89 ¹³ تی بازو پور قوّته، تی دس زور دَأره، و تی راست دس مُتعاله. ¹⁴ تی سلطنت عدل و انصافه اَمرَه یه، تی همۀ کاران رحمت و راستی مرَه یه. ¹⁵ خوش به حال اون مردمی که دَأند چوطو ترِه سرود بخَأند، چون تی حضورِ نورِ میَأن راه شُد ای خداوند. ¹⁶ اوشَأن تی نامِ وَسی همۀ روز شادی کوند و تی عدالتِ اَمرَه سربلندَه بود. ¹⁷ چره کی تو اوشَأنِ جلال و قوّتی، و تی لطفِ اَمرَه اَمَأن پیروز و سربلندَه بیم. ¹⁸ چون ای خداوند، اَمی نگهبانَ تو انتخاب بوکوده ای، ای اسرائیلِ مقدسِ خدا، تو اَمرَه پادشاه ببخشه ای. ³⁸ ولی هَسَه اونِ جَه رو وَأگردَأنه دَأری و اونَ فیشَأده ای، خودتِ مسیحَ غضب بوکوده ایی و اونَ ترکَ کوده ایی. ³⁹ خودتِ عهدَ تی بنده مرَه باطلَ کوده ایی و اونِ تاجَ به زمین بزَه ایی و بی حُرمت بوکوده ایی. ⁴⁰ همۀ اونِ حصارانَ بیشکینه ایی و همۀ اونِ قلعه یانَ ویرانَ کوده ایی. ⁴¹ راه دوَأران اونِ دارایی یَ تاراج زند و همساده یان اونَ مسخره کوند. ⁴² باعث بوبُستی اونِ دوشمنان پیروزَ بود و همه تَه یَ خوشحالَ کوده ایی. ⁴³ اونِ شمشیرِ کولَ کوده ایی و جنگِ موقع اونَ کمک نوکودی. ⁴⁴ اونِ سلطنتِ تختَ زمینِ رو وَأگردَأنه دَأری و اونِ جلال و عظمتَ باطلَ کودی. ⁴⁵ پیشتر جی موقع اونَ پیرَه کودی و مردمِ ورجَه رسوا بوکودی. ⁴⁶ ای خداوند، آیا تا اَبد خودتَ می جَه جیگا دهی؟ آیا همیشه رِه تی غضب آتشِ مَأنستَأن شعله ور مَأنه؟ ⁴⁷ خداوندا، به یاد بَأور کی اَمی عُمر چی کوتاهه، تو همۀ آدمانَ جوری خلق بوکودی کی باطلَ بود. ⁴⁸ کَ زنده آدمه کی مرگَ نیدینه؟ کیه کی بتَأنه خورَه قبرِ دسِ جَه خلاصَ کونه؟