71 ¹ خداوندا، ترَه پناه بَأورده دَأرم وَأنَأل هیچموقع شرمنده بوبوم. ² تو عادلی، پس مرَه کمک بوکون و خلاصَ کون. می دوعایَ بیشتَأو و مرَه نجات بدن. ³ می پناهگاه بوبون تا همیشه ترَه پناه بأورم، تو می نجاتِ رِه حکم بوکوده ایی، چره کی می صخره و می قلعه تویی. ⁴ خدایا مرَه جی شریر و بدکار و ظالمِ دس خلاصَ کون. ⁵ چون ای خداوند، می اُمید تویی و جی جوانی تا هَسَه ترَه اعتماد بوکوده دَأرم. ⁶ تو مرَه می مارِ شکمِ جَه بودونیا بأوردی و جی هون روزی کی بودونیا بأموم می تکیه گاه تو بویی، پس همیشه ترَه ستایش کونم. ⁷ می زندگی خیلیانِ رِه سرمشق بوبُسته، چره کی تو می پوشتیبان بویی. ⁸ می دهَنِ جَه فقط تی شُکر و ستایش بیرون اَیه و همۀ روز تی جلالَ اعلام کونم. ⁹ هَسَه کی پیرَه بوستم مرَه فینشَأن، چون می قوّت بوشو دَأره مرَه ترکَ نوکون. ¹⁰ چره کی می دوشمنان بر ضدِ من گب زند و می جانِ قصدَ دَأرد. ¹¹ اوشَأن گویده: خدا اونَ ترکَ کوده، پس بیشیم اونَ بیگیریم، چون دِه کسی نِئسَه کی اونَ اَمی دسِ جَه خلاصَ کونه. ¹² خدایا، می جَه دورَه نوبون، خدایا می یاری رِه عجله بوکون. ¹³ می جانِ دوشمنان رسوا و نابودَه بود، و اوشَأنی کی تلاش کوند مرَه ضرر برسَأند سراَفکنده و بی آبرو بوبود. ¹⁴ من همیشه ترَه اُمیدوارم و ویشتر و ویشتر ترَه ستایش کونم. ¹⁵ می زبان تی عدالتِ جَه گب زنه و هر روز مردمِ رِه تعریف کونم کی تو مرَه اَقدر نجات بدَه دَأری کی نِتَأنم بیشمَأرم. ¹⁶ خداوند یَهوَه قدرتِ اَمرَه اَیم و همه یَ اعلام کونم کی فقط تو عادلی. ¹⁷ ای خدا، جی هون کوچیکی تو مرَه تعلیم بدَه دَأری و من تا هَسَه تی کارایِ عجیبَ اعلام بوکوده دَأرم. ¹⁸ پس ای خدا، هَسَه کی پیرَه بوستم و می مو سفیدَه بوسته مرَه ترکَ نوکون، تا نسلایِ آینده رِه تی زورِ بازو و تی قدرتِ جَه تعریف بوکونم. ¹⁹ خدایا، تی عدالت تا آسمانان فَأرسه دَأره، تو کارای عظیم بوکوده دَأری، خدایا کی تی مَأنستَأنه؟ ²⁰ تو انواع سختیان و مشکلاتَ می سر بَأوردی، ولی دوباره می قدرتَ مرَه وَأگردَأنی و مرَه جی مرگِ دس خلاصَ کونی. ²¹ مرَه ویشتر جی سابق سر بلندَه کونی و وَأگردی و مرَه دلداری دهی. ²² پس منم بربطِ اَمرَه ترَه ستایش کونم، تی راستی و صداقتَ ای خدا، و ترِه ای اسرائیلِ قدوس، چنگِ صدا اَمرَه سرود خَأنم. ²³ وختی ترِه سرود خَأنم می لبان شادی کونه، می همۀ وجودِ اَمرَه خَأنم، چره کی تو مرَه نجات بدَه دَأری. ²⁴ همۀ روز تی عدالتِ جَه گب زنم، چره کی اوشَأن می اذیت و آزارِ وَسی تلاش کودد ولی شرمنده و رُسوا بوبُستد.