16
1
اَمی خأخور «فیبی» یَ شومرَه معرفی کونم کی به زودی شیمی ورجَه اَیه، اون جی خادمانِ فعالِ کلیسایِ شهرِ «کَنخَرِیّا» یِه.
2
خداوندِ اتحادِ اَمرَه اوطویی کی ایماندارانِ مسیحی شایسته یِه اونَ قبول بوکونید و هر کارِ دورون کی شومرَه احتیاج دَأره، اونَ یاری بوکونید، چون هم مرَه، هم خیلیانِ دیگرَ، نیازِ موقع حمایت بوکوده دَأره.
3
«پَرِسکّلا» و اونِ مرد «اَکیلا» یَ می سلامَ برسَأنید، اَشَأن در خدمت به عیسی مسیح می همکاران بود
4
کی می وَسی خوشَأنِ جانَ به خطر تَأوَأدد. و فقط من نه، بلکی همۀ کلیسایانِ غیرِ یهود اَشَأنِ جَه تشکر کوند.
5
کلیسایی کی اَشَأنِ خانه دورون به پا بِه همه تَه اعضایَ، سلام بِرِسَأنید. می عزیزِ دوست «اِپینِطوسَ» سلام بِرِسَأنید. اون اولین کسی بو کی آسیا دورون مسیحَ ایمان بَأورد.
6
و «مریمَ» کی شومرَه خیلی زحمت بِکِشِه دَأره یَ سلام بِرسَأنید.
7
می خویشَأن «اَندرونیکوس» و «یونیاسَ» کی می مرَه زندانِ دورون ایسَه بودَه سلام بِرِسَأنید. اوشَأن همۀ رسولانِ میَأن پیلِه کس حیساب بود و پیشتر جی من مسیحی بوبُستد.
8
«اَمپَلیاس» کی اونَ خداوندِ دورون دوس دَأرمَ سلام بِرسَأنید.
9
می همکار «اوربانوس» کی مسیحَ خدمت کونه و می عزیزِ دوست «اِستاخِیس» سلام بِرسَأنید.
10
و «آپیلُس» کی خو وفاداری یَ مسیحَ ثابت بوکوده و هَطو «اَرَستُبولوسِ» خانواده یَ سلام بِرسَأنید.
11
و می خویش «هیرودیون»، و «نارکیسوسِ» خانواده، ایماندارانَ سلام بِرسَأنید.
12
خأخور «طَریفینا» و خأخور «طَریفوسا» یَ کی خداوندِ کارِ دورون زحمت کِشد و می عزیزِ دوست، خَأخور «پَرسیسَ» کی خداوندِ رِه خیلی زحمت بِکِشِه دَأره یَ می سلامَ برسَأنید.
13
و «روفُس» خدا انتخاب بوبُسته، و اونِ مار کی می مارِ مَأنستَأن می گردن حق دَأره یَ می سلامَ برسَأنید.
14
«اَسنِکرطوس» و «فَلیکون» و «هِرماس» و «پَطروباس» و «هَرمِس» و دیگر برَأرَأنی کی اَشَأنِ مرَه ایسَأدَه، می سلامَ برسَأنید.
15
«فیلولیکُس» و «جولیا» و «نیریاس» و اونِ خأخورَ، و هَطو «اولِمپاس» و همۀ ایماندارانی کی اشَأنِ مرَه ایسَأدَه سلام برسانید.
16
همدیگرَ محبتِ خالصِ اَمرَه مَأچی بدید و خوش آمد بوگوئید. مسیح همه تَه کلیسایان شومرَه سلام رِسَأند.
17
ای برَأرَأن، شیمی جَه خواهش کونم، دوری بوکونید جی اون کسانی کی خَأید تفرقه تَأوَأدد و شومرَه جی هم سیوایَ کوند، و شیمی راهِ دورون مانع تَأوأدد و اون تعلیمی مرَه کی شومَأن بیده دَأرید مخالفت کوند.
18
چون اَجور کسان اَمی خداوند مسیحَ خدمت نوکوند، بلکی فقط خوشَأنِ نفعِ دونبال ایسَأد، گبایِ خوب و قشنگِ اَمرَه ساده لوحانِ فکرِ رو تأثیر نِهد، و اوشَأنَ فریب دِهِد.
19
شیمی ایمانِ خبر همه جا بِپیچِستِه دَأره و من هَنه وَسی خوشحالم، ولی ناجِه دَأرم کی خوبی کودَأنِ دورون کارکوشته بیبید، و بدی کودَأنِ دورون بی تجربه.
20
و خدایی کی صُلح و سلامتی سرچشمه یِه، به زودی شیطانَ شیمی پا جیر لِه کونه. اَمی خداوند عیسی مسیح فیض شیمی اَمرَه بیبِه.
21
می همکار «تیموتائوس» شومرَه سلام رسَأنه. و «لوقا» و «یاسون» و «سوسیپاطِرُس» کی می خویشانِ جَه یِد هم شومرَه سلام رسَأند.
22
من «طَرتیوس» پولسِ منشی، و کسی کی اَ رساله یَ شومرِه نیویشتَأن دِرِم، شومرَه خداوندِ دورون سلام گویم.
23
«قایوس» هم شومرِه سلام رِسَأنه، من اونِ خانه مهمانم و اَیَه همۀ ایمانداران اونِ خانه میَأن جمعَ بود. و «اَرَسطوس» شهرِ خزانه دار، و اَمی ایماندارِ برَأر، «کوارطوس» شومرَه سلام رسَأند.
24
و هَسَه شومرَه ایسپارم اونی یَ کی قادره بر طبقِ اون انجیلی کی من اِعلام کونم و عیسی مسیح پیام، شومره شیمی ایمانِ دورون قوی و اُستوار بوکونه. مطابقِ هون رازی کی جی اَزل جیگا بدَه بوبُسته بو،
25
ولی هَسَه هوطویی کی پیغمبران پیشگویی بوکوده بود، خدای اَزلی فرمانِ اَمرَه، اون راز آشکارَ بوسته تا ایمان اَوردَأن و ایطاعت کودَأنِ وَسی، همۀ قومَأنَ اِعلام بیبِه.
26
تا اَبد جلال باد خدایِ دانا و یکتایَ، بواسطۀ عیسی مسیح. آمین