62
1
می جان فقط خدا حضورِ جَه آرام گیره، چره کی می نجات اونِ طرفه جَه یه.
2
اون تنها نجات دهنده و می پوشت و پناهه، پس هیچ موقع شکست نوخورم.
3
تا کِی خَأئید مردیَ فوتورکید و اونَ بوکوشید کی حصارانِ مَأنستَأن خمَ بوسته و فوکوردَأستَأن دره؟
4
شیمی فکر فقط اَنه کی اونَ اونِ مقامِ جَه بیجیر بأورید، شومَأن دوروغَ دوست دَأرید، خودتَأنِ زبانِ اَمرَه اونَ برکت دهید ولی شیمی دیلِ میَأن اونَ لعنت کونید.
5
ای می جان، فقط خدا ورجَه آرامَ بون، چره کی می اُمید فقط اونه.
6
اون تنها نجات دهنده و می پوشتیبانه، اون می محافظه، پس هیچموقع شکست نوخورم.
7
می نجات و سر بلندی خدا طرفه جَه یه، خدا می قوّت و می پوشت و می پناهگاهه.
8
ای مردم، همیشه اونَ توکل بوکونید و خودتانِ مشکلاتَ اونَ بوگوئید، چره کی خدا اَمی پناهگاهه.
9
همۀ مردم، چی کوچدانه و چی پیلدانه، ناچیزد و ایتَه نفس ویشتر نییِد، اگر همه تَه یَ ترازو رو وزن بوکوند بادِ جَه هم سبکترد.
10
ظلمَ توکل نوکونید و اونچی یَ کی دوزدی جَه بدس اَورید اُمید ندَأرید، هر چقدرم شیمی دارایی زیادَه بِه اونَ دیل دنوَدید.
11
بارها بیشتَأوسته دَأرم کی خدا بفرماسته: قدرت خدا دس نَهه.
12
ای خداوند رحمتم تی طرفه جَه یه، و تو هر کسَ مطابقِ اونِ کاران جزا دهی.