¹ Mi da anu zatu uganiya mani? Inda zom udura ba? Da ma ira Asere am Yeso ba? Da she wani katuma katari tume anyimo Asere ba? ² Da mi una kadura ka aye wani ba, kadure mi una kadura kani ahira ashi. She wani anu inko urusa u kadura kam me anyimo Asere. ³ Utonno um uye ahira ande sa wa boo anice num; ⁴ Ti zo duru in uganiya are nani usa ba? ⁵ Ti da ke ti ziki uneh anyimo anu uhem kasi sa ta ziki anutarsa Asere nan kefas nihenu anyimo Asere? ⁶ Nani Barnaba mani nan mi tidi wuzi katuma. ⁷ Aveni ma di wuzi katuma ka una aje nikara ni nikono ? Aveni ma di wuzi tibira sarki are imum me sa ma bira? Nani Aveni ma di canti itam ma da sa manunu mawe ba? ⁸ In boo ani me in nikara ni unu nini? U inko utize da wa buki anime ba? ⁹ Ayettike anyimo u inko utize ti Musa agi, ku barka ku katarek ingi kuzinu patalla idawa kati i wu kuni nizin ba. Ine ini Asere a boo ni? ¹⁰ Da barki haru wani ma boo ni ba, a nyettike barki haru wani. Barki desa ma wuza avara, ma wuzi katuma unu inso iriba. Unu upatalla ubi sana ma wuzi unu inko iriba ukem. ¹¹ Ingi ta wuza tibira ti timumum ti bibe anyimo ashi me,nani i di aki nikara niuu ti kem timumum ahira ashi me? ¹² Ingi aye wa wuza katuma unu'ira ugeno anyimo ashi me, tida teke we unu ira ba? Vat anime da ta wuza katuma uni ira me ba, A, anime, Na ti ti iri ni iriba imum me sa idi kartin duru katuma ka Yeso. ¹³ Ida rusa shi ba ane ani arere anyimo udenge Asere wa kenzi imumare iwe me abini ani? Ida rusa shi ba anu aka tuma ahira utunzino ana dang udenge Asere, wa kenzi imumare iwe ahira imumare sa a ezeni abini me. ¹⁴ Ane ani Asere agu ana ka tuma ka Asere wadi ri imumare iweme una ukatuma kawe me. ¹⁵ Daki ma wuza katuma unu ubuka ugino me ba, da ma nyettike ige me bati awuzim ire imum idandang ini ba, ma hem in wi barki unu guna uye ma kartum uvavi ubigiri. ¹⁶ Ingi ma boo tize ta Asere, daya cukunom imum i vavi u bigiri barki ya cukunom iriri in wuzi kani. ¹⁷ Barki ingi ma wuza katuma kagino me in u hem, in zin ire imum unya in daki uni hem iriba in ba, in zin in imum I wuza sa a nyam. ¹⁸ Yanini I di cukuno ukalum um? Igi ma boo tize ti Asere, Inda ke in boo utize ti runta ti Asere sarki ire imum nan u zati u wuza katuma uni'ira anyimo katuma me. ¹⁹ Me mani u'ira u vat, ma kurzo nice num urere u kunde avi barki in kem anu gbardang. ²⁰ A mayuhuma, ma cukuno uyahudawa, barki in kem ayahudawa gwardan, ahira adesa wa tarsa udungara Umusa, ma kurzo nice num kasi we, barki in kem asesa sa wa tarsa udungara Umusa. Ma wuzi ani da agi in raa anyimo udungara Umusa uni ba. ²¹ An desa wada raa udungara Umusa ba, ma kurzo nice num kasi we, A'anime dama ceki udungara Asere ba. In raa U inko tize ta Asere.Ma wuza anime barki in buri adesa wa tarsa udungura Umusa. ²² U watu anu zatu unikara, ma kurzo nice num kashi we, barki in buri anu zatu nikara. Ma kurzo nice num vat imum barki vat anu barki in kem una ubura aye uhana ukem ubura. ²³ In wuza vat imum barki katuma ka Asere, barki in kem ure aje anyimo katuma ka Asere. ²⁴ Ida rusa shi ba anu gbardan, wa ribize a magasiya unu u inde mani cas madi agiza ma kabi ukalun me, barki anime wuzani magasiya barki i kem ukalum. ²⁵ Unu biranza madi tirzi nipum nume gangang barki makem ukalum ugebe sa udi cueme, haru tizin magasiya barkin ti kem ukalum ugebesa uda curzino me ba. ²⁶ Barki ani me inda wuzam magasiya nani in boo anime kasi unu tira upebu. ²⁷ In zinu upatizi uni pum numin kurzo nini urere, kati ingi ma wuza ayi tize ta Asere a kuri asusum.