¹ Olsem na wanpela man i kisim mi i kam bek autsait long dua bilong haus sel i stap olsem long hap sankamap na bin pas strong tru. ² God Yawe i tokim mi, "Dispela dua bin pas strong na bai i no inap long op. Nogat wanpela man bai i go insait tasol God Yawe God bilong Israel, em tasol bai kam long dispela dua, olsem na dispela dua em i pas strong. ³ Ol lida man long Israel bai sidaun na kaikai long ai bilong God Yawe. Em bai bihainim rot i kam insait long hap pos bilong dua i sanap long en na em bai go autsait gen." ⁴ Em kisim mi long rot i go olsem long dua i stap long hap not long tempol na mi lukim glori bilong God Yawe i pulimapim haus bilong God Yawe na mi daunim het i go daun long graun. ⁵ God Yawe i tokim mi olsem, "Pikinini man bilong man, daunim bel bilong yu na lukluk long ai bilong yu i kam na harim gut long yau bilong yu long wanem ol samting bai mi tokaut long yu, long olgeta lo bilong haus bilong God Yawe na strongpela ol toktok long harim na bihainim. Tingim gut dua bilong haus long go insait na long go autsait. ⁶ Tokim ol Israel long ol lain i save sakim tok, 'Bikpela God Yawe i tok olsem, Lusim olgeta pasin nogut bilong yupela, ol lain Israel, ⁷ yupela kisim ol man bilong narapela hap husait i no katim skin bilong bel bilong ol na i no katim skin bilong ol long i stap long haus sel bilong mi na bagarapim haus, taim yupela wokim ofa bilong kaikai, ofa bilong gris na ofa bilong blut, yupela i brukim kontrak mi mekim wantaim yupela taim yupela i mekim pasin nogut. ⁸ Yupela i no tingim ol samting em i holi na mekim wok stret, tasol yu larim ol narapela lain i kisim ples bilong yu na mekim wok na yu givim wok i go long ol i ken lukautim haus holi bilong mi. ⁹ Bikpela God Yawe i tok olsem, Noken tru ol lain bilong narapela hap i no bin katim skin bilong bel bilong ol na katim skin bilong ol i stap wantaim ol manmeri bilong mi Israel bai i go insait long ples holi bilong mi. ¹⁰ Ol Livai i go longwe tru long mi na bihanim ol giaman god, tasol bai i gat pe bilong wanem sin ol i mekim. ¹¹ Mi makim ol long kamap wokboi long haus sel bilong mi, long lukautim dua bilong haus na kilim sipsip long wokim ofa bilong paia i kukim olgeta na ofa bilong ol manmeri, bai ol i sanap long ai bilong ol manmeri long mekim dispela wok long helpim ol. ¹² Bilong wanem ol i mekim ofa i go long ol giaman god, ol tasol i kamap as bilong mekim Israel i pundaun long sin. Olsem na bai mi putim han bilong mi i go antap na mekim strongpela tok promis long kamapim hevi wantaim ol, Bikpela God Yawe i tok, ol yet bai karim hevi bilong ol. ¹³ Ol bai i no inap kam klostu long mi na wok olsem pris bilong mi o kam klostu long ol samting bilong mi em i holi tru. Ol yet bai karim hevi bilong ol na bai ol pilim sem long wanem pasin nogut ol i mekim. ¹⁴ Tasol bai mi putim ol olsem ol lain bilong lukautim ol wok insait long haus, long olgeta wok na ol samting bai kamap insait long en. ¹⁵ Ol pris long lain Livai, ol pikinini man bilong Sadok i save harim tok na mekim stret ol wok long haus sel bilong mi taim ol manmeri bilong Israel i go longwe long mi, ol tasol bai i kam klostu long mi na lotu long mi. Ol bai sanap long ai bilong mi na mekim ofa bilong gris na blut, Bikpela God Yawe i tok. ¹⁶ Ol bai kam long haus sel bilong mi, ol bai kam klostu long tebol bilong mi na lotu long mi na bai mekim olgeta wok mi givim ol long mekim long mi. ¹⁷ Em bai i olsem, taim ol i kam kamap long ol dua bilong haus sel long insait, ol mas putim waitpela klos long skin bilong ol, ol i noken putim gras bilong sipsip na go insait long ol dua bilong haus sel. ¹⁸ Ol mas putim waitpela hat long het bilong ol na putim waitpela klos aninit long bel na tais bilong ol, ol i noken putim klos bilong kamapim tuat. ¹⁹ Taim ol i laik go autsait long haus sel long ai bilong ol manmeri, orait ol i mas rausim ol klos ol i bin putim taim ol mekim wok insait long haus sel, ol i mas rausim na putim long rum holi, bilong wanem ol i noken mekim ol manmeri i kamap holi taim ol i kam pas long skin bilong ol na holim klos holi ol i putim. ²⁰ Ol i noken katim na rausim olgeta het gras bilong ol na tu ol i noken larim het gras bilong ol i lus i kam daun longpela. tasol ol mas katim het gras bilong ol na sotim lkiklik. ²¹ Noken wanpela pris i dringim wain taim ol i kam insait long haus sel, ²² noken kisim meri man bilong em i dai pinis o meri man bilong em i rausim em long bai em i kamap meri bilong em, tasol em i mas kisim wanpela yanpela meri long lain bilong em yet long Israel o meri man bilong em bin i stap pris na i dai pinis. ²³ Long wanem ol bai skulim ol manmeri bilong mi long luksave wanem samting em i holi na wanem samting em i no stret na bai ol i mekim ol luksave long wanem em i klinpela na wanem em i no klinpela. ²⁴ Taim i gat sampela kros i kamap namel long ol manmeri, bai yupela bihainim tok bilong mi na skelim hevi bilong ol, orait ol i mas stap stret. Ol bai lukautim lo bilong mi long olgeta bung kaikai na amamasim olgeta holi Sabat bilong mi. ²⁵ Ol i noken i go long man i dai, bilong wanem bai ol i no inap kamap klin, tasol em i mas papa o mama bilong ol, pikinini man o pikinini meri bilong ol, brata o sista bilong ol husait i no slip wantaim man yet, sapos ol i no bihainim dispela bai ol i no inap kamap klin. ²⁶ Bihain long dispela pris i no bihainim ol dispela na em kamapim asua, orait ol i mas kaunim i kamap 7-pela dei olgeta long em. ²⁷ Long dispela dei pris i go insait long ples holi long haus sel long mekim wok, orait em i mas mekim sin ofa bilong em yet bilong wanem Bikpela God Yawe i tok. ²⁸ Mi yet bai kamap olsem olgeta samting bilong ol, noken givim wanpela samting i go long ol insait long Israel. Bilong wanem bai mi yet kamap kago bilong ol. ²⁹ Bai ol i kaikai ofa bilong kaikai, ofa bilong sin, ofa bilong kamapim asua na olgeta samting ol i givim i go long God Yawe bilong Israel, em ol dispela samting em bilong ol. ³⁰ (30)Olgeta nambawan kaikai bilong graun o long diwai bai yupela putim olsem takis, orait ol dispela em bai i bilong ol prist na wanem em i nambawan ofa bilong kaikai bilong yupela i givim i go long ol pris na long dispela as bai yupela i gat gutpela samting long haus bilong yupela. ³¹ Ol pris i noken tru kaikai abus narapela animol bin kilim na i sting pinis olsem pisin o animol.