63
1
ای خدا، تو می خدایی، سَحرِ موقع ترَه طلب کونم. زمینِ خشک و بی آبِ میَأن می روح تی عطشَ دَأره و می جان تی اِشتیاقَه.
2
من قُدسِ دورون ترَه فَأندرستم تا تی قدرت و جلالَ بیدینم.
3
تی محبت مرِه زندگی جَه شیرینتره، پس می لبان ترَه ستایش کوند.
4
تا زنده یم ترَه شُکر کونم و می دستانَ دوعا رِه تی درگاه طرف درازَه کونم.
5
می جان سِئرَ بِه اِنگار کی بهترین غذایَ بوخورده دَأرم، می دهن شادی اَمرَه ترَه شُکر کونه.
6
شبان وختی شؤم رختخوابِ دورون ترَه یاد اَورم و همۀ شب دربارۀ تو فکر کونم.
7
چره کی تو همیشه مرَه یاری بدَه دَأری، پس تی بالانِ جیر شادی کونم.
8
من ترَه تکیه بوکودِم و تی راستِ دس مرَه محافظت کونه.
9
و اوشَأنی کی می جانِ قصدَه دَأرد هلاکَ بود و فرو شُد زمینِ دورون.
10
اَشَأن شمشیرِ اَمرَه میرد و شئالانِ غذا بود.
11
ولی پادشاه پیروزی ایی وَسی کی خدا اونَ عطا بوکوده افتخار کونه، ولی دوروغ گویانِ دهن دوَسته بِه.