5 ¹ Orait, ol brata, nogat nid long rait i kam long yupela long taim Bikpela bai i kam bek. ² Long wanem, yupela yet i save pinis olsem, dei bilong Bikpela bai i kam olsem wanpela stilman long nait. ³ Taim ol man i tok, "Olgeta samting i stap orait na i nogat wanpela bagarap i stap," Orait long dispela taim, bikpela bagarap bai i kamap long ol. Dispela bagarap bai i olsem pen mama i save pilim taim em i laik karim pikinini. Dispela ol man bai i nogat rot long ranawe long dispela bagarap. ⁴ Tasol yupela ol brata, yupela i no stap long bikpela tudak bai dispela dei i abrusim yupela olsem wanpela stilman. ⁵ Long wanem, yupela i stap olsem ol pikinini bilong lait na bilong dei. Yumi no ol pikinini bilong nait na bilong tudak. ⁶ Olsem na yumi noken slip olsem ol arapela. Yumi mas was na i stap olsem man i gat gutpela tingting. ⁷ Long wanem, ol lain husait i save slip, ol i save slip long nait, na ol lain husait i save spak, ol i save spak long nait. ⁸ Tasol taim yumi stap olsem ol lain bilong dei, olgeta taim bai yumi gat gutpela tingting, na yumi mas werim pasin bilong bilip na pasin bilong laikim ol narapela olsem siot kapa. Yumi mas werim het kapa olsem Bikpela bai kam na kisim yumi. ⁹ Long wanem, God i no bin makim yumi long kisim belhat bilong em, tasol long Bikpela bilong yumi Jisas Krais em i kisim bek yumi. ¹⁰ Em tasol em man husait i bin dai long yumi, bai yumi ken stap laip wantaim em, long taim yumi stap laip o long taim yumi dai pinis. ¹¹ Olsem tasol, helpim wanpela long narapela na strongim bilip bilong narapela, wankain olsem yupela i wok long mekim. ¹² Mipela i askim yupela ol brata, long luksave long ol lain husait i wok long mekim bikpela wok namel long yupela, na ol lida bilong yupela insait long Bikpela, na tu long ol lain husait i save stretim yupela. ¹³ Na tu, mipela i askim yupela long luksave long ol dispela lain, insait long pasin bilong laikim, long wanem, ol i bin mekim wok . Yupela i mas gat bel isi namel long yupela yet. ¹⁴ Mipela i tok strong long yupela ol brata: na tok lukaut long ol lain husait i no stap stret na strongnim bilip bilong ol lain husait i no pilim orait, na helpim ol lain husait i nogat strong, na mekim pasin isi long olgeta lain. ¹⁵ Yupela i mas lukim olsem nogat wanpela long yupela i bekim bek ol pasin nogut long ol narapela i mekim long yupela. Tasol, yupela i mas mekim samting i gutpela long wanpela long narapela na long olgeta lain tu. ¹⁶ Yupela i mas amamas oltaim. ¹⁷ Prea olgeta taim. ¹⁸ Long olgeta samting tok tenkyu long Bikpela. Long wanem, dispela em laik bilong God long yupela mekim insait long Krais Jisas. ¹⁹ Noken pasim wok bilong Holi Spirit. ²⁰ Na noken les long ol tok profet. ²¹ Skelim olgeta samting na holim pas wanem em i gutpela. ²² Stap long we long olgeta pasin nogut long taim ol i kamap ples klia. ²³ God bilong bel isi i ken mekim yupela i kamap stret olgeta. Na spirit, tewel, na bodi bilong yupela i ken stap gut na i nogat asua long taim Bikpela Jisas Krais i kam bek. ²⁴ Man husait i singautim yupela i save stap redi tru oltaim, em bai i mekim dispela i kamap. ²⁵ Ol brata, prea long mipela tu. ²⁶ Mekim gutpela pasin long olgeta brata wantaim pasin bilong laikim ol narapela. ²⁷ Mi askim yupela, long nem bilong Bikpela, bai yupela i ken ritim dispela pas i go long olgeta brata. ²⁸ Marimari bilong Bikpela bilong yumi Jisas Krais em bai i stap wantaim yupela.