80 ¹ ای اسرائیلِ چوپان بیشتَأو، ای کی یوسفِ طایفه یَ ایتَه گله گوسفندِ مَأنستَأن رهبری کونی، ای کی کروبینِ بوجُر نیشته ای، آشکارَ بون. ² تی قدرتَ اِفرایم و بنیامین و مَنَسی نشان بدن و اَمرَه نجات بدن. ³ ای خدا، اَمرَه خودتِ طرف وَأگردَأن و تی رویَ روشنَ کون تا اَمَأن نجات پیدا کونیم. ⁴ ای یَهوَه، ای صبایوتِ خدا، تا کِی تی خودتِ قومِ جَه عصبانی ایی و اوشَأنِ دوعایَ مستجاب نوکونی؟ ⁵ غم و غصه یَ اوشَأنِ خوراک کونی و ایتَه جام پور جی اَشک فَأدی کی بوخورد؟ ⁶ اَمی سرزمینَ اَمی همساده یانِ میدانِ جنگ بوکوده ایی و اَمی دوشمنان اَمره مسخره کوند. ⁷ ای لشکرانِ خدا، اَمرَه به خودتِ حضور وَأگردَأن، و خودتِ رویَ روشنَ کون تا نجات پیدا کونیم. ⁸ تو اَمرَه ایتَه اَنگور دارِ مَأنستَأن جی مصر بیرون بأوردی و اَیَ بینیشَأنِه ایی، تو مردمی کی اَیَ زندگی کوددَه بیرون تَأوَأدَأیی. ⁹ اَمی دؤر و وَرَه بیگانه یانِ جَه پاکَ کودی و تی قؤم، اویَ ریشه بودووَأند و همۀ اون سرزمینَ پورَه کودد. ¹⁰ کوه هانَ خوشَأنِ سایه مرَه بوپوشَأند و اوشَأنِ شاخه یان سروِ دارانَ بیگیفت. ¹¹ خوشَأنِ شاخه یانَ جی ایطرف تا دریای مدیترانه ساحل، و ایطرف دیگرِ جَه تا رودِ فرات پهنَ کودد. ¹² پس چره تو اونِ حصارانَ فوکوردَأنه ایی، تا هر راه دوأری اونِ میوه یَ بیچینه؟ ¹³ جنگلِ خوکَأن اونَ ویرانَ کوند و صحرا حیوانانِ وحشی اونَ خوردَأن درد. ¹⁴ ای لشکرانِ خدا، اَمی ورجَه وَأگرد، جی آسمان فَأندر و بیدین، اَ اَنگور دارَ یاور بوبون. ¹⁵ بیَأ و اَ نهالی یَ یاری بدن کی خودتِ دسِ اَمرَه بکأشتی، و اَ پسری کی خودت پیلَه کوده دَأری جَه محافظت بوکون. ¹⁶ اَمی دوشمنان هیزمَ مَأنستَأن اونَ آتش بزَد، اوشَأنَ خودتِ غضبَ گرفتارَ کون و جی میَأن بوبور. ¹⁷ ولی قؤمی کی خودت انتخاب بوکوده ایی و اونَ قوّت ببخشه دَأری جَه، حمایت بوکون. ¹⁸ اَمَأن دِ تی جَه رو وَأنگردَأنیم، اَمرَه زنده بدَأر تا تی نامَ ستایش بوکونیم. ¹⁹ ای یَهوَه، ای لشکرانِ خدا، اَمرَه دوباره به خودتِ حضور وَأگردَأن، و خودتِ رویَ روشنَ کون تا نجات پیدا کونیم.