4 ¹ Ol pikinini man, harim gut ol tok stia bilong papa bilong yupela na putim yau gut na bai yu luksave long wanem rot yu bai i gat save. ² Mi givim yu gutpela tok stia, olsem na noken lus tinting long ol tok mi bin skulim yu. ³ Taim mi bin stap wanpela pikinini man bilong papa bilong mi na stap olsem wanpela yangpela pikinini bilong mama bilong mi, ⁴ em i bin skulim mi gut na tokim mi olsem, "Yu mas haitim tok bilong mi long bel bilong yu na lukautim gut ol lo bilong mi na bai yu stap laip. ⁵ Kisim gutpela save na mas i gat save, noken lus tingting na les long ol tok i kam aut long maus bilong mi ⁶ na noken givim baksait na lusim gutpela save na em bai lukautim yu, yu mas laikim gutpela save na em bai lukautim yu i stap gut. ⁷ Gutpela save em i dia tumas, olsem na kisim gutpela save na givim olgeta samting bilong yu long kisim save. ⁸ Lukautim gutpela save na em bai apim yu i go antap, em bai givim ona long yu taim yu holim em klostu long yu. ⁹ Em bai i olsem flawa bilong ona i stap antap long het bilong yu na i olsem naispela hat bilong king i stap long yu." ¹⁰ Harim gut, pikinini man bilong mi, putim yau gut long ol tok bilong mi na bai yu stap longpela taim long dispela graun. ¹¹ Mi stiam yu long rot bilong gutpela save na mi soim yu long stretpela rot bilong i go. ¹² Taim yu wokabaut, nogat wanpela man bai sanap na pasim rot bilong yu na sapos yu ran, bai yu i no inap pundaun. ¹³ Holim strong ol tok stia mi bin givim yu, noken larim em i go, lukautim gut long wanem em i olsem laip bilong yu. ¹⁴ Noken bihainim rot bilong pasin nogut na noken go wantaim ol man i save mekim pasin nogut long rot bilong ol. ¹⁵ Stap longwe na noken go long dispela rot, tanim na go long narapela rot. ¹⁶ Long wanem, ol bai i hat tru long slip inap ol i mekim pasin nogut na ol bai i nogat gutpela malolo inap ol i pundaunim narapela long sin. ¹⁷ Long wanem, ol i save kaikai bret bilong mekim pasin nogut na dring wain bilong bel hevi na kirapim pait. ¹⁸ Tasol rot bilong ol stretpela manmeri i olsem namba wan lait i save kamap bikpela na sain strong inap dei i kamap ples klia olgeta. ¹⁹ Tasol rot bilong ol man i save mekim pasin nogut i olsem bikpela tudak, ol i no save wanem rot ol i go long en na ol bai pundaun karangi. ²⁰ Pikinini man bilong mi, harim gut tok bilong mi na putim yau gut long ol wanem tok mi mekim. ²¹ Noken larim ol dispela tok i go hait long ai bilong yu na lukautim gut long bel bilong yu. ²² Olsem na tok bilong mi i olsem laip long ol man husat i painim na i olsem gutpela bodi i nogat sik long ol. ²³ Larim bel bilong yu i stap gut, was na lukautim gut long wanem, ol gutpela samting bilong laip i save ron olsem wara i kam aut long bel bilong yu. ²⁴ Putim ol tok i no stret na ol tok bai stiam yu i go long rot nogut i stap longwe long yu. ²⁵ Larim ai bilong yu i mas lukluk i go pas na lukluk stret long wanem rot yu bai go long en. ²⁶ Mekim rot bilong yu long wokabaut mas stap stret na bihain olgeta rot yu laik go long en bai i orait na nogat birua i bungim yu. ²⁷ Taim yu wokabaut, noken lukluk i go long han sut o long han kais bilong yu, putim lek bilong yu i go longwe long ol pasin nogut.