2 ¹ Pikinini bilong mi, sapos yu harim gut tok bilong mi na putim gut lo bilong mi long tingting bilong yu, ² orait yu mas putim iyau bilong yu na harim gut olgeta tok i save givim yu gutpela tingting na kisim gutpela save long bel bilong yu. ³ Sapos yu laik kisim gutpela save na yu krai bikpela, ⁴ sapos yu wok hat long painim gutpela tingitng olsem man i save painim silva ol i haitim o olsem man i painim mani samting ol i haitim, ⁵ orait bai yu save long stap aninit long God Yawe na bai yu save gut long God. ⁶ Long wanem, God Yawe i save givim gutpela tingting na long maus bilong em, em i save givim gutpela tingting na save. ⁷ Em i pulapim tru gutpela tingting bilong ol man husait ol i painim em na em i save lukautim ol na ol i no inap bagarap, ⁸ em i save lukautim rot bilong ol man husait i mekim stretpela pasin na em i save was long ol man i bihainim em. ⁹ Na bai yu save long olgeta stretpela pasin, na bai yu wokabaut long gutpela rot. ¹⁰ Gutpela tingting bai kam insait long bel bilong yu na gutpela save bai kam long laip bilong yu. ¹¹ Gutpela tingting bai banisim yu na gutpela save bai was long yu. ¹² Ol bai helpim yu long rot bilong bagarap na long ol man bilong mekim tok nogut, ¹³ husait i no bihainim stretpela rot na wokabaut long tudak pasin. ¹⁴ Ol i save amamas taim ol i mekim kaikain pasin nogut, olsem na ol i save amamas tru long ol pasin nogut na i no save laik long bihainim stretpela pasin, ¹⁵ Ol i save bihainim rot i no gutpela na giamanim ol, ol i haitim rot bilong ol. ¹⁶ Gutpela tingting bai helpim yu long abrusim ol pamuk meri long ol kain kain tok nogut bilong ol. ¹⁷ Dispela meri i lusim ol wanlain bilong em long taim bilong yanpela bilong em na em i lusim tingting long tok promis bilong God. ¹⁸ Haus bilong dispela meri i soim rot bilong dai, na rot bilong igo long ol lain i stap long matmat. ¹⁹ Husait ol lain i save bihainim em i go, ol i no inap kam bek na ol i no inap painim rot bilong kisim laip. ²⁰ Tasol yupela bai bihainim rot bilong ol gutpela manmeri na bihainim stretpela rot. ²¹ Ol lain husait i bihainim stretpela pasin bai stap gut oltaim oltaim na ol lain wantaim stretpela pasin bai i stap longpela taim long graun. ²² Tasol, ol man nogut bai i no inap i stap long graun na ol man i no bilip bai i lus.