3 ¹ Harim, long ol dispela dei na long dispela taim, taim mi larim ol kalabus bilong Juda na Jerusalem i go fri, ² mi bai bungim olgeta manmeri na kisim ol i go long plesdaun bilong Jehosapet. Na bai mi kotim ol, long wanem, ol Israel, em mi lukautim na em ol manmeri bilong mi, husait ol i go nabaut long olgeta hap ples, long wanem ol i skelim graun bilong mi. ³ Ol i mekim planti pilai nogut long ol manmeri bilong mi na ol i givim wanpela pikinini boi long wanpela pamuk meri olsem pei bilong mekim pasin pamuk na salim wanpela pikinini meri long dring wain. ⁴ Orait nau, bilong wanem na yupela i belhat long mi, Taia, Sidon na olgeta bikman bilong Filistia? Bai yupela inap long baim mi gen? Maski sapos yupela i baim mi, mi bai hariap tru long bekim pasin nogut bilong yupela. ⁵ Long wanem yupela i kisim silva na gol bilong mi na ol gutpela samting i dia tumas na go putim insait long ol haus lotu bilong yupela. ⁶ Yupela i salim ol manmeri bilong ol lain Juda na Jerusalem long ol lain Grik, long mekim ol i go longwe long graun bilong ol. ⁷ Lukim, mi laik kirapim ol na kisim ol i kam aut long dispela ples yu bin salim ol long en na bekim bek pei bilong yupela. ⁸ Bai mi salim ol pikinini man na pikinini meri bilong yupela long han bilong ol lain manmeri bilong Juda. Na ol bai salim ol long manmeri bilong Sabia, dispela kantri i stap longwe tru, dispela em God Yawe i bin tok olsem." ⁹ Toksave long olgeta manmeri olsem, "Redim yupela yet long go pait, makim ol strongpela man bilong pait na larim ol i kam klostu na larim olgeta man bilong pait i kam antap. ¹⁰ Paitim ol ain bilong digim graun na mekim ol bainat na kisim ol naip bilong rausim ol liklik han bilong diwai na mekim ol spia. Larim man i nogat strong i mas tok, 'Mi gat strong.' ¹¹ Kam hariap, yupela olgeta man i stap long klostu ples na yupela i bung wantaim. God Yawe, kisim ol strongpela man bilong pait i kam daun. ¹² Larim ol manmeri i kirapim ol yet na kam long plesdaun bilong Jehosafet. Long dispela hap bai mi stap long kotim olgeta manmeri bilong ol ples i stap klostu. ¹³ Redim naip i gat huk, long wanem kaikai i mau pinis. Kam na krungutim frut bilong diwai wain, hap bilong krungutim wain i pulap. Sospen i pulap na i kapsait, long wanem pasin nogut bilong ol i kamap bikpela tru." ¹⁴ I gat bikpela nois i kamap long plesdaun bilong mekim stretpela kot. Long wanem dei bilong God Yawe i kamap klostu pinis long plesdaun bilong mekim stretpela kot. ¹⁵ San na mun i kamap tudak na ol sta i holim bek gutpela lait bilong ol. ¹⁶ God Yawe bai i singaut strong long Maunten Saion na singaut bilong em bai i go antap moa yet long Jerusalem. Skai na graun bai i guria, tasol, God Yawe bai i stap olsem ples hait bilong ol manmeri bilong em na stap olsem strongpela banis bilong ol manmeri bilong Israel. ¹⁷ "Olsem na yupela bai i save olsem Mi Yet Mi God Yawe bilong yupela husait i save stap long Saion, dispela holi Maunten bilong mi. Orait na Jerusalem bai i holi na ol ami bilong narapela lain bai i no inap winim em gen. ¹⁸ Long dispela dei, ol maunten bai i givim switpela wain na ol liklik maunten bai i ron wantaim planti gutpela milk na ol liklik wara long Juda bai i pulap wantaim wara na gutpela wara bai i kam aut long haus bilong God Yawe na givim wara long plesdaun bilong Sitim. ¹⁹ Ol lain Isip bai i bagarap tru na i nogat wanpela samting bilong ol na ol lain Idom bai i kisim bagarap long ples nating, long pasin nogut ol i mekim long ol lain Juda, long wanem ol i kilim na kapsaitim blut bilong man i nogat asua long graun bilong ol. ²⁰ Tasol ol Juda bai i stap gut oltaim na ol Jerusalem wantaim ol tumbuna pikinini bilong ol tu bai i stap gut oltaim. ²¹ Mi bai bekim blut bilong ol lain mi no bin bekim yet, long wanem God Yawe i stap long Saion."