3 ¹ Sapos God i bin kirapim yu wantaim Krais, orait lukluk long ol samting bilong antap, wei Krais i sindaun long han sut bilong God. ² Tingim ol samting bilong antap, na noken tingim ol samting bilong dispela graun, ³ Yu bin dai pinis, na God i haitim laip bilong yu insait long Krais ⁴ Taim Krais i stap insait long yu, laip bilong yu bai kamap ples klia, wantaim lait na bikpela bilas bilong em. ⁵ Yupela i mas kilim i dai, ol pasin bilong dispela graun, olsem pasin pamuk, pasin doti, laik nogut, bel kirap long mekim pasin nogut, na pasin gridi, em ol pasin bilong god giaman. ⁶ Long ol dispela kain pasin tasol na belhat bilong God bai i kam long ol manmeri husait i sakim tok bilong em. ⁷ Yupela tu i bin wakabaut insait long ol dispela kain pasin long bipo taim. ⁸ Tasol nau yupela i mas lusim ol dispela kain pasin olsem, kros, belhat, bel kirap long mekim pasin nogut, pasin bilong bagarapim bel na tok nogut long maus bilong yupela. ⁹ Noken mekim tok giamain long ol narapela, long wanem, yupela i bin rausim pinis ol pasin bilong ol pela bel wei yupela save mekim, ¹⁰ nao yupela i putim ol nupela pasin bilong em, na em i mekim yupela i kamap nupela long save na piksa bilong em yet. ¹¹ Long dispela as, ino gat Grik o Juda, man bilong katim skin o man i no katim skin na ol lain Barbaria, na Sintia, na wokboi natin o fri man, tasol Krais em i het bilong olgeta samting na em i stap insait long olgeta samting. ¹² Olsem na God i makim yupela i mas stap holi na laikim narapela na i mas sori long ol arapela na mekim gut long ol, daunim yupela yet na tok isi long ol narapela na stap isi. ¹³ Wok bung wantaim ol narapela. Lusim rong bilong ol na mekim gutpela pasin long ol. Sapos wanpela i gat belhevi wantaim narapela, orait lusim rong bilong em olsem Krais i bin lusim rong bilong yupela. ¹⁴ Antap long ol dispela olgeta pasin, yupela i mas i gat pasin bilong laikim, em i save strongim olgeta gutpela pasin. ¹⁵ Larim bel isi bilong Krais i ken pulap long bel bilong yupela. Long dispela bel isi tasol yupela i bin kamap wanpela bodi. Na yupela i mas tok tenkyu. ¹⁶ Larim tok bilong God i ken pulap tru long yupela. Wantaim olgeta gutpela tingting na save yupela i mas skulim ol arapela long buk song na ol lotu song, na singsing song wantaim hamamas na tok tenkyu go long God. ¹⁷ Na long wanem samting yupela i mekim, long toktok o long pasin, mekim olgeta pasin long nem bilong Bikpela Jisas na tok tenkyu long Papa God. ¹⁸ Yupela meri, yupela i mas aninit long ol man bilong yupela, na dispela em bai i orait long ai bilong Bikpela. ¹⁹ Na yupela ol man, yupela i mas laikim tru meri bilong yupela, na noken tok strong long ol. ²⁰ Pikinini, yupela i mas harim tok bilong ol papa mama bilong yupela long olgeta samting, long wanem Bikpela i hamamas long dispela kain pasin. ²¹ Ol papa, yupela i noken mekim ol pikinini i belhat, nogut ol i pilim olsem ol i no inap long mekim wanpela samting. ²² Yupela ol wokboi, Yupela i mas harim tok bilong boss man bilong yupela na mekim olgeta samting, i no long hamamasim em tasol taim em i lukim yupela, tasol wok wantaim gutpela bel na i mas gat pret long God. ²³ Wanem samting yupela i mekim, mekim wantain bel bilong yupela i go long Bikpela na i no long man. ²⁴ Yupela mas save olsem yupela bai kisim pei long Bikpela olsem em i bin tok promis pinis. Yupela i mekim wok bilong Bikpela Jisas husait yupela i bihainim em. ²⁵ Na man i mekim pasin nogut em bai kisim pe bilong en, long wanem pasin em i bin mekim na bai i nogat pasin bilong sori.