1 ¹ Bihain long dai bilong Moses, wokman bilong God Yawe. God Yawe i singautim Josua pikinini man bilong Nun, namba tu hetman i stap aninit long Moses, ² "Moses, wokman bilong mi, em i dai pinis. Yu na ol manmeri, kirap, brukim wara Jodan na i go long dispela graun bai mi givim yupela ol manmeri bilong Isrel. ³ Mi givim yupela pinis, olgeta ples yupela i putim lek na wokabaut i go long en. Mi givim pinis long yupela olsem mi bin mekim tok promis long Moses. ⁴ Long ples drai na Lebenen i go inap long we hap bilong bikpela wara, Yufretis na olgeta graun bilong ol lain Hitait na long bikpela sol wara na hap san i go daun bai i kamap graun bilong yupela. ⁵ Nogat wanpela man bai inap sanap long pes bilong yu, long olgeta dei long laip bilong yu. Bai mi stap wantaim yu olsem mi save stap wantaim Moses. Bai mi no inap givim baksait long yu o lusim yu. ⁶ Sanap strong na noken poret. Bai yu kirapim ol dispela manmeri long kisim olgeta graun mi bin mekim tok promis long givim long ol lain tumbuna bilong ol. ⁷ Sanap strong na noken poret. Lukaut gut long bihainim olgeta lo wokman bilong mi Moses i givim long yupela. Noken tanim long han sut o han kais na olgeta hap yupela i go bai i kamap gutpela tasol. ⁸ Oltaim yupela i mas toktok planti long dispela buk bilong lo. Yupela mas tingim gut ol dispela tok long san na long nait na bai yupela i bihainim olgeta samting i stap insait long en. Orait bai yupela i kisim planti samting na stap gut tru. ⁹ Ating mi no bin tok strong long yupela? Sanap strong na noken pilim nogut. Yupela i noken poret. Noken suruk. Long wanem God Yawe, God bilong yu bai i stap wantaim yu long olgeta hap yupela i go." ¹⁰ Orait Josua i givim strongpela tok long ol lida bilong ol manmeri, ¹¹ "Go long ol haus sel na tokim ol manmeri, redim olgeta samting bilong yupela yet. Long tripela dei bihain bai yumi brukim wara Jodan na go insait na kisim dispela graun God Yawe, God bilong yumi i givim yumi long kisim." ¹² Long ol lain bilong Ruben, ol Gad na ol hap lain bilong Manase, Joshua i tok, ¹³ "Tingim Moses wokman bilong God Yawe, i tokim yumi long taim em i givim yumi strongpela tok, God Yawe, God bilong yumi em i givim yumi malolo na em i givim yumi dispela graun." ¹⁴ Na ol meri bilong yupela, ol liklik pikinini bilong yupela na ol animol bilong yupela bai i stap long graun Moses i givim yupela long en long hap i go longwe long Jodan.Tasol ol man bilong pait na ol brata bilong yupela bai i go helpim long pait, ¹⁵ inap God Yawe i givim malolo long ol brata bilong yupela olsem em i givim yupela malolo. Orait ol bai kisim strong bilong lukautim graun God Yawe i givim long ol. Bihain yupela bai go bek long graun bilong yupela yet na long graun Moses wokman bilong God Yawe i givim yupela long wara Jodan na i go moa yet hap bilong san i kam antap." ¹⁶ Bihain ol i bekim tok bilong Josua olsem, "Olgeta tok yu tokim mipela bai mipela i mekim na wanem hap yu laik salim mipela long go bai mipela i go. ¹⁷ Mipela bai harim tok bilong yu olsem mipela i bin harim tok bilong Moses. Na God Yawe, God bilong yu bai i stap wantaim yu, olsem em i bin stap wantaim Moses. ¹⁸ Husait man i sakim tok bilong yu na i no laik harim tok bilong yu bai mipela i kilim em i dai. Wanpela samting tasol sanap strong na noken poret."