¹ Yeso ma kuri ma wuzi we tize ta anyimo, ma gu, ² " Tigomo ta Aserere tizi kasi ure Ugomo desa ma wuzi vana ume me igap ya anya. ³ Ma tumi arere ame me wa titi ande sa a buu we wa eh ahira igap ya anya me, anime wa ga we u aye. ⁴ Ugomo me ma kuri ma tumi are arere, ma gu, 'Buka ni ande sa a buu we, irani, mamu mara usirsa imum yare im. A wesi ijimi im nan amaruka mam sa wa tiyo, a mara kondi nyani. Ayeni igap ya anya me.''' ⁵ Ani me wa game u kunna ukadura me wa dusa we imum iwe, uye ma dusa uru ume, uye ma dusa abiziza-ziza bu me. ⁶ Ukasu me wa meki arere Ugomo me, wa wuzi we imum imu'i, wa kuri wa hu we. ⁷ Ugomo ma kunna iriba, ma tuburko anu a nikara nini kono nume me, ka huna ni anu uhuza anabu agino me i kuri i punsi nipin nuwe me. ⁸ Ba ma gun in arere ame me, 'Amara kondi nyani igap ya anya me, iye ande sa abuu we daki wa wunna ba. ⁹ Barki anime hana ni anyo una, i buu ibinani ugbardang andesa ya kem, u aye igap ya anya me. ¹⁰ Arere ame me wa dusa una me wa orso vat anabu sa wa kem anu ariri nan anu aburi. Nikubu ni igap na anya me ni myinca fesh in na genu. ¹¹ Sa ugomo ma aye barki ma iri igenu me, ba ma iri uye sarki turunga ta anya me. ¹² Ugomo ma gun me, 'uroni, aneni wa aye a bame sarki turunga ta anya?' unu me ma diri imum i buka. ¹³ Ba Ugomo ma gun in arere ame me, tira ni unu uge me tari nan ubuna i vingi me anyimo mareu, ahira sa adi shi a rumizi ahini. ¹⁴ Barki a tita anu gbardang, azauka anu acing." ¹⁵ Mafarisawa wa dusa uka wuza u malim batti wa meki me anyimo atize tume me. ¹⁶ Ba wa tuburko me anu manza uwe me nan Mahirudiyawa wa gun in Yeso, "Unu dungara, ti rusa hu una kadure mani, u kuri dungari una Ugomo Asere in kadure. Daki u igizo in imum iriba i uye ba, daki u zawa anu ba. ¹⁷ Bukan duru imum be sa ubasa, ya wunna uri ti bi ikirfi i manyanga a kaisar nani ani?" ¹⁸ Sa yeso ma tinka imumum iburi imu riba muwe me ma gu, "Nyanini ya wunna izinu u manza um, shi anu apuru abit? ¹⁹ Bezi ni mi ikirfi i manyanga me, wa dusa wa ehn me in bidinari. ²⁰ Yeso ma gun we, uhurtu nan niza na veni na zige me. ²¹ Wa gun me, ni kaisar nini ba ma gun we, nyani kaisar imum be sa izi i kaisar, Asere imum be sa izi ya Asere. ²² Sa wa kunna anime, wa kunna biyau wa dusa we. ²³ Rono ugino me mare masadukiyawa, an desa wa gu, uhirsa anu wijo uzoni, wa eh ahira ame. wa iki me, ²⁴ Wa gu, unu udungara, Musa ma gu, ingi unu ma wono,ma zo me in nahana ba, ya cokuno gbas uhenu me ma wuzi anya nan uneh me ma yoo uhenu ume me ahana. ²⁵ Aye anu sunare a nihenu nuwe me waa rani, unu u tuba ma wuzi anya ma wi. Sa daki ma yoo nan uneh me ba, ma ceki uhenu me in nu uneh ume me. ²⁶ Ane ani uhenu ukure me maa wuzi, nan unu utaru me, u hana unu sunare me. ²⁷ Sa wa mara uwuza ugino me, uneh ma dusa ma wi. ²⁸ Uwui uhira anyimo iwono, uneh wa aveni madi zi anyimo awe usunare me? Barki waa wuzi anya nan me." ²⁹ Yeso ma kabirka we ma gu, ya cama ni barki sa ida rusani tize ta Asere ba, ida kuri i rusi shi ubari Asere ba. ³⁰ Barki uwui uhira anyimo iwono, anya azoni uwuza anya uzoni, ti di cukuno kasi ibe i kadura ka Asere sa wa ra asesere. ³¹ Abanga uhira anyimo iwono, daki yamu bata imum be sa Asere a buka shi ba, agi, ³² Mi mani Asere Ibrahim, Asere i ishaku nan Asere a Yakubu'? Asere daki Asere anu wijo ani ba, anu uvengize ani. ³³ Sa nigura na kunna anime, imum i biyau i meki we inu dungara ume me. ³⁴ Sa Mafarisawa wa kunna agi Yeso ma mara in Masadukiyawa, ba wa ori ace awe. ³⁵ Unu inde anyimo awe, unu urusa utize ti nikubu, ma wuzi me u iko, inu bata ume ³⁶ "Unu dungara, uya u inko utize tinini uteki in nu gbardang anyimo u weki u tize?" ³⁷ Yeso ma gun me, hem in nu Ugomo Asere awe me ini riba iwe me vat nan nice nuwe me. ³⁸ Ige me ini idandang nan i tuba u inko utize. ³⁹ U inko utize tu kure tizi gusi ti tuba tini, hem in inu unu utura uwe me kasi nice nuwe me. ⁴⁰ Ahira u inko utize tigino me tini uwesi utize ta anu u kurzuzo u tize ta Asere ta tonno ni.'' ⁴¹ Sa Mafarisawa wa ori ahira a inde, Yeso ma iki we. ⁴² I basa ane ni in vanah Asere? Me vana aveni?" Wa gun me vana u Dauda mani." ⁴³ Yeso ma gun we, aneni Me Dauda anyimo abibe maa titi me Ugomo Asere, inu gusa, ⁴⁴ Ugomo Asere maa gun ka Asere am, cukuno a tari tinare tum, indi tari we asesere uroni ishina iwe me."'? ⁴⁵ Ingi Dauda ma tita 'Asere' Ugomo Asere, 'aneni ma cukuno vana u Dauda? ⁴⁶ Daki uye ma kabirka me ba, daki uye ma wuza me ure u iko ba datti usuro uwui ugino me.