¹ Ana pe nawajütsi javata jumaitsi: "Ta jamatabü ütjüto barüya taja tuujjanenüto. Tane yakarantsinü tane ayaiwa ejjanaenü taja tuujjanenüta. Takuibota taja wajabütsaü torotajU, tsipaji barayanü tane kapanepaenüta. ² Ta tuujjanenü matatsinüa ajibi itsajiviyo pe kuene jjanepanae jiviyo, ajibi itsajiviyo jjamü vekua, ajibi iboto pakuenia waja Dioso. ³ "Apo natsoninaenü bitso, pütsa nekuibo velia neitoya livaisi pitsapa. Tsipaji raja pe tuujjanenü Dioso dajjita peyapütaenü; bajaraa ponü waja kuene naka to taena. ⁴ Pe kuene saiivi peebijivi be bitsabi tsikakaena, pe kuene aiteje paebivi juya asaü ejjanaena. ⁵ Pamonae apo pe janipaevi nakueneba pija pan jitsia; pamonae bitso pijani apo janipae baja biji kajena mavekowa ata (7) Siete pa kojjitobeje jjaina, jüya pa petiriwa ayaibütsaüto pejji jjaina, bitso kuerona. ⁶ Pe tuujjanenü raja pakuene asaiyaba bajaraa pakuene ba tüpaayaba. Bajaraa ponü pe tupae mütüaareka ba karunae ejjana bajaraa pakuenia ba kajuna. ⁷ Pe tuujjanenü pebijiobinü ba ejjana bajaraa ponü riconü ejjana. Bajaraa ponü ba araba, baitsi pijinia ba ayainü ejjana. ⁸ Bajaraa ponü atsa beno veerena pe bijiobinü matakota. Bajaa ponü pe namataavenonaenü ipumana veerena natakota pe eetsinejja principemonaeta yaajava rajuta pija salinai tajjanaeta. Tsipaji raja ira naetartonü pe tuujjanenü pijajava bajaraa pa matatsiveereka nakua eeta. ⁹ Bajaraa ponü tajjü evetsiana pamonae baitsi jane jume kowünütatsi, juya kaajena pe akuenebejevi ajumejibia pitakirijavata jebianatsi, tsipaji itsajiviyo pija kuaya apo saü rakae. ¹⁰ Pamonae apo livaisi jipae pe tujjanenü, bajaraa pamona vi tsapatajjuabianatsi; bajara ponü atjibüveetsika yaamajjüta navekua torotsiana. pe tuujjanenü dajjita ira nakua uataburuutsia nanekonotsi ejjanaena. Bajaraa Ponü pija rey asaüya ejjanaena ayai kuenia ejjanaena pijinia peyeyaeneeejjatsi pe nato tsaatsinü. ¹¹ Pajaraa jjua kujinae, Rana javaabelia Elcana pona, pija boyaabelia. Bajaraa ponüyo pe tuujjanenü to ponapona Elí pe tuujjanü jume livaisi paebünü pitabüta. ¹² Tuya, Elí pejji pe akuene bejevi. Bajaraa pamonae pe tuujjanenü apo yapütae. ¹³ Pakujinae itsajiviyo dajubitsakiapa dajjita tomara kaajenabaja pija kuene jjaina, sacerdotenü pija piaanenü akueyabi pe wonorakaejava ba kobena muka pekobeta baka vi evetanuca pe javijava. ¹⁴ Bajaraa ponü pija tenedorta wajji yavaabelia kaüjjikaeta apo itsakuene, wajjiyo ata javabelia caldera javaabelia ata. jjua dajjita tenedorta kaüka, bajara jjua kanakopata bajjara ponü nejja ma jjuaje ejjanabiabaje Silo javata dajjita Israel pivita bajaraa belia pe ponabiabivi. ¹⁵ Juya, tajuitsi neejava penasiitsijava, peto nakuenebinü sacerdote patabiaba jumeatsi tsabiabi dajabi pe vi tsakiapoenü javaabia "Rajure sacerdotenü pevi pesebinejja; tsipaji raja bajaraa ponü apo pitsi pe setsijjanü nekabe belia, saya baja pe asia vi. ¹⁶ Jivitonü itsajumaitsitsi: "patajuire mamatajjainaya penasitsi, bajaraa jjua kujina pa more jjua paka kaüjüpa bajara jjua kujinae bajaraa ponü jamaitsitsipae: "Jume, ajenakonojjae jjanü ne rajutsianame, itsajume, ayaikueneta kaya küjütsianatsi." ¹⁷ Pa pewüjüava pebijivi ayakuene pija neekoni pe tuujjanenü pitabarata, tsipaji ataajitsibi pe tuujjanenü jua rajuta. ¹⁸ Baitsi jane Samuel, pejewajjinüyo kujina pe tuujjanenü to nakueneba lino nava sacerdotevi pakuenia rajjataba. ¹⁹ Pena kae vai kanakujitsia tsikiri navayo to ejjanabiaba kae vai kana kujitsia to kanajetarukabiaba pakujina pamonabeje junabiabaya dajubi pe tsakiapae nejjabeje Dioso to kae vai kanakujitsia. ²⁰ Elí pajjania kuene rejuta Dioso javaabelia Elcana yabara pijawabeje nejjata jumaitsi: "Pe tujjanenü karajutsi bitso nejji bajara powata, pewajütsijjae bajaraa powa petuujjanü javaabelia." Bajaraa jjua kujinae, bajaraa pamonae naviababiaba pija bo javaabelia. ²¹ Pe tuujjanenü ikatsia itajjutotsoniatane Ana yavenona; ikatsia nejata nakojjita. Bajaraa powa akueyabi pa pebibeje ejjana anija petiriwabeje. Pewajinae yaabelia Samuel Pe tuujjanenü itajjutua vitsabapona. ²² Jjuya, Elí baja bitso perujunü, bajaraa ponü jumetane dajjita jjua pejji ejjana Israel javaabelia, pakuenia petiriavi barü majitabiaba peto nakuenebi waanütsi itsajota nakaetuanabiaba baupata. ²³ Bajaraa ponü jumaitsi pejji javaabelia: "?Itsajjujitsia pa ejjaname bajara jjua?" Tsipaji raja dajjita pamonaeje paka vaja wajunü neekoni paeba pebisia kuene pane ejjanaejava. ²⁴ Jume, tajji; tsipaji raja apo jjanepanae jjua jumetaniji. Pajjamü pamatakoname beje dajjita tomarapijivi. Petuujjanenü apo pe jumeko wünütsinejja. ²⁵ Pajiviyo pebisiakuene ejjana itsa pebi to nanekonita, Dioso nanekonitsi ejjanaenatsi, baitsi jane itsa jivitonü petuujjanenü to nanekonita, ?Ipatsa yaabara kuikuijaitsipaetsi?" Itsipaji petuujjanenü petüpaenejja to ruta. ²⁶ Samuel vitsaba pona petuujjanenü pejjania kuene tametsi jivi ata pejjania kuene tametsi. ²⁷ Nejjata, Dioso pe jume livaisi paebünü pata Elí jumaitsitsi: "Tsiopaji jjanü nijamonae salinaivi pakujinae Egiptota Faraón pe kobeta pa jjaina pija bota? Jjanü tsatajU dajjita Israel viria veerena tane to tajuitabiabineejjamü incienso taja altar javata, ne najjatatsinejja pakuenia taneto tajuitsinejjamü jjanü nejja. ²⁸ Tjanü rajutajU mija salinaevi dajjita tomara pijivi Israel pe tsakiapae ofrenda isotota. ²⁹ Nejjata, ?itsajjuijitsia atsobame taneto tsakipaejava ofrenda yaajava jjua janü wajütajU ta jitsipae tajjunaeta itsajota ponaponajU ?itsajjuijitsia bitso saya jjanü masiitane pejjaniajava jjaenukame jjua taja tomara Israel ne rajuta? ³⁰ Tsipaji petuujjanenü, Israel pija Diosonü, ma jumaitsije: Yeiyataya najume livaisi rajutajU mija bo pakuenia nija Salinaevi jinavanapa jjanü javaaberena dajjita natakabinejja. Baitsi ajenakonojjae petuujjanenü ma jumaitsije: apo ejjanaenütsane ma jjuaje, tsipaji yeiyataniji pajiviyo ne yeiyatane, itsiata bajaraa pamonae tame itoyavi be belia saya taenajU. ³¹ Taema, kae matakabi kanakujitsia kopia patapona, pakujina kayaküjüritsianatsi ne saü ajja ata pesaü ajja pija bo, pe ajibi mejja peruju jiviyo mija bota. ³² Ka bijiobi ejjanaenatsi pa tajjunaeta jjanü ponaponajU. Pikani kajena Israel ta rajutsi nejja, apo jinavanapae tsane perujuvi ajibi tsane nija bota. ³³ Itajjutejema pajiviyo jjanü apo jutsinülia taja altar velia, Jjanü apo tae ejjanaenütsane dajjita matakabijavabelia atane ejjanaenajU. Dajjita pa pebijivi pe naejjanaevitsane nija viriata tüpaena. ³⁴ Bajaraa pa bole taebiabianame nejjinatobeje tsijopaenatsibeje, Ofni Finees beje: bajaraa pajivibeje kae mata kabita tüpaenabeje. ³⁵ Jjanü nato nutsianajU jjanü nejja apo tame jjuabünü sacerdote, bajaraa ponü ejjanaena jjua jjainajU tajamatabü ütjütota tajumalita ata. to nakuene bianajU pe asaü bo; pona ponaena najamatabü rutsiaya jjanü javaberena ta asivanü ira nakua evetsinü dajjita matakabi nejja. ³⁶ Dajjita pajiviyo asaüya nakopa tanukaena nija bota, renatsane pematabakata to nukaena bajaraa ponü pitabarata, nerajure kae palatanü jaitsane pan mujjupa atu yaajave, tanaa nakuenebinejja ne naa rajjure sacerdote kuenia to naa jjaebiabi nejja pan"