¹ Sa Yeso ma tuno a nipo me, ni'ori na anu gbardang ni tarsi me. ² Ba ure unu koni u yorso u tibo ma eh ahira ame ma tunguno aje ma gu Asere inki wa hem, uda ke kpicum kasi u inko tize ti Asere." ³ Yeso ma witi tari ma dari me, ma gu, "Ma hem ma cukuno lau." Ahira me tikuturu me ti huma. ⁴ Yeso ma gun me, "Kati ubuki uye iri imum. Dusa imum iwe, ka bezi nice nuwe ahira unu udang u katuma ka Asere nya usadika gusi ubuka u Musa barki ubezi ahira awe.'' ⁵ Sa Yeso maa ribe u kafarnahum ure unu aje u nikara ni nikono ma eh ahira ame ma vavi me tari. ⁶ Ma gu, "Ugomo Asere, urere um ma rari akura ma wono anire ni kira ma zin nu zitto kang." ⁷ Yeso ma gun me, "Indi eh' in human me." ⁸ Unu aje nikara ni nikono ma gu, "Ugomo Asere, ma bari u eh akura am ba, senke u buki tize vana um ma di huma. ⁹ Barki mi cangi in ra adizi ubari u uye, in kuri inzin in anu a nikara ni nikono in nadizi am. senke in gu in unu uge, 'Hana' a ma ha, uye in gun me 'aye' a ma eh, in gu inu urere um, wuza ige imum a ma wuzi ini." ¹⁰ Sa yeso ma kunna anime, ma basa abanga ma gun in anu tarsa ume, "In boo shi kadure daki mamu kem unu hem anyimo israila kasi aname ba. ¹¹ Ma buka shi, anu wa di eh gbardang u suro in naza nan nadizi wa cukuno ina are imum yare nan ki Ibrahim, a Ishaku a yakubu anyimo a tigomo ta Asesere. ¹² Ahana ati gomo adi reki we amareu abini me wa di shi unu rumza anyo. ¹³ Yeso ma gun in unu nikara ni nikono me, "Dusa! a ca uhem me sa wa hem u cukuno we anime." Uganiya me urere me ma huma. ¹⁴ Sa yeso ma ribe akura a Bitrus, ma iri a'ino uneh u Bitrus ma rari in ipibbi. ¹⁵ Yeso ma dari me a tari, ma huma. Ma tubi u nonzo ume. ¹⁶ Sa uwunjoro wa wunna, wa ehzi Yeso in anu sa wa zin in agbergene gbardang. Ma suso we in tize cas, ma huma in anu a tikoni vat. ¹⁷ Anime ani tize ti Ishaya unu kurzuzo utize Asere ta myincina, agi, " Me in nice nume ma ziki ukoni apum aru ma kari tikoni turu." ¹⁸ Sa Yeso ma ira ni'ori ni anu na keti me gbardang, ma nya tize inu gunna wa kafa uhuru uraba udang u Galili. ¹⁹ Ba ure unu u nyettike u tize ta Asere ma eh ma gun me, '' Unu dungara, indi tarsi we vat ahira me sa uhazani.'' ²⁰ Yeso ma gun me, ''Ikukkure i zin in tiwa tuwe, i nying ya sesere izin masu ma we, vana unu ma zo me in ahira u nata u nice ba.'' ²¹ Uye anyimo anu tarsa ume ma gun me, "Ugomo Asere da cekum in ha inka vatti acoo am." ²² Yeso ma gun me, "Tarsam, ceki ande sa anu u wijo wa vati ande wa wijo.'' ²³ Uganiya sa Yeso ma ribe uzirgi u myei, anu umanza u Yeso wa tarsi me. ²⁴ Abini me Upebu udandang u hiri a niwing nidang ibarka i myei i tubi uteki u nikara ni u zirgi me a Yeso in moro. ²⁵ Anu tarsa ume me wa eh wa hirza me wa gu, ''Buran duru, Ugomo Asere ti di wi!" ²⁶ Yeso Ma gun we, "Barki nyanini ya kunna iyau ani me, anu hem u cing?" abini me ma hiri ma gbarika upebu nan uraba udang. Ba ahira me adusa a tunno dang. ²⁷ Anu me wa kunna biyau wa gu, "Uyaya unu mani ma zige me, sa upebu nan uraba udang wa kunna me?" ²⁸ Sa Yeso ma aye usoro uhuru u ma nyanga ma Garasinawa, anu ware in a gbergene wa kem me wa susi anyimo a mucau wa zinu ukara kang, daki anu wa bari wa tarsi una me ba. ²⁹ Wa wati uhunu wa gu, "Nyani myei ma weni nan haru, vana Asere? Wa aye aba me barki u yomkon duru uganiya u da?" ³⁰ Nire nigo ni maladu na zinu kese ahira me daki nazi piit nan we ba. ³¹ Agbergene wa dusa utira u Yeso tari unu gusa, ''Inki wa suso duru utuburkon duru a nigo ni maladu magino me." ³² Yeso Ma gun we, "Hananii!" Ba wa suri wa ka ribe a maladu wa dusa nigo me ukatuno uraba udang waka rizo wa wiji a myei me. ³³ Anu tarsa in maladu me wa sumi, wa ribe a niping wa meki ukisa me barki imum be sa ya kem andesa wa zin na gbergene. ³⁴ Vat anu a niping me wa suri wa kem Yeso, sa wa ira me wa nyari me ma ceki we manyanga ma we.