pajjuanü pejjünatoyo, tsipaji bajara powa apo jjaina pajja, pena ata. Penajawa dajjitawatsika peyajjaniwaetsiwa pijinia pejjaniawa. Mardoqueo pejjünatoyo kuenia witsata. ⁸ Pakujinae pe itorobi jawa reinü jume liwaisi paeba, pejanawajji Susa rei piaja bo jawabelia ponalia. Hegai pe ewetsi nejja. Ester pijinia rei piaja bo yabelia kaponaliatsi Hegai pe ewetsi nejjatsi, peyaewetsinü petiriawi. ⁹ Pejanawa kaekuenia pe jjania kuene tanetsi, bajarapowa pijinia pejjania jamatabü kuenewa. Bajara ponü rajuta bajarapowa jawabelia penajjanewaetsi nejja y piaja pejjaejawa. Bajara ponü siete (7) pa pieninü beje rajuta reinü piaja bo piajiwi, tijjilia pejjania tajjunae jawabelia petiriawi piaja bo jawata piaja pianiwi yajawa. ¹⁰ Ester kae jiwi jawabeliata apo tsipaji pa tomara jawerena najetaruka pamonaeta piaja monae, tsipaji Mardoqueo bajara pakuenia itoroba pe jumaitsi yenewa. ¹¹ Kae matakabi kanakujitsia Mardoqueo siwajjaina ponaponabiaba pematononaenü panabo jawa, petiriawi piaja bo mujjuneneta, pe yapütae nejja pakuenia na nuka Ester, de itsijitsia bajara powa. ¹² Pakujinae kae pejanawa kanakujitsia topatajopatsi pelia nejja Reinü Asuero jawabelia, jumekowünüta pe jumaitsi kueniatsi dajjita petiriawi, Kae pejanawa kanakujitsia doce (12) pa juemeto beje najjanewaetsiana pejjaniawa nejja, seis (6) pa juemeto beje mirra janejaira, seis (6) pe tujjudere ekaera y penaitabü jawa nejja.

¹³ Pakujinae pejanawa ponabiaba reinü jawabelia, itajjutejema jawa ata pejitsipae jawa rajutabiabatsi petiriawi piaja bo jawata pe jjainae jawa, pekalia nejja rei piaja bo jawabelia. ¹⁴ Kaniwiyotsia bajara powa renatsabiabi, bajayakunua nawiatabiabalia itsa petiriawi piaja bo jawabelia, pe ewetsi jawata Saazgaz, reinü pia jiwitonü, peto ewetsinü reinü pe barüponaponaewanü. Powa apo lia tsane ikatsia reinü jawabelia itsa bajaraponü pejjania kuene tane bajara powata y jitsipaena pe junatsi jawa ikatsia. ¹⁵ Pakujinae Ester piaja matakabi to patajopatsi (Abihail pejjünatoyo, pajjuanü Mardoqueo, pewitsatsinü bajara powa pejjünatoyo kuenia) pe lia nejja reinü jawabelia, bajara powa itsa kuene jawata apo wajütsi kae jawa jjua Hegai reinü pia jiwitonü, pe ewetsinü pe tiriawi, jumaitsitsi. Ester jamatabü kuene baüyaya ejjana pe taewitsi. ¹⁶ Ester kaponaliatsi Reinü Asuero pe majitsibo jawabelia diez (10) pa jumeto beje kujinae, Tebet juemetota, siete (7) pa wei beje pe itorobanukae jawata reikuenia. ¹⁷ Reinü bitso jitsipa Ester jawabelia dajjita itsa petiriawi mata tojjenetsiyo, bajara powata bitso jamatabü kuene barüya ejjanatsi, dajjita itsa pejanawajji mata tojjenetsiyo, bajara jjuitsia tsimata ruta reinawa penamata jjatatsi jawa y reinawa kuenia itsi Vasti kujinae. ¹⁸ Reinü itsi ejjana pejjaejawa monae dajjita piaja jiwi y piaja pieniwi nejja, "Ester nejja pe naitsi pejjaejawa", bewelia ruta pe kaetuatsi nejja kae tomarajji jawa kanakujitsia. Pijinia rajuta kaenü jjuanü reinü rajutsipa. ¹⁹ Aekonojjae, pakujinae pejanawajji ikatsi kaetuatatsi, Mardoqueo reinü piaja bo baupata eka. ²⁰ Ester abajjü kae jiwi jawabelia ata apo jumaitsi piaja monae yabara o piaja tomara piajiwi, pejumaitsi kuenia Mardoqueo. Bajarapowa jumekowünüta Mardoqueo, pa kuenia itsi tsabiabi bajarapowa pakujinae bajaraponü witsata. ²¹ Bajara pa matakabi, Mardoqueo pe ekae jota reinü piaja bo baupata, Bigtán y Teres, baupa ewetsinü beje, anaepana beje y jaita pe bijianae nejja Reinü Asuero. ²² Pakujinae Mardoqueo yapütane jjua kuene, bajara ponü jumaitsi Reinawa Ester jawabelia, Ester tsipaeba reinü jawabelia Mardoqueo pe wünüta. ²³ Yanijoba jjua pe tsipaebi jawatsi, peyapütaeta pe jjaniajai kuene dajjitanü beje wüsikütarutsi katsi beje. Pamonaeje yakina pa bajjutota rubapona pe itsi jawanü reinü itabünejewa.