¹ Yu noken apim yu yet olsem bai yu mekim wanpela samting long tumora, long wanem yu i no save wanem samting bai kamap long dispela dei. ² Larim narapela man i litimapim nem bilong yu, yu yet i no ken mekim olsem. ³ Man i nogat gutpela tingting i save givim hevi long yumi na dispela hevi i winim tru hevi bilong ston na wesan ol i bungim. ⁴ Belhat na kros em i pasin nogut tru, tasol pasin bilong bel nogut long samting bilong narapela em i winim tru. ⁵ Pasin bilong stretim man i bin mekim rong i winim tru pasin bilong laikim man na yu i no tokim em long asua bilong em. ⁶ Pren tru bai givim yu pen bilong helpim yu, tasol ol birua bai mekim gut tru long yu bilong giamanim yu tasol. ⁷ Man i kaikai na i pulap pinis bai em i les long kaikai, maski kaikai i swit olsem hani, tasol man i hangre, ol kaikai i gat pait i swit tasol. ⁸ Man i lusim ples bilong em na i raun raun nambaut i olsem pisin i lusim haus bilong en na i plai nambaut. ⁹ Sanda na wel i save mekim yumi i amamas, tasol ol gutpela pasin bilong ol pren i bilong givim gutpela tingting long yu. ¹⁰ Yu no ken givim baksait long pren bilong yu na ol lain bilong papa bilong yu na yu noken i go long haus bilong brata long taim bilong hevi. Man i stap klostu i winim brata bilong yu i stap long longwe. ¹¹ Pikinini bilong mi, yu mas kisim gutpela tingting na bel bilong mi bai amamas na bai mi inap long bekim tok bilong man i tok bilas long mi. ¹² Man i gat gutpela tingting i save haitim em yet long taim em i lukim hevi i laik kamap na em i abrusim, tasol ol man i nogat gutpela tingting i lukim hevi i kam na ol i go bungim tasol na karim hevi. ¹³ Man i promis long bekim dinau bilong narapela man na i no bekim yet na i go promis gen long dinau long pamuk meri, kisim saket bilong em na holim i stap olsem mak bilong em i mas bekim dinau. ¹⁴ Sapos man i bikmaus na tok gutdei long pren bilong em long moning taim tru, i olsem em i tok nogut long em! ¹⁵ Sapos meri bilong wanpela man i save kros na toktok planti olgeta taim, em i olsem liklik wara i save pundaun pundaun long het bilong haus i kam insait long taim bilong ren. ¹⁶ Man bilong em i laik mekim em i lusim dispela pasin i olsem em i laik pasim win na i olsem em i laik holimpas wel long han sut bilong em. ¹⁷ Ol i wokim samting long ain bilong sapim ain, olsem tasol wanpela man i mas stretim tingting bilong narapela pren bilong em. ¹⁸ Sapos man i laik kaikai frut bilong diwai fik orait em i mas lukautim gut dispela diwai fik na man i was gut long bosman bilong em bai bosman i mekim gut long em. ¹⁹ Man i lukluk i go daun long wara bai em i lukim pes bilong em yet olsem pasin bilong man i save soim em i wanem kain man. ²⁰ Maski planti man i bin dai na i go long hel, ol i no inap long pulimapim, olsem tasol man i no inap long inapim laik bilong em. ²¹ Ol i save kukim silva long sospen bilong en na gol long paia i hat tumas na man i lusim olgeta pasin nogut na mekim gutpela pasin tasol bai ol i litimapim nem bilong em. ²² Maski sapos yu hamarim strong wanpela man i nogat gutpela tingting olsem yu hamarim rais long rausim skin bilong en, longlong pasin bilong em bai i no inap lusim em. ²³ Yu mas save gut long ol sipsip na meme bilong yu na yu mas was gut long ol. ²⁴ Long wanem moni bilong yu i no inap i stap oltaim na king tu i no inap i stap oltaim. ²⁵ Yu mas save wanem taim bai gras bilong animol i pinis na bai yu katim nupela gen na bungim bilong ol i kaikai na nupela gras bai kamap gen. ²⁶ Bihain bai yu kisim gras bilong ol sipsip na wokim klos bilong yu na bai yu salim ol meme na kisim moni bilong baim graun. ²⁷ Bai yu wantaim ol femili bilong yu na ol wokmeri bilong yu i kisim susu na mit bilong ol meme bilong kaikai na dring.