17 ¹ Long namba 12 yia bilong Ahas king bilong Juda, Hosea pikinini man bilong Ela i kamap king bilong ol Israel na i lukautim Samaria inap 9-pela yia. ² Em i mekim pasin nogut long ai bilong God Yawe, tasol em i no mekim planti pasin nogut olsem ol arapela king bilong Israel i mekim bipo. ³ Salmenesa king bilong Asiria i pait wantaim em na i winim em olsem na Hosea i kamap wokman bilong em na i bringim ol presen na takis i kam long em. ⁴ Olsem na king bilong Asiria i luksave olsem Hosea i pasim tok long mekim birua long em, long wanem Hosea i salim ol man long askim So king bilong ol Isip long helpim em. Na olsem tu em i no bringim ol presen o takis i go long king bilong Asiria, olsem em i save mekim olgeta yia. Olsem na king bilong Asiria i holim em na putim em long kalabus. ⁵ Orait King bilong ol Asiriai i kirapim pait long olgeta hap graun, na em i banisim ol Samaria na em i pait wantaim ol inap tripela yia. ⁶ Long namba 9 yia bilong Hosia, king bilong ol Asiria i winim ol Samaria na i kisim ol Israel i go long Asiria. Em i putim ol long Hala long wara Habo bilong Gosan insait long biktaun bilong Medes. ⁷ Dispela hevi i kamap bilong wanem ol manmeri bilong Israel i sin long God Yawe God bilong ol husait i bin kisim ol i kam aut long kantri Isip aninit long han bilong king Fero bilong Isip. Ol manmeri i bin lotu long ol arapela giaman god ⁸ na i wokabaut insait long ol pasin nogut bilong ol arapela kantri God Yawe i bin rausim long ol manmeri bilong Israel, na i bihainim ol pasin nogut ol king bilong ol Israel i bin mekim. ⁹ Ol manmeri bilong Israel i mekim ol hait pasin nogut long God Yawe God bilong ol. Ol i mekim ol ples bilong lotu insait long ol biktaun bilong ol long was tawa i go inap long ol strongpela banis. ¹⁰ Ol tu i mekim ol ston pos na ol piksa bilong Asera god giaman antap long ol maunten na aninit long ol diwai. ¹¹ Long ol dispela ples maunten ol i kukim ol smel ofa wankain olsem ol arapela kantri God Yawe i bin rausim. Ol Israel i mekim ol pasin nogut long kirapim God Yawe long belhat; ¹² ol i lotuim ol giaman God we God Yawe i bin tokim ol, "Yupela i noken mekim ol dispela samting." ¹³ Olsem God Yawe i bin toktok long ol Israel na ol Juda long ol profet na ol glasman na i tok, "Tanim bel na bihainim ol lo na ol toktok bilong mi na lukaut gut long bihainim ol lo mi bin tokim ol papa bilong yupela, mi bin salim long yupela ol wokman bilong mi ol profet." ¹⁴ Tasol ol i no inap harim, ol i bikhet olsem ol papa bilong ol husait i no bilipim God Yawe God bilong ol. ¹⁵ Ol i no bihainim ol lo bilong em na kontrak em i bin mekim wantaim ol tumbuna bilong ol na ol tok promis em i bin givim ol. Ol i bihainim ol pasin nogut na ol tu i kamap samting nating. Ol i bihainim ol kantri husait i no lotuim God klostu long ol, dispela ol kantri God Yawe i tok ol i noken bihainim pasin bilong ol. ¹⁶ Ol i no bihainim ol lo bilong God Yawe God bilong ol. Ol i mekim gol piksa bilong tupela yangpela bulmakau long lotuim. Ol i mekim pos bilong Asera god giaman, ol i lotuim ol sta long skai na god bal. ¹⁷ Ol i kukim ol pikinini man na meri long paia i go long god giaman, ol kisim tingting bilong ol glasman na puripuri, ol i givim ol yet long mekim pasin nogut long ai bilong God Yawe na i mekim em i belhat. ¹⁸ Olsem na God Yawe i bel nogut long ol Israel na i rausim ol long ai bilong em. I nogat wanpela i bin i stap, ol tumbuna lain bilong Juda tasol i bin stap. ¹⁹ Olsem tu ol Juda i no bihainim God Yawe God bilong ol na ol i bihainim ol pasin nogut ol Israel i bin mekim. ²⁰ Olsem na God Yawe i givim baksait long ol tumbuna lain bilong Israel, em i bagarapim ol na i givim ol long han bilong ol birua husait bai i kisim olgeta samting bilong ol, inap em i rausim ol long ai bilong em. ²¹ Em i brukim Israel long ol lain bilong Devit na ol mekim Jeroboam pikinini man bilong Nebat i kamap king. Jeroboam i kisim ol Israrel i go longwei long God Yawe na lidim ol long mekim bikpela sin. ²² Olgeta manmeri bilong Israel i bihainim ol pasin nogut bilong Jeroboam na i no lusim ol dispela pasin nogut, ²³ olsem na God Yawe i rausim ol Israel long ai bilong em, olsem em i bin tok ol wokman em ol profet olsem em bai i mekim. Olsem na ol Asiria i kisim ol Israel olsem kalabus i go long kantri bilong ol na em i stap olsem i kam inap long nau. ²⁴ King bilong ol Asiria i kisim ol manmeri i kam long Babilon, Ava, Amat na Sefavaim na putim ol long biktaun bilong Samaria long kisim ples bilong ol manmeri bilong Israel. Ol i kisim kantri Samaria na i sindaun long biktaun bilong en. ²⁵ Ol i no lotuim God Yawe taim ol i kam i stap,olsem na God Yawe i salim ol laion i kam namel long ol na i kilim sampela bilong ol. ²⁶ Orait ol i tokim king bilong Asiria na tok, "Ol manmeri bilong dispela kantri yu karim i go na putim long ol biktaun bilong Samaria i no save long bihainim ol pasin bilong god bilong dispela graun. Olsem na em i salim ol laion i kam namel long ol, na lukim, ol laion i wok long kilim ol manmeri bilong wanem ol i no save long ol pasin bilong god bilong dispela graun." ²⁷ Na king bilong ol Asiria i tok strong na i tok, "Kisim wanpela pris i go long dispela hap husait yu i bin kisim i kam aut long dispela hap, larim em i go sindaun long dispela hap na em i ken skulim ol long ol pasin bilong god bilong dispela graun." ²⁸ Olsem na wanpela bilong ol dispela pris husait ol i bin karim i go aut long Samaria i kam na i sindaun long Betel, em i skulim ol long lotuim God Yawe. ²⁹ Olgeta wanwan lain manmeri i mekim giaman god bilong ol yet na putim ol long ol maunten ples ol Samaria i bin mekim - olgeta wanwan lain manmeri husait i sindaun long ol biktaun. ³⁰ Ol manmeri bilong Babilon i mekim Sukot Benot, ol manmeri bilong Kuta i mekim Negal, ol manmeri bilong Ama i mekim Asima, ³¹ ol Avi i mekim Nabas na Tatak. Ol Sefavaim i kukim ol pikinini bilong ol long paia i go long Adramelek na Anamelek ol god bilong ol Sefavaim. ³² Ol tu i lotuim God Yawe na ol i makim ol pris namel long ol yet bilong maunten ples husait i mekim ofa bilong ol insait long haus lotu long ol maunten ples. ³³ Ol i lotuim God Yawe tasol ol tu i lotuim ol giaman god bilong ol yet, insait long tumbuna pasin bilong ol kantri bilong ol hap we ol i bin kam aut long en. ³⁴ I kam inap long nau ol i bihainim yet ol tumbuna pasin bilong ol. Ol i no lotuim God Yawe, i no bihainim ol tok bilong em na ol lo God Yawe i bin givim long ol tumbuna bilong Jekop - husait em i kolim Israel - ³⁵ na wantaim dispela lain God Yawe i mekim kontrak na i tok strong long ol, "Yupela bai i no pret long ol arapela god, brukim skru long ol, lotuim ol na givim ofa i go long ol. ³⁶ Tasol God Yawe husait i kisim yupela i kam aut long kantri Isip wantaim bikpela strong na han i antap tru em tasol yupela i mas lotuim, long em tasol bai yupela i brukim skru na long em tasol bai yupela i givim ofa. ³⁷ Yupela i mas oltaim lukautim na bihainim ol tok na lo em i bin raitim. Olsem yupela i noken pret long ol arapela god giaman, ³⁸ na dispela kontrak mi bin mekim wantaim yupela, yupela i noken lus tingting na noken lotuim ol arapela god giaman. ³⁹ Tasol God Yawe ,God bilong yupela em yupela i mas lotuim. Em bai i lukautim yupela long ol strongpela birua bilong yupela." ⁴⁰ Ol i no inap harim bilong wanem ol i mekim wankain pasin nogut ol i bin mekim bipo. ⁴¹ Olsem na ol dispela kantri i pretim tru God Yawe na tu ol i lotuim ol giaman god na ol pikinini bilong ol i mekim wankain, olsem tu ol tumbuna pikinini i mekim wankain pasin. Ol i mekim ol kain nogut pasin ol tumbuna bilong ol i bin mekim i kam inap long nau.