4 ¹ Ol brata, long pinisim tok, mipela i laik strongim bel bilong yupela moa long i stap strong insait long Kraist Jisas, wankain olsem yupela i bin kisim skul long mipela long save long pasin bilong wokabaut stret long ai bilong God. Na yupela i ken mekim stretpela pasin bilong God moa moa yet. ² Yupela i bin kisim skul pinis long mipela long sanap strong insait long Bikpela Jisas. ³ Dispela em i laik bilong God long yupela mas i stap klin, olsem na yupela i mas stap longwe long pasin pamuk na abrusim ol kainkain pasin pamuk, ⁴ na em i laik bai wanwan bilong yupela i mas save long stap tru wantaim meri bilong yupela insait long stretpela pasin na yupela bai i no inap mekim sin long ai bilong God. ⁵ Yupela i mas i stap longwe long olgeta kain laik nogut bilong bodi (na yupela i no ken mekim pasin nogut long meri bilong yupela olsem ol man i no save long tok bilong God i save mekim). ⁶ Long dispela kain pasin olsem, noken larim wanpela man i mekim nogut na givim hevi long brata bilong em. Long wanem, mipela i tok strong long yupela olsem Bikpela yet bai bekim ol dispela pasin nogut wantaim pe nogut long husait man i mekim ol dispela kain pasin. ⁷ God i no singautim yumi long bihainim pasin nogut, nogat, em i singautim yumi long bihainim stretpela pasin bilong em. ⁸ Olsem na husait i sakim dispela tok, em i no sakim tok bilong man, nogat, em i sakim tok bilong God em husait i bin givim Holi Spirit long yupela. ⁹ Mi laik tok strong long yupela olsem, yupela i mas laikim tru ol arapela bilip manmeri, nogat man bai rait long yupela long pasin bilong laikim arapela, long wanem, God yet i bin soim yupela pinis long pasin bilong laikim tru ol arapela. ¹⁰ Long wanem, yupela i bin mekim pinis gutpela pasin bilong laikim tru ol bilip manmeri husait i stap long olgeta hap bilong Masedonia. Olsem na mipela i laik tokim yupela long mekim dispela pasin i go moa yet. ¹¹ Mipela i laik bai yupela i mas wok strong long stap isi na noken toktok planti long sindaun bilong ol arapela man. Yupela i mas mekim gutpela wok long han bilong yupela, olsem mipela i bin tokim yupela long mekim. ¹² Na bai yupela i wokabaut stret long ai bilong ol manmeri husait i no bilip long God, na bai yupela i no inap sot long wanpela samting. ¹³ Ol brata, mipela i laik bai yupela i save gut long wanem samting bai i kamap long ol bilip man husait i dai pinis.Yupela i noken kamap olsem ol man i no save bilip long God. Ol i sori tumas long ol man i dai pinis, long wanem, ol yet i no inap kisim laip gen taim ol i dai. ¹⁴ Sapos mipela i bilip olsem Jisas i bin dai na i kirap bek gen, orait, long wankain pasin tasol God bai kirapim ol man husait i bilip long em na i dai, na God bai i kisim ol i kam wantaim Jisas. ¹⁵ Long dispela as mipela i tokim yupela wantaim tok bilong God olsem, mipela ol man husait i stap laip yet long taim Jisas i kam bek gen, bai i no inap go paslain long bungim Jisas. Nogat, ol man husait i bilip long God na i dai pinis, ol bai i kirap na bungim Jisas paslain long yumi. ¹⁶ Bikpela yet bai i kam daun long heven wantaim bikpela nois na namba wan ensel bai i winim biugel bilong God na ol manmeri husait i bilip long God na i dai pinis bai i kirap pastaim. ¹⁷ Bihain mipela husait i stap laip long dispela taim bai bung wantaim ol man husait i bilip na i dai. Na mipela olgeta bai bungim Jisas long klaut. Long dispela pasin bai mipela i stap oltaim oltaim wantaim God. ¹⁸ Olsem na yupela i mas strongim wanpela bilong narapela wantaim dispela tok bilong God.