2 ¹ Nau yupela ol pris, dispela tok i bilong yupela. ² "Sapos yupela i no harim na sapos yupela i no putim insait long bel bilong yupela long givim biknem long mi." God Yawe bilong ol lain Ami i tok olsem. "Orait mi bai givim hevi i kam long yupela wantaim ol gutpela samting mi givim long yupela. Tru tumas, mi givim hevi pinis long ol, long wanem yupela i no putim tok bilong mi long bel bilong yupela. ³ Lukim, mi bai mekim save long ol tumbuna lain na mi bai tromoi pekpek bilong ol abus yupela i kilim long mekim ofa antap long pes bilong yupela. Ol bai i klinim dispela pekpek na tromoi i go aut wantaim yupela. ⁴ Taim dispela samting i kamap, yupela bai save olsem mi salim dispela tok long yupela na long kontrak bilong mi i ken stap olsem wantaim Livai." God Yawe bilong ol lain Ami i tok olsem. ⁵ "Kontrak bilong mi wantaim em i bilong givim laip na stap bel isi. Mi givim dispela tok long em, mi mekim em i pret na em i pret long mi na em i stap stret na givim biknem long mi. ⁶ Trupela stia tok em i kam aut long maus bilong em. Nogat wanpela tok giaman i kam aut long maus bilong em. Em i wokabaut wantaim mi insait long bel isi na stretpela pasin na mekim planti manmeri i tanim bel long pasin nogut. ⁷ Wanpela pris i mas mekim ol gutpela tok bilong kisim save bai ol manmeri i ken kisim gutpela stia tok long maus bilong em, long wanem em i mausman bilong God Yawe bilong ol lain Ami. ⁸ Tasol yupela givim baksait long stretpela rot. Yupela i mekim ol manmeri i no inap aninit long bihainim ol Lo. Yupela i brukim kontrak mi mekim wantaim Livai," God bilong ol lain Ami i tok olsem. ⁹ Olsem na mi bai mekim ol man bai les long yupela na yupela bai kisim sem long ai bilong olgeta manmeri, long wanem yupela i no mekim wankain pasin long olgeta, tasol yupela i givim hatpela skul long ol manmeri yupela i no laikim." ¹⁰ Ating i nogat wanpela papa bilong mipela olgeta na i nogat wanpela God i kamapim mipela? Bilong wanem mipela i mekim pasin nogut long wanwan brata na bagarapim kontrak bilong ol papa bilong mipela. ¹¹ Ol lain Juda i no stap stret long God. Ol i mekim pasin nogut tru long Israel na long Jerusalem. Long wanem ol lain Juda i bagarapim tempol bilong God Yawe i save laikim tumas na Juda i maritim pikinini meri bilong god bilong narapela hap. ¹² God Yawe inap rausim long ol haus sel bilong Jekob. dispela man husait i mekim dispela pasin, man husait i kirap na man husait i bekim tok. Maski sapos em i kisim ofa i kam long God Yawe bilong ol lain Ami. ¹³ Yupela i save mekim ol dispela pasin tu, yupela i save karamapim alta bilong God Yawe wantaim ai wara wantaim krai na sori, long wanem God i no amamas na wanbel long dispela ofa long han bilong yupela. ¹⁴ Tasol yupela i tok olsem, "Bilong wanem em i no mekim olsem?" Bekim bilong dispela tok i olsem, God Yawe i save long promis yupela i mekim long taim yupela i maritim namba wan meri na yupela i no bihainim promis bilong yupela, maski em i poro bilong yupela na meri bilong yupela insait long Lo bilong marit. ¹⁵ God Yawe i no mekim yupela i kamap wanpela long bodi na insait long spirit bilong em, a? Na bilong wanem na em i mekim yu wan? Long wanem em i painim pikinini husait i ken bihainim pasin bilong God. Olsem na yupela mas lukautim ol spirit i stap insait long yupela na i noken rausim namba wan meri bilong yupela. ¹⁶ God Yawe, God bilong Israel i tok olsem, "Mi save les long pasin bilong brukim marit na giaman long karamapim na kirapim pait wantaim meri bilong yupela," God Yawe bilong yupela i tok. Olsem na yupela i mas mekim gut long ol spirit i stap insait long yupela na noken mekim pasin nogut." ¹⁷ Yupela i mekim God Yawe em i les long tok yupela mekim long em.Tasol yupela i tok, "Long wanem rot mipela i mekim em i les?" Yupela i tok, "Olgeta lain husait i mekim pasin nogut ol i ting em i gutpela long ai bilong God Yawe na amamas long mekim dispela pasin," o "Strepela pasin bilong God i stap we?"