69 ¹ خدایا مرَه نجات بدن، می جان به لب فَأرسه دَأره. ² لجنزارِ میَأن فرو بوشو دَأرم، می پا جیر جایی نِنَه کی بِئسم، آبهای عمیقِ میَأن غرقَ بوستَأن درم، سیلاب می سرِ جَم دوَأرستَأن دَأره. ³ ناله جَه خستَه بوستَأن درم و می گولی خوشکَ بوسته، می چومَأن جی انتظار تارَه بوستد. ⁴ خیلیَأن هَطو هَچین می جَه نفرت دَأرد و می سرِ مو جَه ویشتر دوشمن دَأرم، اوشَأن دوروغ گوید و می جَه قویترد، اوشَأن می جانِ قصدَه دَأرد، اوشَأن مرَه مجبور بوکودد اونچی کی نودوزَأنِه بومَه پسَ دم. ⁵ ای خدا تو می حماقتِ جَه خبر دَأری و می گوناهانَ دَأنی. ⁶ یَهوَه صبایوت، ای خداوند، وَأنَأل می وَسی اوشَأنی کی ترَه توکل بوکوده دَأرد شرمنده بوبود. ای اسرائیلِ خدا، کسانی کی ترَه اُمید دوسته دَأردَ رُسوا نوکون. ⁷ من تی وَسی رسوا و شرمنده بوبُستم. ⁸ می اَقوام و خیشانِ ورجَه بیگانه بوبُسته دَأرم و می برَأرَأن ورجَه غریب. ⁹ چون تی خانه رِه غیرت دَأرم و اَ غیرت مرَه بوسوزَأنه دَأره، هَنه وَسی می دوشمنان مرَه ملامت کوند، هوطو کی ترَه توهین کوند. ¹⁰ موقعی کی روزه گیرم و تی حضورِ جَه اَشک فوکونم و خودمَ فروتن کونم، اوشَأن مرَه سرزنش کوند. ¹¹ وختی توبه کودَأنِ رِه پلاس دوکونم اوشَأن مرَه مسخره کوند. ¹² کوچه بازارِ مردم دربارۀ من حرف زند و شرابخواران مرِه شعر خَأند. ¹³ ولی من ای خداوند، تی درگاهَ دوعا کونم، ای خدا تی رَحمتِ عظیمه وَسی می دوعایَ مستجاب بوکون و مطابق خودتِ وَعده مرَه نجات بدن. ¹⁴ مرَه جی اَ گردابِ مشکلات خلاصَ کون تا غرقَ نوبوم و مرَه می دوشمنانِ شرِ جَه نجات بدن. ¹⁵ وَأنَأل مشکلاتِ دورون غرقَ بوم و اَ گرفتاری یَأن مرَه نابودَ کونه و آخرسر بوشوم قبرِ دورون. ¹⁶ ای خداوند تی رحمت عظیمه، پس مرَه مستجاب بوکون، تی محبتِ عظیمه وَسی مرَه محبت بوکون. ¹⁷ و تی بنده جَه تی رویَ نوپوشَأن، چره کی سختی میَأن ایسَأم، می دوعایَ زودتر مستجاب بوکون. ¹⁸ بیا و می آزادی تاوانَ فَأدن، می دوشمنانِ وَسی می جانِ رِه کفاره فَأدن. ¹⁹ تو دَأنی کی چوطو مرَه سرزنش بوکودد و چوطو خجالت زده و رسوا بوبُستم، تو همۀ می دوشمنانَ شنأسی. ²⁰ مردمِ سرزنش می دیلَ بیشکنه دَأره و بدجور مریضَ بوسته دَأرم، منتظر بؤم کی اینفر مرَه آرامَ کونه، ولی هر طرفَ فَأندرستم کسی یَ پیدا نوکودم کی آدمِ رِه دیل بوسوزَأنه. ²¹ وختی ویشتا بؤم به جای غذا مرَه زهر فَأدد، و وختی تشنه بؤم مرَه سرکه بوخوراند. ²² پس بدَه اوشَأن جشنم به عَزا تبدیل بیبه و اوشَأنِ امنیتم جی میَأن بیشه. ²³ اوشَأنِ چومَأنَ کورَه کون و اوشَأنِ کمرَه جی ضعف بپرکأن. ²⁴ تی خشمَ اوشَأنِ رو فوکون و همه تَه یَ تی غضبِ آتشِ اَمرَه بوسوزَأن. ²⁵ اوشَأنِ خانه یان ویرانِه بیبه و هیچ کس اوشَأنِ خیمه یانِ دورون ساکن نیبه.