1
Mar ka in Yesus krais God atatin awagamun dimunta.
2
Teq wagam ka alulin in kwaziqmo tugwahtimta. Gamuk na bilam, ahol waqiy ham.Ya teq mat araq emid in yaqgo gamuk ad danmeb lehdaq ham. Leheq in ninmen dan tuwastitay daq.
3
Mat na aqez saw amatawun haiqtab lileyim bilaq ne iyahta ayon dan balaw toniy haqaq ham.Ad ne in ayon danteq na wastitayid titnonnan haqyaq ham.
4
An abeb Aisaya mat anan bilamta na atatin gwahtiqim saw amataun haiqtab osad in on mataw tuhuz negyaq. In anan Jon haqayta. Ad in kazaq mataw gibilenyaq. Ne ginad biliyeq ne gigo daq teq ginad meqinta bunmo gileh ugiy haqyaq. Gileh ugad ne bolsa ya huz negiq haqyaq. Ne nazaq emsaq teq God in ne gigo daq teq ginad meqinta na tigiwalem bugdaq haqyaq.
5
Haqsa mataw saw Judiya-ibta teq uliq Jerusalem-ubta kabemmo in Jon ago gamuk huritnan agerab tubol yaqay. Bolad in gigo daq teq ginad meqinta ulum hasa Jon giqad le yuw Jodan-ib tuhuz negyaq.
6
Jon ago tubusan karuw anan kemel haqayta na asan ulim emiyta. Teq in karuw asan asor am gan nog ahulib am wazeq luwyaqta. Luwad in kasum teq garanab kuqbiq akokin neqad luwyaqta.
7
Ad in mataw kazaq gibilenyaq, Mat araq teq ya ibeb boldaqta na abin in ya ibin uriyamta haqyaq. Ya in ahenibta haqyaq. In yaqgo Iyahta haqyaq. Ya in ago kabibiy mat samanta haqyaq.
8
Ya ne yuwibmo huz negiyta haqyaq. Ari mat Iyahta na boleq teq God ago Bugaw Dimunta na amalib ne tigihuz negdaq haqyaq.
9
Kam nab Yesus uliq Nasaret saw Galiliy-ibta hulosim bolan Jon yuw Jodan-ib in tuhuz ug.
10
Huz ugan Yesus hidmo yuw hulosim dubub gwaladmo ame ulilib gwalehim kait misireq nog iyim aqez hasim ussa in ahol wam. Ahol waqsa God ago Bugaw Dimunta ah husta nog iyim in amalib tigehitim.
11
Gehitiqan Heven-ib God aqez bilam, Ni ya itatin ham. Ya ni ninan inad bilaqsa ya igem dimun diq iyaqta ham.
12
Ari God ago Bugaw Dimunta in Yesus eman saw araq amatawun haiqtab tilah.
13
Lehim saw nab in kam 40 nazaqmo didaq haiqmo os. Osaq Satan gwahtiqim Yesus daq araq meqinta emdaq haqad tuqulum waqyaq. Saw nab Yesus amomo karuw kwasikta nenaq osyaq. Ossamo Angelo bolim in tuqulum sihyaq.
14
Ari mataw in Jon wazim bit giqirquran osaytab eman ossa teq abeb Yesus saw Galiliy-ib gwahtiqim God ago gamuk dimunta on mataw tigibilenyaq.
15
In bilaqyaq God kwaziqmo kam anan bilaqayta teq gwahtiqdaq hamta na muran tugwahtim haqyaq. Gwahtiqan God ago maror bolim sinsin tiqiy haqyaq. Ne ginad buliyad gigo daq meqinta gileh ugiy haqyaq. Ad ne God ago gamuk dimunta ka anan helmo haqiy haqyaq.
16
Ari Yesus yuw kurorqan Galiliy aqurumnib lehad luwim in Saimon amikqan Andru inaq dob hunegim nabiq waqad luwsa tigibiy. In giger kabiy naqmo em yaqayta amatawun.
17
Yesus mataw giger na gibiyad gibilan, Ne ya imuzeq boliy ham. Bolsa ya ne giqisihunid teq ne nabiq waqayta na nazaqmo teq ne mataw tigiwaq daqay ham.
18
Haqan hidmo giger na dob hulosan ussa in Yesus muzim inaq tilehiy.
19
Yesus in giger na nenaq asitmo ta leh nog iyimmo in Sebediy atatin giger Jems ama Jon inaq tigibiy. In nazaqmo muy-ib osad dob wastitayad osiy.
20
Ossa Yesus giger na gililewunan in gimam Sebediy ago kabibiy on mataw nenaq gihulosan muy-ib ossa in Yesus muzim inaq tilehiy.
21
Ari Juda gigo kam araq iyahta anan Sabat haqaytab Yesus in ago disaipel nenaq taun Kapenaum-ub tilehiy. Lehim in Juda gigo mataw on suleq tineg yaqay.
22
Suleq negsa Juda on mataw na in ritenad bilaq yaqay, Mat ka in bilaqne mat araq abin anan inqta gamuk bilaq nog iyaq haq yaqay.
23
Ari abeb mat araq aholib bugaw meqinta inaqta in Juda gigo lotu bit amuganib osaqta na in dedibmo lileyim bilaqyaq.
24
Yesus Nasaret-ibta haqyaq i ezaq nitonam haqyaq, ni gibuq ulum nan bol e? haqyaq. Ni nog na i ningo tuhurit haqyaq . Ni God Atatin Dimunta.
25
Yesus bugaw meqinta mat na amalib usta na, amalib lileyim bulon, ni mat huloseq le ham.
26
Hid naqmo bugaw meqinta na Yesus aqez huritadmo mat na wam hunegan le woqsa in ahol nan emad wo tilah.
27
Mataw on bunmo in daq na ahol waqad in gihol turuh nemyaq. Turuh nemsa in an susumun ugyaqay, Ka nagah diq haq yaqay? ka in ago Gamuk Muturta daqag ya haq yaqay. Bugaw Meqinta inaqmo ago gamuk huritay haqiy.
28
Gamuk ka in Galiliy-ib og saw bunmo tilah.
29
Abeb Yesus ago disaipel nenaq Juda gigo lotu abitin hulosim bo asanib gwahtiqim in Saimon ayow Andru teq Jems ayow Jon inaq gigo bitab tilehiy.
30
Lehan disaipel in Yesus buloniy, Saimon awe anen moqad nawa usaq haqiy.
31
Disapel na nazaq haqan Yesus bo aw na aben wazim lilewunan tiqiram. Hid naq mo moq na hulosan in mataw na gimen didaq tuqoyaq.
32
Nab zeq tuqulah. Ulehsa mataw dimdimunta in mataw asor gigo moq inaq ta teq asor na bugaw meqinta gimuganib usaqta ad Yesus ago hib tuboliy.
33
Mataw on asanibta bo Juda gigo taun aqezab humab tuwoliy.
34
Yesus in on mataw kabemmo gigo moq amo amo inaqta teq giholib bugaw meqinta inaqta inaqmo tigimuzyaq. Ta teq Yesus in bugaw meqinta gigo hib atuw hiqiyaq, na ezaqgo bugaw meqinta na in Yesus ago huritiy.
35
Tarow asor usaqmo Yesus eraqim leh uliq araqab gimam inaq gamuk emyaq.
36
Emad ossa Saimom teq ago disaipel asor in ginaq lahta na in Yesus nagim tilehiy.
37
In leh ahol waqad in kazaq buloniy, mataw on bunmo in ninagunay haqiy.
38
Saimon teq ago disaipel asor na leh nazaq Yesus bulonan in gibilan, i taun araqab lehiy. Nab teq ya imam ago gamuk bilaq daiq, na ezaqgo nagah alulin inaq iyan ya kab bolta haqyaq.
39
Yesus in taun Galiliy ago og saw bunmotab lehad God ago gamuk bilaqad teq Juda gigo lotu abitan-ib gwahtiqim bugaw meqinta na inaqmo gimuzyaq.
40
Kam araq ab mat araq ago moq Leprasiy inaqta Yesus ago hib bolim abakbakan ulum laquwim in Yesus bulon, ni yaqgo ninad meqniyeq teq ni ya iqemid ya mutur iyyiq ham.
41
In nazaq haqan Yesus in mat na anan anad meqniyan in aben amalib emad bilam, Ya inad nigaiq ham.
42
Haqsamo moq lepra na hulosan in mat dimunta tiqiy.
43
Yesus nan atoranmo bulonim bilam,
44
Ni mataw asor ta hi gibilen ham, naga ningo hib gwahtiqan ni ahol wamta ka haqad in bilam ham. Ni leheq Iyahta ago kabibiy mat bulonid in nisan na ayon esayta God ugan ham. Bilaqne Moses bilam, in bilaqne ningo wagam nog iyeq gigo hib leh daq ham.
45
Haiqgam mat na ta lehim mataw bunmo tigibilan nagan Yesus aholib amta na ta nazaq haqan Yesus in uliq araq iyahta araqab a hi lom. In iraqim uliqmo tab tilah. Lehan on mataw bunmo ingo hib tuboliy.