¹ Canchisë yoqui nanihuachina Israiro saso yahuëpiso ninanonënaquë chachin huëantapi naporo yoquiquë. Yahuëpiquëran hue'sahuatona, quirosarinquë niyontonpi yaipi insairo'sa niyontonpi, coanaya téranta panhuanpihuë. ² Naporo Cosoi itopisosó corto hua'á yaconin, Inaso papin Cosata itopi, saratiro huinin soropapiro itopi inanta corto ha'an yaconin, ina cato hua'anosa iinpitaréchachin, Siñoro chinotacaiso marë' yosë artaronën nipi. Iraca Moisësëso' siñoro íyapinën niton ina camaitërinso chachin masha tepatona oshanënamarë artaro aipi ahuiquitopi. ³ Naporo artaro nicatona noya acochanpi inaquë yahuapisopita tëhuatatona inapochinacopi. Inapoatona nani tasiramiachin, nani ihuaraya Siñoro chinotacaisomarë masha tëpapiso yaipi ahuiquitopi. ⁴ Naporahuaton pënëntërinso quiricaguë camaitërinsochachin, nanitahuëri masharosa tëpatona oshanënamarë yaipi ahuiquitopi. Onposona nani tahuëri ahuiquitacaiso camaitërinso' chachin nipi. ⁵ Naporahuatona, nani tahuëri, nani yoquiahuarai quënta oshanëna'marë ahuiquitopi. nisha nisha Sëñoro marë pita yahuërinquënta inapopi. Inaquëchachin inahuara nohuanton Sëñoro marë masha quëpachira ahuiquitopi. ⁶ Naporo yoqui yanatirinso tahuëriquëran huarë, oshanënamarë masha tepapiso yaipi ahuiquitacaisomarë Caniaritopi. Co Siñoro chinotacaiso pëi nishatëraponaraihuë artoronënso nani noya nipi. ⁷ Inaquëran pëi napirosa, nontë camayorosa inapita pahuërëpi. cosharo, o'ocaiso, toma, inapita tiro piyapiro'sa quëtopi, siton piyapirosanta quetopianta inapitaso nipano motopiquëra nonara ocoyatona', marë quepatomacaiso camaitërinso chachin nipi. ⁸ Soropapiro, cosoi, corto huaanosa, nihuirosa, yaipi huënantapisopita, inapita siñoro chinotacaiso' pëi niantacaiso' cañaritantapi canquintapiquëran huarë, nani cato pii, cato yoqui nisarin Nihuirosa cato shonca nacon piipitopiso, huaanosa pochin sacatoro'sa camaicaiso'marë acopi. ⁹ Yaipi sacato camaitacaiso marë isopita huaanosa yahuëpi: Cosoi corto hua'an Catomiri, Inatato, huininpita, quëmopinënpita , inapitaso nihui huënto israirosarachin. ¹⁰ Siñoro chinotacaiso pëi simintoquëran acoasoi, capa cancantatona, Yosë chinotapi. Corto hua'anosa Siñoro chinotaimarë amopiso', amopi ina amosahuatona huanipiquëran, tronpitarosa pihuirapi.Asahua quëran pipipisopita, nihuiro santa, huana quëran shari, shari'rosa piniatona napopi inapitaso iraca, Tapi Copirno Camaitërinso'chachin nipi. ¹¹ Yosparinquën Siñoro itatona yosë cantanën, cantato'na, siñoroso noya niton chinotahua isra'irosanpoa nosorinpoaso co nitiquiaponhuën topi napoatona capa cancantopi. capa cancantatona, nonca, nonca topi ¡ Manoyacha siñorosa ! ¡ Ina catahurinpoa niton ina chinotacoso pëi simintogueran nani acoarëhua! topi. ¹² Na'a corto hua'anosa, Nihuirosa', ansiaanorosa inapita masha nipisopitaso, iraca yahuërinsonta nipi, niton sëtopi. atahuantopirinahuë inaguëchachachin acoantarapi nicatona, chiniquë nanëpi. nipiringuë nanëpi. nipirinhuë inapitaso nacon, nacon capa cancantatona yai, yai tosapi. ¹³ Napoatona co nantatochina'chinhuë, nonca nonca tatona napopiso pa'pi chiniguën yaconin napopiso aquë yacanpi.