¹ Uganiya sa, a yoo Yeso u Baitalami ama nyanga mu yahudiya, Hirudus mani mazi Ugomo, a kem are anu rusa waa suri anaza wa eh a Urushalima wa gu, ² "Unu sa ayoo me ma raa Ugomo a Yahudawa? Ta ira biwirang bume me anaza ta aye ti nonzo me." ³ Sa Ugomo Hiridus ma kunna anime, ma kem ma aye anyimo iriba ime me nan anu urushalima. ⁴ Hiridus ma ori anu adandang katuma kasere vat nan anu nyettike ma iki, "Abani adi yoo unu bura me ni?" ⁵ Ba wa gun me, "U Baitalami uni amanyanga mu Yahudiya, kasi u nyettike unu kurzo utize ta Asere. ⁶ Hu Baitalami, u Yahudiya da hu mani ucing anyimo anu aje u Yahudiya, barki anyimo awe adi yoo unu bari de sa ma di tarsin in anu am anu Isara'ila."' ⁷ Hiridus ma titi anu rusa ugino me ni hunzi, ma iki we atii uganiya sa biwirang me ba eh we. ⁸ A anime ma tumi we u Baitalami, ma gu, "Hana ni ika igizoni abanga a vana me memmeru inki ya kem me, i eh i buki nimi barki mi cangi inka nonzo me." ⁹ Sa wa kunna tize ti Ugomo, wa dusa we, biwirang me sa wa ira anaza bi haka aje awe, bi eh bi tonno ahira me sa vana me maa rani. ¹⁰ Sa wa ira biwirang me wa wu apuru arum. ¹¹ Sa wa ribe akura me, wa iri vana me nan ka'ino me maryamu. Wa rizi aje ame wa nonzo me. Wa sopi turunga tuwe, wa nyaki me azumo awalwal wan uluban nan umur. ¹² Asere a gbarika we a tiro kati wa kuri a hira a Hiridus ba, wa dusa wa tarsi ure una sas wa kuri a manyanga mawe me. ¹³ Sa wa hira, bibe bikadura ku ugomo Asere bi buki Isubu a tiro, bi gun me , "hira uziki vana me nan ka' ino me u ha amanyanga mu Masar, i cikuno abirko me ma buka we Hiridus ma zinu igizo abanga avana me ma hu me." ¹⁴ Isubu ma hiri ma ziki vana me nan ka'ino me in niye wa dusa u Masar. ¹⁵ Ma cukuno abirko me uhana iwono i Hiridus. Abanga agino me barki a myincikina imum besa Ugomo Asere ma buki anyo unu kurzuzo utize ta Asere "u suro u Masar ma tita vana um." ¹⁶ Sa Hiridus ma ira anu rusa ugino me wa kurzo me ubabana. ma kunna iriba kang, ma tumi a huzi ahana acincing aruma sa wa ra anyimo u Baitami nan mataraa vat. uzika uti we tire utuno, uzika uganiya sa anu rusa waa buki me. ¹⁷ Uganiya ugino a myincika u buka u Irimiya unu kurzuzo u tize ta Asere. ¹⁸ A kunna nimyirang u Rama,in asoo in apuru abit kang. Rahila mani ma zin asoo barki ahana ame me ma kuri ma ga me iriba isheu barki wa zooni.'' ¹⁹ Sa Hirudus ma wono, bibe bi kadura ka Asere bi eh isubu anyimo a tiro, u Masar, bi gu, ²⁰ "Hira u ziki vana nan ka'ino me, i dusa a manyanga mu Isaraila. barki anu nyara u huna uvana wa wijo." ²¹ Isubu ma hiri, ma ziki vana nan ka'ino me, ma ze a manyanga mu Isaraila. ²² Sa ma kunna Arkilayus ma kaba tigomo ti aco me Hiridus, ma kunna biyau bu biki abirko me. Sa Asere a gbarika me a tiro ma wata uhana u Galili. ²³ Ma ha ma ka cukuno a nire nipin agi u Nazarat. Barki a myinca u buka anu kurzuzo u tisa me unu u nazaret.