59 ¹ ای خدا جان، مرَه می دوشمنانِ دسِ جَه نجات بدن، مرَه جی کسانی کی مرَه حمله کند محافظت بوکون. ² مرَه شریرانِ دسِ جَه خلاصَ کون و مردمانِ قاتلِ چنگِ جَه نجات بدن. ³ بیدین چوطو مرِه کمین کوند، و بی اَنکی تقصیری بدَأرم بر ضدِ من همدست بوبُسته دَأرد. ⁴ کارِ خلافی نوکودم ولی خودشانَ آماده کوند کی فوتورکود مرَه. می کوشتنِ رِه نقشه کشد، هَسَه بیدین و ویریز می یاری رِه بیَأ. ⁵ ولی تو ای یَهوَه، ای صبایوتِ خدا، ای اسرائیلِ خدا، بیدارَه بون، ویریز و همۀ اُمتانَ اوشَأنِ اعمالِ رِه سزا بدن، ظالمان و گوناهکارانَ رَحم نوکون. ⁶ اوشَأن هر شب وَأگردد و سگِ مَأنستَأن لاو کوند و شهرِ دورون چرخد. ⁷ فریاد زند و فُحش دهد، اَشَأنِ زبان شمشیرِ مَأنه، فکر کوند کسی اَشَأنِ صدایَ نیشتَأوه. ⁸ ولی تو ای خداوند، اَشَأنِ رِه خنده کونی و همۀ اَ قؤمانَ مسخره کونی. ⁹ ای می قوّت، من ترَه اُمید دوَسته دَأرم، چره کی تو می پوشتیبانی.