¹ Ramataim Zofim pija tomara javata jivitonü ponapona, Efrain tsutoonü tomara javata, bajaraa ponü pewünü Elcana, Jerobam pejjünato, Eliú pejjünato, tohu pejjünato, Zuf pejjünato. ² Bajaraa ponü aniwabeje jjaina; Ana raja pewü pe namatajjainawa, jaya pekotokaeviwa pewünü Penina. Penina pejji jjaina, Ana jaya pejji apo jjainae. ³ Ma ponüje pija tomara veerena renatsabiabi, vai kanakujitsia, pe mata bakabüta petujjanenü wajabütsaü matabotonü to tsakiapaejitsia dajubi Silota. Eli pejjünato beje, Ofni Finees beje, petuujjanenü jume livaisi paebinü beje, bajaraa jota nuka beje. ⁴ Pakujinae to kopia patatsi Elcana dajubi pe tsakiapaenejja Diosoto, pakuenia kae vai kanakujitsia ejjanabiaba, rajutabiaba pevii pijawa nejja Penina wünüwa, dajjita pejji peebijivi petriavi yaajava. ⁵ Itsiata baitsijane bajaraa ponü mataatojjenetsia ayaikuenia pijawa Ana asiva, pija tuujjanenü apo rajutsi atatsi pejji. ⁶ Pekueyewa (Penina) jamatabü itonotabiabatsi pe bijiabi taenejja saya, tsipaji petuujjanenü pejji apo rajutsitsi. ⁷ Nejjata kae vai kanakujitsia, pakujinae bajara powa junabiabaya pe tuujjanenü pija boyaabetsia pija noonae yaajava, pe kueyewa (Penina) jamatabü itonotabiabatsi. Bajaraa jjuajitsia bajaraa powa natsinuebiaba nejjata itsakuene javaya apo nabanibiabi. ⁸ "Ana pamona Elcana wününü jumaitsi tsabiabitsi, ¿Itsajjujitsia nuame? ¿Itsajjujitsia apo nabaninü? ¿Itsajjujitsia bitso nejamatabü ütjüto veerena najamatabüjjainame? ¿Jjanü bitso apo katsita jjanepanaetsi diez (10) pa kojjitobe beje matatsinüa?" ⁹ Be pakanakujitsia, Ana nonotpuma pejjae kujina pe apae kujinae yaajava Silote. Eli Dioso jume livaisi paebinü pija tajjanaeta eeka pe tuujjanenü pija bo baupata. ¹⁰ Bajaraa puwa bitso najamatajjaina, bajaraa powa wajüta pe tuujaneni javaabetsia natsinua bitso ayaikuenia. ¹¹ Bajaraa puwa pe tuujaneni javaabelia yeiyataya najume livaisi rajuta, ma jumatsije: "Wajabütsaü pija tuujanenü, Jjamü itsa ne naikotame tanajamatabü jjainaekuene jjanü taka to ejjanaewa nejitsipaejava jame taneme naa, pütsa nenakopjünütame taka to ejjanaewa ne jitsipaejava, penakuetota neto itajü kato kanaviatsianatsi dajjita matakabi javaabelia nejja, apo namatana tjabi tsane yaajava. ¹² Pe wajütanakae javata pe tuujanenü javaabelia, Elí kuu' taenukatsi. ^{13 14} Ana pejamatabü ütjütota kuikuijai. Saya ü pekuibo kujirukujiruai, itsiata baitsi jane apo jume napebetsi. Neejjata Elí bajaraa powa aitajibi jamatabüjai. Elí jumaitsitsi: ¿Itsa pakujinae aitajibikaevianame? ¡Vinobaja kopare! ¹⁵ Ana nejjata jume piita: "Jumeraja taja tuujjanenü, jjanü raja itsatsakuene pe atanera apo apaenü, saya raja kaajena ta jamatabü ütjütoveerena ayaikuenta wajükajú taja tuujjanenü javaabelia. ¹⁶ Pütsa pebisia kuene ejjanaewa nebaraa jamatabü jamü; bitso kuenia tanajamatabü jjainaejava taneto pitsa paejava pakuenia ne kenetsia uraaba. ¹⁷ Bajaraa jjua kujinae Elí jumepiitatsi jumaitsi nejjata Israel pija Dioso karajutsi jjua wajütame. ¹⁸ Bajara powa jumaitsi: "Neitajjuto tsoniataema jjanü ta bijiobiwa. Bajara jjua kijina bajaraa powa naviata pija mamatua naabane janeebaja; apo itabara najamatabü jjainae. ¹⁹ Bajaraa pomana bajaayakunua naükoba pija tuujjanenü pematabakata to nubena, bajaraa jjua kujinae pija bo javaabelia naviabalia Rama javata. Elcana pijawa Ana borümajita, neejjata pe tuujjanenü jameetame jjua wajütatsi. ²⁰ Bajaayajebi kuinae, Ana nakojjita neejjata peebi nakueto ejjana. Wünüruta Samuel pejumaitsinejja: "Tsipaji pe tuujjanenü javabelia ta wajütsünü". ²¹ Aurujubia, Elcana dajjita pijamonae yaajava, junaya pe tuujjanenü dajubi pe to tsakiapaenejja bajaraa pa vai pijijava pe mataamotsinejja pe najume rajutsijava yeiyataya. ²² Baitsi jane itsiata Ana apo ponae, bajaraa powa jumaitsi pomana javaabelia: "Matapania penakueto mito kopatsiana jjanü naponaenajú; neejjata barüponaenajú, jamateejema pe tuujjanenüta ponaponaejitsia dajjita matakabi javaabelia bajaraa jota ponaponaejitsia". ²³ Elcana bajara powa pomona jumaitsitsi: "Jjua katsita jjanepana ejjanare. Evere mito pe kopatsijavaabelia; Kaejava ruka pe tuujjanenü jjanepanaya pe kato taejava, neejjata bajaraa powa eeka nakojji eveteka mito pe kopatsi javaabelia penakueto. ²⁴ Pakujinae baja bajjaraa powa na mii kopata, barü pona, baka peebito tres (3) pa vaibeje pe jjainaenü yaajava, 22 pa rabeje kuenia (aceite)(metira) kaebü vinora yaajava, pe tuujjanenü pija boyaaberema kapona Silo javaaberena. Abajjü pejjünato bitso penakueto. ²⁵ Bajaraa panonae baka peebito beyajjuaba Elí javaaberena to kaponarenatsi. ²⁶ Bajaraa powa jumaitsi: "¡Oh, taja tuujjanenü! pakuenia asaümü, taja tuujjanenümü, jjanü raja imata pa petiriwa nemujjuneneta nawajükaüka nitabüta pe tuujjanenü javaabetsia. ²⁷ Ponüyo yaabara jjanü wajütajú neejjata pe tuujjanenü ta wajütsijava ne jumetane. ²⁸ JJanü pe tuujjanenü to kanaviatajú: abajjü itsa asaü, abajjü saya pe tuujjanenü tsikopatajú. Nejjata pe tuujjanenü pe matabakata to nuuka bajjara jota.