¹ Dioso pija bo Filisteovi pija tomarata nuka siete pa juemetobeje. ² Bajarajua kujinae Filisteovi atsatoonü javaabelia petoo wajükaevi javaalia junata pe kanaüjübivi nua; jumaitsi bajarapamonae javaabelia: "¿De pa itsinütsane Dioso pe ekae bota? Panetsipaebare de pakuenia meta patoo kanaviatsianajû pija tomaraabelia." ³ atsatoonü javaabelia petoo wajükaevi pekanaüjübivi nua jumaitsi: "Pajjamü itsa pakanaviatame Israel pija Dioso pija bo, pütsa kobesa pa kanaviatame pane nanekonitsijjae. Bajarajjuakujinae, pajjamü panevi tanejava ajibitsane, tsipaji raja abajjü kaajena pananekonitame." ⁴ Bajarajjuakujinae "bajarapamonae jumaitsi: "¿Itsajjua meta patoo kaponaejitsipajû pataja neekoni yaabara itsa pakanavialiajû Dioso pija bo? Barapamonae jumaitsi: cinco pa tunaltoonü oro java bajarapakuenia cinco pa iri oro nüanü, pakuenia raabaja panenamatakanubenaevi kuenia pa filisteovimü. Padomae kuenia paka tsiyaajopa. ⁵ Neejata. pajjamü tunaltoonü pajumape kataema pakuenia iri ata pajumape kataename tsipaji raja bajarapamonae paka domae ejjana, Israel pija Dioso pejjaniakuene pa rajure. Belia raja domae paka vekua ajibi ejjanaejitsipa, panija ira vekua panija dioso ata ⁶ ¿Itsajjujitsia panija najamatabü atajaaya ejjaname, pakuenia egipciomonae Faraon ata? Pakujinae Israel pija Dioso ayaikuenia domae ejjanatsi; ¿Tsipaji egipciovi apo kopatsi bajaraapatomara bajarapamonae poneka? ⁷ Bajaramaje, pa jjaniavaere peejana kareta anijanübeje bakawabeje pejjitobeje yaajava, apo pejumakütsinütsibeje. Bakawaabeje kareta jawaabelia pa kürebeje, pejjitobeje pijaboyaabelia pakaponare, tajü bajara powaabeje vekua. ⁸ Bajarajjuakujinae Dioso itsajota ekabiaba pa bo pa pire kareta javaatsia pa nutsima. Pejumape kataevi oro javata ata panerajutsinejja panija neekoni yaabara pemujjuneneta peyakarantsi javayoota. Bajarajjua kujinae pa kopare pijakuata pija namutua ponaena. ⁹ Pataema; itsa pona pijanamutua Bet Semes iralia, neejata yapütaenatsi Petujjanenü waja nakaromaebi ejjanaejava. Itsajume, neejata, itsajiviyo apo naka itsakueniabi saya baja domae." ¹⁰ Pebijivi ejjana pakuenia itorobatsi; anijabakabeje waetaba pejjitobeje, kareta javaabelia küta bajarajjuakujinae pejjitobeje pija bota yawüjjatata. ¹¹ Dioso itsajota ekabiaba kareta javatsia nutsia, iri oronü mujuneneta tunalto jumape katejava ata. ¹² Bakabeje rovia liabeje Bet Semes javabelia. Ponabeje rovia apo toketsiatabeje namuto vekua, runarekabeje, pekujua apo pitsibeje pakuenia petsaveno ata apo pitsi. Filisteovi pematakanubenaevi pünapona Bet Semes mujjunene javaalia. ¹³ Bet Semes pijivi trigo siananubena bajaraapapjotuareka. Itsataerüküpa Dioso itsajota ekabiaba tane, neejata barüya. ¹⁴ Bajara pa kareta Josué pija ira javaabelia junua Set Semes tomaraabelia bajarajota nukajopa, itsajota ibojjaneto javata, kareta naejavanü isoto ejjana, Petujjanenü bajara pa bakaabeje to tsakiapa. ¹⁵ Levitamonae karunareka Dioso pe ekae bota tsabiabi iri jumape kataevi orota ata, ayai iboto jumaveereka jeba. Bet Semes pijivi rajuta Dioso javaabelia pe tsakiapae kuenia bajara pamatakabi Petuujjanenü neejja. ¹⁶ Itsatane cinco pematakanubenaevi Filisteovi ma jjuaje, baja pamatakabi Ecron javaabelia naviabalia. ¹⁷ Ma pa tunaltoonüje orojavaanü Filisteovi Petuujjaneü rajuta pija neekoni yaabara.kaejava Asdod yaabara, kaejava Gaza yaabara, kaejava Ascalón yaabara, kaejava Gat yaabara bajarapakuenia kaejava Ecron nejja. ¹⁸ Bajaraapakuenia iri oro nanitoonüjava kae tomara kanakujitsi ya kaüna Filisteovi tomaraanü kae kobe pa penamatakanubenaevi, pakuenia pe nayaa karantsi tomaraanü jivi ata. Ayai ibotojjaneto, itsaveereka bajarapamonae Petuujjanenü pija bo, tsiteka abajjü ma parukaejeebije Josue pijatajjunaeta Bet Semita javata. ¹⁹ Petuujjanenü Bet Semes pijivi avitane ejjana, tsipaji raja bajaraapamonae Dioso pe ekae bota tsabiabi ünü tane. Bajaraaponü tüpaayaba cincuenta mil pajivibeje. Dajjita tomara nua tsipaji Petuujanenü tüpaayaba ayaibütsaüto jivi. ²⁰ Bet Semes pija peebijivi jumaitsi- Jipatsa meta Petuujjanenü pitabaraata nukaejitsipa, Dioso Santonü- Ipatsa to itorobianatsi velia kujinae Dioso pija bo- ´´ ²¹ Bajaraapamonae livaisi paebivinejja itooroba Quiriat Jearim pijivi neejja, ma jumaitsije ´´Filisteovi raabaja Petuujjanenü pija bo kanaviatabaja, pakarunare pakaponaremelia baja.´´