1 ¹ Long kantri Us i gat wanpela man nem bilong em Jop. Na Jop em i wanpela stretpela man na i gat pret long ai bilong God na em i no save mekim pasin nogut. ² Na meri bilong em i gat 7-pela pikinini man na tripela pikinini meri. ³ Em i gat 7,000 sipsip, 3,000 kamel, 1,000 bulmakau na 500 donki wantaim ol planti lain wokman. Em i wanpela bilong ol man i gat biknem namel long ol man bilong hap sankamap. ⁴ OL wan wan pikinini man bilong Jop i gat taim bilong ol i ken mekim kaikai long haus bilong ol yet. Na long taim bilong kaikai, bai ol i ken salim tok na singautim ol tripela susa bilong ol long kam kaikai na dring wantaim ol. ⁵ Long taim bilong kaikai i pinis, orait, Jop i singautim olgeta pikinini man i kam bung na em i mekim ofa bilong kamap klin long ai bilong God. Em kirap long monin taim tru long dei bihain na mekim ofa bilong paia i kukim olgeta bilong olgeta pikinini. Long wanem em i ting, "Nogut wanpela long ol pikinini i mekim sin long ai bilong God insait long bel na tingting bilong ol.'' Olsem na Jop i save mekim dispela kain pasin oltaim. ⁶ Na bihain taim i kamap long ol pikinini man bilong God i kam bung bilong tokaut na soim ol yet long ai bilong God Yawe. Long dispela taim Satan tu i kam wantaim ol. ⁷ God Yawe i askim Satan, "Yu stap we na nau yu kam?" Na bihain Satan i bekim tok long God Yawe olsem, "Mi go, i kam na raunim olgeta hap long graun na mi kam.'' ⁸ Na God Yawe i tok long Satan, "Yu lukim wokman bilong mi Jop tu o nogat? Long wanem i nogat wanpela man i olsem em i stap antap long graun. Man i nogat asua na stretpela man husait i gat pret long ai bilong God na i lusim pasin nogut." ⁹ Na Satan i bekim tok bilong God Yawe olsem, "Yu ting Jop inap long pret long yu, God, long samting i no gat as? ¹⁰ Na yu ting yu larim wanpela samting i pasim em wantaim ol famili bilong em long graun em i stap long en? Yu blesim han bilong en na givim em olgeta samting na ol sipsip na bulmakau long inapim olgeta hap graun bilong en. ¹¹ Tasol sapos yu bagarapim na rausim dispela olgeta samting em i gat, bai yu lukim em i tok nogut tru long yu." ¹² Na God Yawe i tok long Satan, "Harim, olgeta samting em gat i stap long han bilong yu. Yu ken mekim olsem long laik bilong yu yet. Tasol yu no ken putim han antap long laip bilong em." Na Satan i harim dispela tok na lusim i go longwe long God Yawe. ¹³ Na bihain long wanpela de olgeta pikinini man na pikinini meri i kam kaikai na dring wain i stap long haus bilong bikpela brata bilong ol. ¹⁴ Na wanpela wokman i kisim tok i kam long Jop na i tok, "Mipela i kisim ol bulmakau na i go brukim graun na ol donki i kaikai gras klostu long ol. ¹⁵ Ol lain man bilong Seba i kam na stilim olgeta bulmakau na donki i go pinis. Na ol i kilim i dai olgeta wokman bilong yu wantaim bainat na mi wanpela tasol i ranawe kam bilong tokim yu." ¹⁶ Taim em i toktok i stap yet, narapela man tu i kam na tok, "Klaut i pairap na paia bilong God i kam daun long heven na kukim ol sipsip na olgeta wokman. Mi wanpela tasol ranawe i kam long tokim yu." ¹⁷ Em i toktok yet, narapela i kam na i tok, "Ol Kaldia i kam long tripela lain na stilim olgeta kamel bilong yu na kisim ol i go pinis. Na ol i kilim i dai olgeta wokman wantaim sap bilong bainat na mi wanpela tasol ranawe kam bilong tokim yu." ¹⁸ Taim em i toktok yet narapela ken i kam na i tok, "Olgeta pikinini man na pikinini meri bilong yu i kaikai na dring wain long haus bilong bikpela brata bilong ol. ¹⁹ Wanpela strongpela win i kam olsem long hap ples wesan nating na i kam brukim haus na haus i pundaun antap long olgeta yangpela manmeri na kilim i dai olgeta lain. Mi wanpela tasol ranawe kam long tokim yu." ²⁰ Jop i harim dispela tok na em i kirap na brukim klos bilong en na rausim gras long het bilong em. Na em i putim pes i go daun long graun na lotu long God. ²¹ Em i tok, "Mi kam aut long bel bilong mama as nating na mi bai mi go as nating olsem tasol. Olgeta dispela samting God Yawe tasol i givim mi, nau God Yawe tasol i kisim bek. Olsem na mi litimapim biknem bilong God Yawe." ²² Tru tumas, long olgeta dispela pasin Jop i no mekim sin o tok nogut long God long ol dispela samting.