¹ Ari asor in le tihiqiyan Yesus uliq Kapaneam-ub a ta lah. Lehim ossa mataw bolim Yesus bitab osaqta na ago tuhuritiy. ² Huritim mataw kabemmo bolim bit nab humab wolan ban tihiqiy bug. Bit aqezab nazaqmo ban haiq tiqiymo. Na matawmo osan lah. Sa Yesus gamuk dimunta tigibilenyaq. ³ Gibilenad ossa mataw aweweqmo in mat araq moqaqta banab emim sorim a boliy. Mat na abensen adidtin moqan in asit a hi luw yaqta. ⁴ Ari in mat na abolan bit nab mataw ban tuwaq bugan in ad Yesus agerab loqgo dan haiq. Nazaq iyan in bit ahuqunib gwalehim Yesus osaq diqta nab in asor tihikneriy. Hiknerim in mat moqaqta na abanan inaqmo am emim Yesus osaqtab nabmo eman tuwolah. ⁵ Wolehan Yesus mataw na ginad helta ahol waqadmo in mat moqaqta na tubulon, Yaqgo amun ham ya ningo daq meqinta tigiwalem bug ham. ⁶ Haqan mataw Moses ago gunun hurit kemiyta na asor Yesus agerab osad in ginadibmo susumunim bilaq, ⁷ Nagaqgo mat ka God ago ban waq nog iyim kazaq God bilawunaq? haqiy. Og kab mat araq mataw gigo daq meqinta walemdaqta haiqgam haqiy. Naqmo God amulikmoqmo ago kabiyta haqiy. ⁸ Mataw na nazaq ginadib susumunsa Yesus giloyin kemim gibilan,Doq tonan ne ginad haresmo nazaq emay?ham. ⁹ Ya naga gamukin bilaqad teq ni nan a hi yag daqay?ham.Ya ningo daq meqinta tigiwalem"haqdaiq o" Ni eraqeq ningo ban waqeq aleh ham. ¹⁰ Teq Mat Atatin in og kab daq meqinta walemgo azawayin ahulib usaqta na ago ne hurit daqay haqad in mat abensen moqan banab usaqta na tubulon, ¹¹ Ya nibilenaiq ham. Ni eraqeq ningo us ban waqeq ad ningo bitab a leh ham. ¹² Haqanmo mat na eraqim mataw na gimeb ago ban sorim ad ago bitab tilah. A lehsa mataw bunmo gihol ritensa in God abin iluwad bilaq yaqay, I nagah kaziqta kwaziqmo ahol a hi wawta haq yaqay. ¹³ Ari Yesus yuw kurorqan aqurumnib a ta lehan mataw kabemmo in agerab tuboliy. Bolan Yesus in God ago suleq tigibilenyaq. ¹⁴ Gibilenad ossim teq eraqim lehad luwim in Alfius atatin Liway ahol tuwam. Mat na takis abitnib ago kabiy takis waqad ossa Yesus ahol waqad tubulon, Ni ya imuzeq bol ham. Haqanmo Liway eraqim Yesus muzim inaq tilah. ¹⁵ Ari abeb Yesus in Liway ago bitab didaq neqad tuqos. Ossa mataw gibin meqinta takis waqayta teq mataw daq meqinta emayta nenaq kabemmo bo Yesus ago disaipel nenaq bit nab didaq neqad tuqosiymo. Matw naqanta kabemmo Yesus muzinad inaq luw yaqayta. ¹⁶ In bunmo nazaq Yesus inaq didaq neqad ossa Farisi asor gibiyad ossim in Yesus ago disaipel tigibileniy, Nagaqgo Yesus in mataw daq meqinta emayta ko mataw takis waqyata ko nenaq didaq neqaq? haqiy. ^{17 17} Haqsa Yesus huritim gibilan, Mataw gigo moq haiqta na in le dokta ahol a hi waqayta ham. Mataw gigo moq inaqta naqmo dokta gohib le haiqta ham. Ya on mataw titnon ta gililewunan a hi bol ham. Ya on mataw daq meqinta emad osayta naqmo gililewunan bolta ham. ¹⁸ Ari Jon mataw huz negyaqta na ago disaipel teq Farisi nenaq in tuteqmo didaq udin yaqay ta. Nazaq iyan mataw asor bolim Yesus buloniy, Ezaqgo Jon ago disaipel na teq Farisi gigo disaipel na in udinsa teq ningo disaipel a hi udinayta? haqiy. Haqan Yesus gamuk awowun araq kazq gibilan, Mat araq aw waqnan tonsa in ayogniz boleq inaq osad in ginad meqniysa didaq udin daqay ye? ham. Mataw na giyow inaq osad iyan in didaq a hi udin daqay ham. ²⁰ Ari abeb mataw asor boleq mat aw waqaqta na ayogniz tuqudin daqay ham. ²¹ Haqad in bilam, Mataw tubusan muturta waqim amalib tubusan kwaziqta na suholsa tubusan muturta irnik toneq le amik iyidmo in tubusan kwaziqta na bulsireqid ayahmo diq a ta tartaydaq ham. ²² Teq mataw wain ayun muturta meme asan kwaziqtab a hi tinayta ham. In nazaq tonid wain aqurin gwalad huhu nemsa meme asan kwaziqta na tartayid wain ayun mutbaleq ogib woqsa meme asan na timeqniydaqmo ham. Nazaq iyan mataw meme asan muturtamo waqim wain ayun muturta tineqayta ham. ²³ Ari teq Juda gigo lotu akaman araqab Yesus ago disaipel nenaq kabiy araq wit leyiy ta aduganib gwahtiqim tileh yaqay. Lehad in ago disaipel gigem moqsa wit anagin asor tuguraq yaqay. ²⁴ Guraqsa Farisi asor gibiyad in Yesus buloniy, Ni ko gibiy haqiy. Nagaqgo in lotu akaman ago gunun itiyonimkabiyab wit tuguraqay? haqiy. ²⁵ Haqan Yesus gibilan, Nabag ne Devit ago dauh nenaq in nagah osgo siqim iyim gigemnan moqad teq Devit daq amta na awagamun ne ahol a hi waqiy-ya ham. ²⁶ Tamaz mat danmebta abiyahta akamnib Devit le God ago bit aduganib gwahtiqim God ameb bret eman usta na waqim tinam ham. Bret na gunun emiyta ham. Mataw tamaz emayta naqmo gimomo bret na nqayta ham. Teq haiq ham. Devit agem moq titaysa neqad in bret tawonta na asor in ayogniz negan tineqiymo ham. Ta teq in daq meqinta a hi emiy ham. ²⁷ Haqad in gibilan, God mataw giqemim gimeqin tonan lotu akaman eman a hi gwahtim ham. Haiq ham. In mataw gidimun tonan haqad lotu akaman eman gwahtim ham. ²⁸ Nazaq iyan Mat Atatin in lotu akaman anamrenmo diq iyim inmo mataw kam nab ezaq luw os daqayta na ago tigibilendaqta ham.