72 ¹ ای خدا، خودتِ عدالتَ پادشاهَ عطا بوکون و تی انصافَ پادشاه پسرَه. ² تا تی قؤمَ عدالتِ اَمرَه داوری بوکونه و مظلومانَ انصافِ اَمرَه دادرسی بوکونه. ³ اونموقع همۀ اَمی سرزمینِ میَأن سلامتی و عدالت برقرار بِه. ⁴ بازن پادشاه قؤمِ مظلومانَ انصافِ اَمرَه داوری کونه و فقیرانِ زَأکانَ نجات دِهه و ظالمانَ نابودَ کونه. ⁵ بیبِه کی تی قؤم تا زمانی کی ماه و خورشید آسمانِ میَأن باقیه، ترَه همیشه ترس و احترامِ اَمرَه ستایش بوکوند. ⁶ پادشاه بارانی یَ بمَأنه کی علفزارِ رو وَأره و رگباری مَأنستَأن کی زمینَ سیرابَ کونه. ⁷ اونِ دوره میَأن دوروستکاران و صالحان کامیابَ بود و تا زمانی کی ماه آسمانِ میَأن باقیه سلامتی برقرار بیبِه. ⁸ و اون جی دریا تا دریا و جی رودِ فرات تا دورترین جهانِ نقطه حکومت کونه. ⁹ اونِ دوشمنان اونِ حضورِ جَه زانو زند و اونِ پِشِ جَه به خاک کفد. ¹⁰ اسپانیا پادشاهان و دریایِ مدیترانه جزایرِه پادشاهان اونِ رِه پیشکشی اَورد، و همۀ شَبا و سَبا پادشاهان اونِ رِه هدیه ئانی اَورد. ¹¹ همۀ پادشاهان اونَ تعظیم کوند و همۀ اُمتان اونَ خدمت کوند. ¹² وختی فقیران اونِ جَه کمک بخَأید، اون اوشَأنَ کمک کونه و بی کسانَ یاری کونه. ¹³ ضعیف و نیازمندَه رَحم کونه و اوشَأنَ نجات دِهه. ¹⁴ اوشَأنَ جی ظلم و جی بدخواهانِ شرِ جَه خلاصَ کونه، چره کی اوشَأنِ زندگی اونِ نظرِ جَه با اَرزشه. ¹⁵ پادشاه عُمر دراز بیبه، و شَبا طلا اونِ نصیب بیبه، اونِ قؤم همیشه اونِ رِه دوعا بوکوند و اونَ متبارک دخَأند. ¹⁶ اونِ سرزمین پور محصول بیبه و اونِ کوهان لبنانِ کوهانِ مَأنستَأن حاصلخیز بیبه، و هوطو کی صحرا دورون علف دره، اونِ شهران هوطو جمعیتِ جَه پورَه بِه. ¹⁷ اونِ نام تا اَبدالآباد باقی بمَأنه و اونِ شُهرت آفتابِ مَأنستَأن برقرار بیبه. همۀ جهانِ مردمان اونِ جَه برکت گیرد و اونَ مُتبارک دخَأند. ¹⁸ متبارک بیبه یَهوَه اسرائیلِ خدا، فقط اونه کی پیله کارانِ عجیب انجام دِهِه. ^{19 20} اونِ نامِ مجید تا اَبدالآباد مُتبارک بیبه، و همۀ زمین اونِ جلالِ جَه پورَه بِه. آمین آمین یسا پسر، داودِ زبور تومامَ بوست.