Kati i weki aye tize ba
Bikoro 7
1
Kati i weki uye tize, barki kati a weki shi ni cangi.
2
Barki imum me sa ya weki, ine ini adi weki shi ni uyanga sa ya guta ni, une uni adi guti shi ni cangi.
3
Barki nyanini u hira nikpeki a nije ni uho me, daki wa ira ukunti me sa ura a niwe nije me ba?
4
Aneni udi gu inu uhenu uwe, ca in kari we nikpeki a nije nuwe me, a hu inu kunti a nuwe nije me?
5
Hu unu imumu apuru, tuba u kara ukunti me sa u ra anije nuwe me, uduku iri ukpeki me sa ura anije nu ho me memerum.
6
Kati i nya iwoci imum ige sa irizi ba, kati i kuri i reki kapadari imum ihuma barki wa di patili, wa gamirka wa jani shi.
7
Iko ni, adi nya shi, nyara ni, idi kem vavi ni adi poki shi ni.
8
Vat desa ma iko adi nya me, unu nyara ma di kem, desa ma vavi adi poki me ni.
9
Aveni anyimo ashi me, desa vana ma di iki me imum yare ma nya me nipo?
10
Nani ingi ma iko me bicere, ma di nya me biwa?
11
A' anime shi ande sa izin muriba mu buri i rusa u nyinza ahana ashi me imum iriri, ane ani acoo ashi me sa ma ra asesere, sa ma nyinza desa ma iko me imum iriri?
12
A' anime vat imum be sa i nyara anu wa wuzi shi ni, shi cangi wuzi ni we ni, ane ani u inko u tize anyo anu kurzuzo utize ta Asere uzi.
14
Barki anatukum uhana ivai azi shut, una me uzini ijasi utarsa anu ukem uni wa da ori me ba.
15
Wuza ni seke in anu kurzozo utize ti macico, ande sa wa ehzen shi unu subu itam, a anime kadure we inyanyau wani anu ugazara.
16
Idi rusi we usuro ahana awe, anu wa da ke wa gazi ayom abikana nani apom anyimo ikamshi?
17
Ane ani vat utiti uriri u yozo ahana a riri, utiti uzenzeng u yozo ahana azenzeng.
18
Utiti uriri uda nyinza me ahana azenzeng ba, ane ani utiti uzenzeng uda nyinza me ahana ariri ba.
19
Vat utiti ugebe sa u nyinza ahana ariri ba adi koriko uni a punsi ura.
20
Barki anime ani, usuro ahana awe me adi rusi we.
21
Inzo konde aveni sa ma gusan mi, Ugomo Asere, Ugomo Asere, ma di ribe a Tigomo ta Asesere ba, senke ande sa wa wuza imum be sa aco am asesere ma nyara cas.
22
Anu gbardang wa di gusin mi ronu ugino me,Ugomo Asere, Ugomo Asere, daki ta kurzuzo tize tuwe me anyimo aniza nuwe me ba, daki ta suzo agbergene anyimo aniza nuwe me ba, ta kuri ti wuzi timum ti dang anyimo aniza nuwe ba ?
23
Abine me indi gun we, in tam inshi ba hirani aba me shi anu a katuma kaburi.
24
A,ani me vat desa ma kunna tize tum ma tarsa ma di cukuno gusi desa maa bari akura asesere anipo.
25
Ure wa rubi, bidurna bi eh, upebu u hiri uvavi akura me daki arizo ba, barki sa a bari ani asesere anipo
26
De sa ma kunna tize tum daki ma tarsa ba ma zi gusi ubabana ugino me sa ma bari akura Asesere abikiki.
27
Ure wa rubi bidurna bi eh upebu u hiri uvavi akura me arizi aruturzuno ruruk.''
28
Sa yeso maa mari ubo utize tigino me, anu gbardang wa kunna biyau unu dungara ume me.
29
Barki Maa zi inu dungura uwe unu bari, da kasi anu uyettike awe me ba.