6 ¹ Pikinini man bilong mi, sapos yu putim moni bilong yu arere long givim dinau long wantok bilong yu husait i laikim na yu mekim tok promis long givim dinau moni bilong yu long sampela lain yu no save long en, ² orait yu putim umben long yu yet long tok promis bilong yu na toktok long maus bilong yu yet bai i holim yu. ³ Taim ol i holim yu long toktok bilong yu yet, pikinini man bilong mi, mekim olsem na helpim yu yet. Taim yu pundaun long han bilong ol wantok bilong yu, go daunim yu yet na toktok wantaim ol wantok bilong yu. ⁴ Noken mekim ai bilong yu i slip na i pas. ⁵ Helpim yu yet olsem dia i ranawe long han bilong man bilong painim abus na olsem pisin i ranawe long han bilong man bilong painim pisin. ⁶ Lukluk long anis, yu les man, tingim em i stap olsem wonem na kisim gutpela tingting. ⁷ Em i no gat lida, ofisa or bosman, ⁸ tasol em i save painim kaikai long taim bilong san na long taim kaikai i mau, em i save bungim ol kaikai em bai kaikai long en. ⁹ Hamaspela taim yu bai slip, yu les man? Wonem taim bai yu kirap long slip bilong yu? ¹⁰ ''Liklik slip na slip liklik taim moa, pasim han bilong yu na kisim liklik malolo'' ¹¹ na yu bai stap rabis tru olsem stilman i stilim pinis olgeta samting bilong yu na ol samting yu laikim em bai bagarap olsem ol soldia i bagarapim ol. ¹² Man i no gat gutpela tingting, man bilong mekim pasin nogut i save stap long tok giaman bilong em yet, ¹³ em i save pasim ai bilong em i go liklik, mekim mak long lek bilong em na putim ol pinga long mekim giaman pasin. ¹⁴ Em i save hait na mekim pasin nogut wantaim bel giaman, olgeta taim em i save kirapim hevi. ¹⁵ Olsem na bikpela hevi bai i karamapim em na em bai i no inap kisim helpim bilong em hariap. ¹⁶ I gat 6-pela samting God Yawe i no save laikim tru na 7-pela ol nogut samting em i save les tru long en. ¹⁷ Ai bilong man husait i save hapim em yet, tang bilong giaman, han bilong kilim ol man i no gat asua, ¹⁸ bel i save kamapim ol nogut samting, lek i save ran hariap long mekim pasin nogut, ¹⁹ man bilong tok giaman na man bilong kamapim hevi namel long ol brata. ²⁰ Pikinini man bilong mi, bihainim strongpela tok bilong papa bilong yu na noken givim baksait long ol samting mama bilong yu i lainim yu. ²¹ Olgeta taim yu mas putim long bel bilong yu na pasim long nek bilong yu. ²² Taim yu wokabaut ol bai lukautim yu. Taim yu slip ol bai was long yu na taim yu kirap ol bai skulim yu. ²³ Bilong wonem strongpela tok i olsem lam na skul toktok i olsem lait, tok stia i helpim yu long stap gutpela laip. ²⁴ Em i save banisim yu long meri bilong mekim pasin pamuk na long ol naispela toktok bilong dispela meri. ²⁵ Noken gat strongpela tingting bilong mekim pasin pamuk long bel bilong yu na pundaun long gutpela bilong em na noken larim em i kisim yu wantaim ai bilong em. ²⁶ Slip wantaim pamuk meri i olsem mak moni bilong wanpela bret tasol slip wantaim meri bilong narapela man i ken bagarapim gutpela laip bilong yu. ²⁷ Man inap long karim paia long bros bilong em bai paia i no inap long kukim klos bilong em? ²⁸ Inap man i wokabaut antap long hotpela paia na i no inap kukim lek bilong em? ²⁹ Olsem tasol long man husait i slip wantaim meri bilong wantok bilong em, dispela man husait i slip wantaim dispela meri ol bai i no inap larim em i go nating. ³⁰ Ol manmeri i no inap lukdaun long stilman husait i stil long inapim wonem em i laikim taim em i hangre. ³¹ Bilong wonem, sapos ol i holim em dispela man bai bekim bek 7pela taim moa ol samting em i bin stilim. Em bai i givim olgeta gutpela samting i stap long aus bilong em. ³² Man husait i save mekim pasin pamuk i nogat gutpela tingting, em i bagarapim em yet. ³³ Bikpela bagarap na sem bai i kamap long em, orait em bai i no inap lus tingting long wonem ol i mekim long em. ³⁴ Man bilong dispela meri bai belhat na tingting nogut na em bai i no inap long marimari na em bai i laik long bekim bek long dispela man. ³⁵ Em bai i no inap long kisim tok sore bilong dispela man na em bai i no inap kisim moni bilong ol,maski taim ol i givim em sampela ol gutpela samting tu.