¹ Vankundwa, ishi uno we ukalata wavuvili wenkuvasimbila imwe, muli vyonti vanava nkuvakumbusya nukuziyinzania insivo zyinyu ² ukuti mukumbuhaje amazwi ge vatalisile ukugayanga ava kuvwi avafinjile nu lulajilo ulwa Mwene umuposhi witu lwapelilwe ukujendela muva positili vitu. ³ Zye mwandile ukuzimanya suti zinizi, ukuti avalovezyo valiyinza mu masiku agavumalilo. ⁴ Avene valiyovrezya nu kushizya ukuyana nivinyonywa vyavo. Avene valiti, ''Luli kwi ulufingwi ulwa vwinzilo vwakwe? Ukufuma lwe ava Tata vakasite utulo, vyonti ivintu vyali mwe vyaveleye, ukufuma kuvwandilo uvwa kupelwa.'' ⁵ She vakuvombela umwenzo ukuluvya ukuti hali izwi lya Mulungu ni mwanya ninsi vihinza vyavapa kufuma kuminzi nakujendela muminzi, ⁶ ukujendela mwisho insi kuhavalilo hehala yihananjiha, lwe yidwivile muminzi. ⁷ Mwizwi lyelila imwanya ninsi zisunjililwe numoto, zisengulilwe pisiku ilya vulonzi nu lunanjiho ulwa vantu ve vatahamunyilaga uMulungu. ⁸ Mutahepushe kuve vakumanyisizye, vankundwa, ukuti isiku lyoka kwa mwene lili ngati maha 1,000, na maha 1,000 gali ngati lisiku lyoka. ⁹ Umwene atakuhavya ukufisya ulufingwi lwakwe inza she vamo vakusiva ukuti akuzihavya zyenezyo. Muvuzilon vwakwe, uwene wakuteshela pantanzi yinyu. Ataganile ukuti wumo uwimwe ayinze alove, nkandi vonti vave nuvuzilo uvwalupinduho. ¹⁰ Ilyenenyene isiku ilya Mwene liliyinza ngati mwiva: pe imwanya zilisila nishongo ishipiti nkani. Pe ivifumo vya vintu vyonti vilipya nu moto, ninsi nimbombo zyonti zye zili mumo zilipya nzila. ¹¹ Nashe inga vyonti vinivi vilinanjiha mwidala linili, muhola vuli uwa vantu she imwe muve? Imwe mwihalaje muvufinjile uvwihazi vwa vunyila Mulungu. ¹² Musuvilaje nu kulindilila uvwinzilo vwisiku lya Mulungu. Pisiku lila; imwanya zilinanjiha numoto, nivifumo vilisunguliha nilungula ipiti nkani. ¹³ Nkandi ukulandatana nulufingwi lwakwe lwe tukulindilila imwanya impya ninsi impya, kwe avagolosu valitendama. ¹⁴ Ilelo, vankundwa, lwe mukusuvila ivintu vinivi, muyikungule ukuva mwe vazelu navadsita halema kuminso gakwe, mu mutende. ¹⁵ Havili, muvasajile uvutehamu uvwa Mwene witu ukuva muposhi, ngati mwe unkundwa uwamwitu u Pavuli avasimbiye imwe, ukulandata ninjele zye zyapelilwe ku kwakwe. ¹⁶ U Pavuli akuyanga zinizi muvonti avakalata vakwe, muli zimo ngomu pakuzimanya. Avasita kumanyila na vantu ve vatakwimilila ishete vakugalula ivintub vinivi, inza she vakuvomba kumasimbo aganji, ku lunanjiho ulwavo nu lwaho. ¹⁷ Ilelo, vankundwa, pe mumanyile nzila zinizi lwe kushili, muyileme mwevenesho ukuti mutahasovele nivyakuvatezya avantu ve vatakulandata indajilo nukuvefya pe musimisile ulwitiho lwinyu. ¹⁸ Nkandi mukule mukwila na muvumanyi vwa Mwene witu nu muposhi uYesu Chilisiti. Uvushindamu vuve kukwakwe shinishi mpaka pisiku isita kusila nalumo. Ameni!