3 ¹ Liklik mangi Samuel i mekim wok bilong God Yawe aninit long Eli. Tok bilong God Yawe i no kamap ples klia na i no gat planti driman. ² Long dispela taim ai bilong Eli em i pas liklik na em i no inap lukluk gut na em i slip long bet bilong em. ³ Lam bilong God i no dai yet na Samuel i go long slip long haus bilong God Yawe long hap bokis kontrak i stap long en. ⁴ God Yawe i singaut long Samuel, husait i tok," Mi stap long hia." ⁵ Samuel i ran i go long Eli na i tok olsem," Mi harim yu singautim mi na mi kam." Eli i tok," Mi no singautim yu, go na slip gen." Olsem na Samuel i go na silip gen. ⁶ God Yawe i singaut gen," Samuel."Olsem na Samuel i kirap na i go long Eli na i tok," Mi harim yu singautim mi na mi kam."Eli i bekim," Mi i no singautim yu, pikinini man bilong mi, yu go na slip gen." ⁷ Na Samuel i no bin save gut long God Yawe, o kisim tok long God Yawe o harim em i bin toktok long em. ⁸ God Yawe i singautim Samuel gen namba tri taim. Samuel i kirap gen na i go long Eli na tok,"Mi harim yu singautim mi na mi kam."Nau Eli i luksave olsem God Yawe i singautim liklik mangi. ⁹ Na Eli i tokim Samuel, " Go na slip gen; sapos em i singautim yu gen , yu i mas tok," Toktok, God Yawe, wokman bilong yu i harim." Olsem na Samuel i go slip long ples bilong em wanpela taim gen. ¹⁰ God Yawe i kam na sanap; em i singaut gen olsem ol arepela taim, " Samuel, Samuel." Na Samuel i tok," Toktok, wokman bilong yu i harim." ¹¹ God Yawe i tokim Samuel," Lukim mi bai mekim wanpela samting insait long Israel na taim ol harim ol bai pilim nogut tru. ¹² Long dispela taim mi bai mekim save long ol femali bilong Eli long ol wanem samting mi tok bai mi mekim, long stat i go inap long pinis. ¹³ Mi bin tokim em olsem mi bai mekim save long ol femili bilong em long ol pasin nogut em i save, bilong wanem ol pikinini man bilong em i kisim bagarap i kam antap long ol yet na em i no stopim ol. ¹⁴ Long dispela pasin nogut mi tok strong long ol femili bilong Eli olsem sin bilong ol bai i no gat wanpela ofa i ken rausim. ¹⁵ Samuel i slip i go inap long moning na bihain em i opim dua bilong haus bilong God Yawe. Tasol Samuel i pret long tokim Eli long dispela driman. ¹⁶ Bihain Eli i singautim Samuel na i tok," Samuel, pikinini man bilong mi." Samuel i tok," Mi stap long hia." ¹⁷ Em i tok," Wanem tok God i tokim yu? Plis yu noken haitim long mi. Bai God i mekim save long yu, sapos yu haitim wanpela samting long mi long ol tok em i tokim yu." ¹⁸ Samuel i tokim em olgeta samting; em i no haitim wanpela samting long em. Eli i tok,"Em i God Yawe. Larim em i mekim wanem samting em i ting olsem em i gutpela long em. ¹⁹ Samuel i kamap bikpela man na God Yawe i stap wantaim em na em i no larim wanpela driman i lus nating. ²⁰ Olgeta manmeri bilong Israel i stap long Dan i go inap long Besiba i save olsem God Yawe i makim Samuel olsem profet bilong em. ²¹ God Yawe i kamap ples klia gen long Silo na em i bin kamapim em yet long Samuel long Silo insait long tok bilong em.